كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة25:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

بقات ثواني و هي تشوف فيه بكل جدية تركب فالشِعر لي قالهولها داخل مخها و تحاول تفك شفرااتو بانلها غريب بصح فالاخير تبسمت شبه ابتسامة باهتة كي عجبتها الطريقة لي نطقو بيها وهو هايم وسط عينيها و جاوباتو و هي مهبطة راسها للارض ماعرفتش من وين طاحت عليها الحشمة هاذي و هي الحشمة و تحشم منها و من تصرفاتها ..

ريام:احم حشمت..منيش تاع رومنسية اسمحلي..

همام:امم واش درنا فيها؟..

ريام:ماعلاباليش نخمم ونقولك..

همام:وين جاية دار عمتك باش نوصلك..

ريام:لا بلاش اوبعد يشوفوني بنات عمتي يضربووني بعين ماتبقا لا نتا لا خيالك تخلاص عليا جاية نسحر فيك بعينيا باش تولي لعندي..

همام:اممم لي نفهموو انو راكي قابلة!..

ريام:لا مزال قتلك نخمم غدوة نقولك ..

همام:كيما تحبي..

ريام:اممم..

همام:خلاص روحي..

ريام:لا روح نتا قبل..

همام حركلها راسو بالايجاب بلا زيادة ولا نقصان و راح ركب فطونوبيلتو فتح التاقة دارلها اشارة بيدو و قلع بسرعة حتى تحكو الروايض مع الارض و خلاو طراسة فيها .. بعدت الغبار على عينيها ووهي مخنزرة فالطريق لي راح منها كأنها راهي تشوف فيه و نطقت بينها و بين نفسها بلا ماتحسس..

ريام:يالاطيف شبيه سيريو بزاف غير قتلو روح رااح ..كنت دايرة في بالي يقولي لا روحي نتي قبلي بااش نشووفك راايحةةة  و نرووح مرتااااح ولله مايحشم..اصلا كيفاش هااذي ماسقسانيش اذا دار عمتي فيها رجال؟؟ مايغيرش هذا!! ..اواااه بطلللت مانقبببلش ماننننقبلش بواحد ماشي غيوور نسحق واحد يغير عليا من نسما لهواا لي تقيسنيي..ولا زعماا نقبل نخرج روحي من الغرقة هاذي على الاقل نولي نستمتع بدراهمي بلا مايقولولي من وين جبتيهم ..

هزت كتافها بعدم اهتمام لكلامها و جات رايحة حتى سمعت صوت مراة تعيطلها من بعيد تلفتت تشوف شكون لقاتها جارتهم جاية تجري جيهتها عقدت حواجبها بإستغراب و بقات تستنا فيها تلحق ليها و تشوف واش تسحق..

ريام:واش كاين ناجية؟؟؟..

ناجية:يابنتيي ماصدقت شفتتك اجريي الحقيي بابااك قلبووو واقيل راهم عيطو للاسعافااات من مقبيل و هوو يحوس علييك براا اومبعد طااح دااخ ..

انتفضت لوهلة كي سمعت واش قاتلها و بقات حالة عينيها فيها تستوعب في صدمتها من الخبر هذا لي سمعاتو صح جسمها رجف و قلبها رعش وسط ضلوعها من خوفها عليه بصح في ثوااني وجيزة رجعت لحالتها الطبيعية و نطقت ببرود مخلية المراة مصدومة من جوابها ..

ريام:ربي يشفيه ..

قالت كلماتها بكل برودة اعصاب و راحت جهة الطاكسيات باش تركب و تروح بقات مزيرة على قبضة يدها مخرجة سمها فيها بعدها نطقت بهمس مبردة خوفها عليه بالكلام لي قالتو لنفسها ..

ريام:مام انا مرضت و كنت وحدي مكانش معايا! هو سبابي هاذي غير الدنيا راهي دور و كيما صرالي راهو يصرالو ..

ركبت فالطاكسي و قلع بعدما قاتلو على البلاصة لي تسكن فيها عمتها في غصون 45 دقيقة كانت وصلت هبطت و راحت لجهة دارها طبطبت فالباب و بقات تستنا يتحل الباب حتى خرجتلها عمتها لي غير شافتها تصدمت فالاول بصح عاودت تبسمت و دخلتها للداخل ترحب بيها ..

سامية:اهلااا بنت خويااا واش هاااذ الغييييةةة ..

ريام:يسلمك عمتي..جيت نطل علييك من كثرة ماتوحشتك ..

سامية:مرحباا مرحباا واش راكم واش راهو خويا و يماك و هند توحشتها ..

ريام:بابا داوه لسبيطار واقيل حبس قلبو و رجع يدق ماماتش ماتخافيش..

سامية:اااه؟؟؟ كيفااش دخل لسبيطااار وقتاااش ؟؟؟ ..

ريام:مقبيل..

سامية:و نتي كيفااش جيتي؟؟ ..

ريام:جيت موورما عرفت كان رحت لعندو بصح وصلت حتى لهنا ماكاش كيفاش نولي..

سامية:متأكدة بلي راكي مليحةة ابنتي؟؟

ريام:حمدلله علاش راني نبان مريضة؟ بالاك كي شحال عندك ماشفتيني بنتلك هاكا ..

سامية:يااربي صبرني على هاذ الطفلةة روحيي ادخلي للداخل منى راهي لتم نروح نشوف خويا و نجي..

ريام:اييه منى مناااااا انا جييت ارواحي استقبلي بنت خالك مزالت صغيرة ولا كبرت وااا منااا ارواحي..

ضحكت بهبال و دخلت تحوس عليه خلات سامية دوّح براسها ماشي فاهمة تصرفاتها راحت لبست حجابها بلخف و عيطت لراجلها باش يجي يديها لعند خوها تطمن عليه ..