كلي بكلك مغرم 🩶⛓️

كلي بكلك مغرم 174/175/176

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة174:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

♡بعد اشهر♡

خرجت من الباب و هي تشوف موراها خايفة لا يشوفها كاش واحد و هي خارجة حاطة يدها على قلبها لي كان ينبض بسرعة داخل صدرها خايفة لا يسمعو صوت دقاتو و يفييقو بيها جسمها كان كلو يترعد حتى رجعو سنانها يطقطو ببعض شي من الخوف شي من البرد ..

وقفت فوسط الساحة و دورت عينيها حواليها تفكر كلما يجيها في بالها واش راح جوز اليووم فآخر النهار تحس بقلبها رجف وسط ضلوعها من الخوف قدما حاولت تشد بكيتها ماقدرتش حتى انفجرت باكية حاطة يدها على فمها باش تكتم صوتها و مايسمعوش بلي عاودت خرجت من موور الوقت لي لازم تكون فيه لداخل ..

طلعت راسها لسماء كي حست بنقاط المطر صبو عليها و مسحت دموعها بكمام تريكوها شافت موراها تتأكد بلي ماشافها حد و راحت تجري خارجة من تم غير تأكدت بلي بعدت حبست فنص الطريق و وقفت تنهج حاسة بالنفس تقطع فيها شافت قدامها موراها على جنابها لقات غير شوية ناس برك كل واحد فدار السماء غيمت و الشتا بدات تقطر البررد يلسع و هي وسط الجو هذاك..

اصوات مشتتة تروح وجي على مسامعها صوت بكا و عياط كانت بين الوعي و اللاوعي تاعها من كثرة رجفة جسمها لي كانت فيها حست بالسرير يتحرك تحتها لوهلة ماولاتش تحس بالاكسجين يطلع ليها و فهاذ اللحظة عقلها عطالها انذار باش تنوض من وسط نومها ..

حلت عينيها بسرعة و ناضت و هي تنهج تقول كانت في سباق شهقت بقوة و تقعدت في بلاصتها تستوعب واش راهو صاري قدامها جوزت يدها على رقبتها تحاول ترد النفس و غمضت عينيها من الضو لي شعل فجأة عليها ..شوية حتى حست بيديه تحطو عليها كي حس بيها وقت ناضت بالطريقة هاذيك..

تلفتت شافت فيه و بلعت ريقها باش تبلل حلقها لي نشف عليها أما هو كي شاف حالتها هاكا عقد حواجبو بخوف عليها و ناض بزربة جابلها الماء مدهولها و هو يحكي بهدوء يحاول يهدي فيها ..

همام:شبيك ؟؟ شفتي منام ماشي مليح؟..بلعقل اتنفسي مكان والو..

حركت راسها بالايجاب كإجابة على سؤالو و بقات ساكتة مزال ماقدرت تستوعب الاحداث مليح و تفطن من واش كانت تعيش قبل لحظات قليلة ..

حطت يدها على قلبها تهدي فدقاتو لي ماحبوش يرجعو لنبضهم العادي و بقات تتنفس بقوة تحاول تنسا منامها لي يعتبر من ابشع كوابيسها و لي لطاالما تمنات تمحيه من بالها و ماتزيدش تتفكرو بصح علاش عاودت تفكرت الحكاية على شكل منام ماعرفتش..

همام بقا يشوف فيها بإستغراب ماعرفش واش يديرلها و هي فهاذ الحالة قرب ليها قعد قدامها و جبدها ليه حطلها راسها على صدرو و عاود نطق مرة اخرى بإطمئنان..