كلي بكلك مغرم 🩶⛓️

كلي بكلك مغرم 300 الى 310

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة301:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

الطبيبة بلعت ريقها بتوتر و حركتلو راسها بالايجاب بلا ماجاوبو هبطت راسها و راحت بزربة دخلت لعندهم لقاتهم قامو بالواجب و حضروها نحاولها حوايجها لبسولها لبس طبي دارولها السيروم و لسقولها الخيوط لي يشوفو بيها تخطيطات القلب و الحاجات الاخرى المهمة راحت لبست قفازات طبية و لبس طبي معقم و قربت ليها تفقدت حالتها و تبسمت كي لقات بلي مابقالهاش بزاف و مراحش يطولو اصلا شدتلها يديها كتشجيع ليها و نطقت تصبر فيها ..

الطبيبة:مابقالكش بزاف ريام شوية قوة برك من عندك و وليدك دوك يكون بين يديك ..

ريام:وااش نديير ماعلاباليش نسيتت واش كنتتتي تقوليليي كيفاااش نولدددد كيفااش يخرررج خلاص ماقدرتتتش عييييت ..

الطبيبة شدت ضحكتها عليها و بدات تمدلها فالطريقة و توريلها واش دير واش ماديرش الطبيبات لوخرين كانو يعاونو فالطبيبة و بداو بعملية الولادة ..

برا عند همام كان واقف قدام الباب رايح جاي قلبو نار و جسدوو ثاار مااقدرش يصبرر كان حاب يشوفها بصح فنفس الوقت ماقدرش ماحبش يشوفها هكاك و يشوفها تتوجع وهو مايقدر يدير والو حط يدو على قلبو لي كان ينبض بسرعة خيالية و راح قعد وهو يهز برجليه مع الارض بتوتر نفخ بسخط و عاود ناض كي ماحملش القعدة عاود قرب للباب حط وذنو عليه ماسمع والو كان باب عازل لصوت ماقدر يلقط حتى حاجة من الداخل ..

جوز يدو على شعرو بتوتر و رجع لنفسس حالتو رايح جاي رايح جاي حتى سمع صوت خطوات جايين جيهتو لقاه اديب فالمقدمة و هند موراه شايدة حجابها تحاول تجري باش تلحق غير شافتو واقف لتم لقات روحها سبقت اديب لي كان سابقها و وقفت قدامو وهي تتفحص فملامحو بعينيها باش تعرف جواب لسؤالها من وجهو قبل جوابو..

هند:واش راهي كيفااش راهييي علاش ولدتتت دوكاا يااك مزاال مابيها والو يااك!!..

همام:احم لا كان كاين احتمال تولد ولادة مبكرة و هاهو مابقاش احتمال و رااهي تولد دووك عندهم نص ساعة و هما لداخل مانعرف واش راهم يديرو..

هند:راهم يولدوو فيها واش حبيتهم يديرووو يعني!..احم قصدي المهم ان شاء الله فيها خير ياربي اعطيها وقفة ساهلة ياربي كون معاها ..

بعدت عليه وهي تدعي بينها و بين نفسها و راحت قعدت التوتر باين فحركاتها اما ملامحها المغطية بنقابها كانو فاضحينها داخلهاا ..همام شاف فأديب لي قرب ليه عنقو و بادلو العناق مستمد من عندو شوية طاقة ..

اديب:ان شاءالله تكون بخير ماتخافش ريام قوية و مراحش يغلبها الفهد تاعك ..

همام:ان شاءالله ان شاء الله..