كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة10:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

على ضو القمر لي كان مضوي عليها قعدتها و النجوم لي كانو يلمعو وسط السماء كانت هي قاعدة فالبالكون تاع الكوزينة مقابلة البيسي تاعها حاطة فيه الفلاش ديسك لي نقلت فيه كامل المعلومات لي كانو فالبيسي تاع السي الجنرال على قولتها و تشوف فالكوارث لي كانو مقابلينها من كثرة كمية المعلومات الصادمة لي كانت تشوف فيها ماقدرتش حتى باش ترمش بعينيها معلومات خطييرة جازت تحت انظارها ماعرفتش اصلا كيفاش لازم تكون ردة فعلها فيها و كونها محاسِبة قرات مالية و محاسبة ماجاوهااش معلومات غراب ولا صعاب باش تفهمهم و دخلو لعقلها بكل سلاسة و هي تفك في شفرتهم و تحل فاللغز تاعهم !..

غلقت البيسي من كثرة ماوجعها قلبها من واش شافت و حطت يدها على خدها ساندة ثقلها بيها و هي تخمم لبعيد نسمات الريح الباردة تلسع في بشرتها و طيّر في خصلات من شعرها بكل هدوء بقات دقايق و هي ساكتة تتنصت للحوار لي كان داخل عقلها و تحاول تربط الخيوط مع بعض بصح للاسف كلما تكون راح تلحق لشي نتيجة تلقا روحها رجعت لنقطة الصفر و هي مافاهمة والوو ..

نفخت بتذمر و عاود فتحت البيسي تعاود تقرا فالمعلومات لي سلبولها عقلها و داوها لبعييد عضت على شفايفها بخفة و نطقت بهمس مع نفسها ..

ريام:اه يالسي الجنراال قالك حياة الشعب ترعاها ايادي آمنة وين راه الامن فالشي هذاا .. سرق و نهب و العياااذوووو بالله ..علابيها كاين ناس فقراء كيفنا حقنا كليتوه نتوما ..على الاقل انا اذا سرقت مانسرقش لنفسي مانكلش لحراام اناا

سكتت شوية كي جاتها لحظة ادراك و عاودت هزت كتافها بعدم اهتمام من كلامها الاخير لي قالتو .. غلقت البيسي بزربة و طلعت راسها لجهة هند لي جات طلت عليها و هي مغطية روحها بالغطا تاع فراشها خافت تتلاقا بباباها فالطريق و هي لابسة غير بيستيي و شورت فغطات روحها بالفراش و خرجت على عكس ريام لي كانت لابسة كيفها بصح خرجت للبالكون عادي ماهمها في حتى واحد ..

هند:واش مزالو منوضك للوقت هذا ياك تخدمي غدوة..و زيد لابسة هاكا البرد و راكي فالبالكون لي يطلع راسو يشوفك ..

ريام:ايواا دوكا ماتبداايش شكون راح يطلع راسو باش يشوفني حتى الحرية فدار و مكانش روحي ترقدي يرحم باباك خلي الواحد مكالمي راسو ..

هند:على سبةة نتي نهدرو معاك تشعلييي ..

ريام:ماتهدرووش مانشعلش ..

رفدت البيسي تاعها و دخلت للداخل مخلية هند تشوف فيها و تستغفر من العصبية لي فيها دخلت موراها لبيتهم لقاتها ترمات على سريرها و رقدت راحت شدت بلاصتها حتى هي و جات ترقد حتى سمعتها نطقت من تحت المخدة لي كانت مغطية بيها راسها ..

ريام:واقيل راهم جايين يخطبوك هه ..

هند:علاش؟ ..

ريام:الحااجةة قاتلي الصباح كاين واحد سقسا عليكم ..

هند:و نتي ديري عليها المخلوقة الزهايمر ياكل فيها و نتي رايحة معاها فالخط ..

ريام:مكانش عندي الوقت كان شديتها و جبت الطالع بصح ماتدري بالاك صح كاش واحد جا يسقسي عليك ..

هند شافت فيها بنص عين لقاتها مزالت مدفونة تحت المخدة غير تأكدت بلي مهيش تشوف فيها سمحت لإبتسماتها انها تفلت ليها و تترسم على محياها بوضوح محاتها بزربة كي حست بروحها تحمست شوية و جاوبتها بهمس بلا ماتحس..

هند:زعما يكون هو؟؟..

ريام نحات المخدة من راسها و ناضت تقعدت في بلاصتها و هي تشوف فيها بشك من واش قالتلها صغرت عينيها فيها و جاوبتها بإستغراب..

ريام:شكون؟..

هند:احم حتى واحد..

ريام:يااه!! انا دايرتلي المواعظ الدينية على العلاقات الغير الشرعية و نتي عايشة الحيااة ..

هند:استغفر الله 30 سنة في عمري حبيتيني نتبع التفاهات هاذوو راني شاارفةةة ..اصلا بلا عمر حتى و اذا كنتي صغيرة راهو حرام ..

ريام:اممم نشووفو مالا شكون هذاا لي راهو جااي يخطبببك ..

هند:هفف ارقدي ارقديي ..

ريام:غدوة يذوب الثلج و يبااان المرج ..

هند حركت راسها بلا حول من الحصلة لي وحلت فيها معاها و غطات روحها مستعدة باش ترقد رغم انو النعاس ماجاهاش من التفكير الزايد لي استحوذ عليها حتى قرات شوية قرآن باش قدر النعاس يجيها و رحمت عقلها من التفكير و رقدت بلا ماتحس مخلية ريام مكملة تجادلها مع افكارها على واش شافت و واش عرفت حتى رقدت مام هي من كثرة ما داخت بالتخمام لي تعبها و خلاها تغطس في نومهاا ..