كلي بكلك مغرم 🩶⛓️

كلي بكلك مغرم 85

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة85:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

ريام كانت جاية راسمة ابتسامة ثقة على شفايفها لي كانو مرسومين برووج احمر دموي عكس لهيبو على عينيها حتى ترسمت شرارة نارية فيهم معبرة على ثقتها بحضورها فمكان كيما هذا..

كانت رايحة متوجهة لمكانها المحجوز حتى تسمع اسمها على مسامعها بصوت ماشي غريب عليها عقدت حواجبها بدهشة و رمات عينيها لجيهتو لوهلة صرات لحظة صمت عليها و عليه واحد فيهم ماقدر يعبر على لعنة الصدفة هاذي لي جابتهم لهنا ..

بلعت ريقها بصعوبة و زيرت على قبضة يدها في راسها تساؤولات حرقت عقلها باش جاوب عليهم بصح ماقدرتش ..واش جاابو هنا و كيفاش جا واش راح تقولو كيفاش راح تواجهو واش دير تكمل ولا تتراجع و خدمتها لي جات علاجالها !!..

كل الاسئلة هاذو شكلو علامة استفهام فوق راسها بصح مالقاتش كيفاش جاوب عليهم في ظل الصدمة لي كانت عايشتها و هي تشوف فيه و هو يشوف فيها يتبادلو النظرات المصدومة لبعض كأنو كان كاين تواصل بصري بيناتهم تقطع وقت جات وحدة مكلفة بالتنظيم وراتلها بلاصتها و لسوء حظها للمرة الالف كانت قدامو هو بضبط ..

المراة:انسة خيال تفضلي لبلاصتك راهي محجوزة فأول الصف..

ريام:ش .شكرا!!..

شافت فهمام لي كان مزالو يشوف فيها و راحت قعدت قدامو جيست ماتحطت فوق الكرسي حست بروحها قعدت فوق الشوك قربو منها خلاها تحس بلهيب قاعد يحرق فيها من جيهتو يديها كانو يرعشو حتى ماقدرتش تسيطر على تفكيرها و تركز فواش كانت راح دير ..

اديب مكانش اقل منهم صدمة غير شافها قدر يتعرف عليها لأنو كان شايفها من قبل شاف في خوه لقا وجهو مايتفسرش كل الوان الطيف مرسومة فيه قرب ليه شدو من يدو مزير عليه و نطق بهمس..

اديب:هدي رووحك هديي روحك ماتخليش عصبيتك ديرها بيناا مراناش وحدنا همام..

همام:راح نق..تلها!!..

اديب:اومبعددد ولله اومبعد دير واش تحببب ديرها و انا نغطي على جريمتك المهم مادير والو دووك ..

همام نفض يدو منو باش يبعد عليه و خدا نفس طويل بعدما كان حاس بالتنفس تقطع عليه شاف فيها بنص عين لقاها قاعدة على اعصابها تخبط بطالونها مع الارض وجهها صفر حاسة بالموت دخلت فيها خاصة من نظراتو ليها و هدوءو لي ماتوقعاتوش منو اطلاقاا..

توقف تفكيرها بيه وقت طلع مقدم المزاد لفوق المسطبة رافد ميكروفون في يدو و بعد التقديمات و الترحيبات لي دارهم نحا الرداء الاحمر على الاثار هاذوك و عطالهم مبلغ مبدئي باش يبداو مزادهم عليه و بداو الحضور يعطو فمبالغهم كل واحد يعطي اغلى ما يملك حتى توقف على عدد معين و بقاو يستناو فشي واحد فيهم يزيد فالسعر  ..

ريام كلما جي تنطق تعاود تسكت ماقدرش تتحرك وهو قاعد قدامها تشوف فإنقباضات عضلاتو الدالة على عصبيتو لي كان سارطها بسيف عليه ثنياتهم كانو ممثلين دور الحضور فقط همام نسا حكاية الخدمة و بقا مركز غير معاها عقلو حرقو بالتخمام و ماقدر يتوصل لحتى نتيجة..

فاق من سهوتو كي حسها تحركت قدامو و ناضت وقفت عدلت روبتها وجات رايحة عينيها يترصدو كل حركة من بعيد تخطط لواش راح دير جيست ماجات تتحرك حست بقبضتو مستوطنة يديها لدرجة صباعو ترسمو على لحمها بوضوح وعظمها تجمع مع قوة القبضة لي كان مزيرها عليها ..

هبطها ليه حتى قرب وجهو من وجهها و بقا يشوف فيها بعيونو لي كانت تقدح بالنار بلعت ريقها بتوتر و حطت يدها الباردة فوق يدو حتى تحسس رجفتها و برودتها و نطقت بهدوء مصطنع..

ريام:خليني نروح ندير خدمتي!! ..