كلي بكلك مغرم 🩶⛓️مكتملة

كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة11:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

العشرة تاع صباح كي كانت هند و راضية قايمين بالدار كل وحدة فيهم دير في حاجة وحدة تخدم فالشغل و وحدة دير فالفطور و ست الحسن تاعنا كانت مزالت مدفونة في بيتها وسط فراشها مستسلمة لنعاسها لأنو كانت راح تخدم لعشيا فقررت تستغل الصباح فالراحةة و الرقااد و هما خلاوها براحتهاا..

حلت عينيها على الاصوات تاع السوق و الدراري الصغار لي كانو يلعبو برا و نفخت بتذمر كانت حابة تزيد ترقد بصح ماقدرتش من الحس هذا ناضت رفدت فراشها خملت البيت بزربة و خرجت بعدما دات حوايجها معاها دخلت لدوش دوشت بلخف باش تفطن مليح و لبست حجابها وخيمارها دخلت للكوزينة لقات يماها لاهية مع الفطور قربت ليها و حطتلها على الطابلة شوية دراهم راحت توجد في قهوتها و نطقت بهدوء ..

ريام:مديهم لرااجلك ..

راضية:باباك هذا ..و زيد بلاش خليهم عندك شوفي نتي واش تسحقي اشريه ماعادش يحب يشدهم ..

ريام تلفتت ليها بزربة حالة عينيها فيها و نطقت بصوت شبه عالي من العصبية لي ركبت فيه مع صباح ربي على الكلام هذا لي سمعاتو ..

ريام:علااش بسلااامة؟؟؟ كي جااو دراهمي و مااشي دراهم هند واقييل!! علاش هي دراهمها فيهم العسل و انا دراهمي جبتهم من الزبل؟؟؟..

راضية:ماشيي هااكااا ياايماا على الطفلةة لي جابت كرشييي متسرعة يابنتي متسرعةةة .. قالي بالاك تكون راهي تسحقهم ماحبش الشوية الدراهم لي جيبيهم من خدمتك يزيد ينحيهملك ..راكي طفلة و تسحقيهم ..

ريام:سبحان الله دوكا جاتو يخمم فيا منيش نمدهملو حبا فيه غير مكلاه يدير شي حاجة في بالو..راني نمدهملو باش يقضي لدار باش نااكلو انا ماعنديش الوقت نروح نشري كان نروح اناا ..

راضية:مزلتي حااقدة ..

ريام:ماعندناش السكر؟..

راضية تنهدت و ناضت مقربة ليها عرفتها راهي تبدل فالموضوع كي ماحبتش جاوب عليها اصلا قهوتها موالفة تشربها مُرة يعني كي شافتها حوست على السكر عرفتها راهي تتهرب برك باش ماجاوبش ..

قربت لعندها و جبدت السكر دارتلها في كاسها تاع القهوة لي كانت شايداتو و بقات تشوف فيها بنظرات هادية مخلية ريام تغلي داخليا منها حشمت غير دير كاش حاجة تكسر القدر بيها مع يماها لي بدورها كي شافتها ساكتة نطقت بهدوء..

راضية:ياك كنتي تحوسي عليه ..

ريام شافت فيها بتحدي و شربت من الكاس دفعة وحدة على نفس وااحد رغم انها مهيش من محبي السكريات و عمرها لا شربت قهوتها بالسكر بصح فهمت الجاست تاع يماها لي دارتو زعماا قصدت بيه باش ماتزيدش تتهرب من المووضوع هذا وجاوبها بصح مع الاسف طاحت مع ريام و حتى هي عرفت كيفاش جاوبها غير بالفن بلا ماتزيد تكبر لحكاية ..

ريام:الموضوع سديناه ..

راضية:ريام..

ريام:العشية راح نطوول عندنا خدمة بزاف قوليلوو مكااش الطاكسيات ولا مانعرف واش تقوليلو الله يسهل عليه ..

قالت كلماتها بكل برودة اعصاب و راحت لبيتها دارت نقابها رفدت صاكها و خرجت و هي تضارب مع ذبان وجهها الجنون السبع راكبين فيها ماشي حاملة الهواء لي راهي تتنفس فيه لقطة صغيرة برك صرات معاها فكرتها فبزاف لقطاات صراو معاها فالماضي خلات مزاجهاا كلو يتقلب فرد مرة..

خرجت لبرا و هي تتقب فالارض بخطواتها العنيفة صوت تنفسها كان مسموع و قبضة يدها لي كانت مزيرة عليها كانت تبين انها واصلةة لأخر مراحل عصبيتها .. من كثرة الاحداث لي كانو يحومو في راسها مالقات روحها الا داخلة في حيط صلب ملمسو غريب ماوجعهاش بصح الخبطة فيه جابتلها الدوخة فنفس الوقت غمضت عينيها و زيرت عليهم تستنا في روحها وقتاش ترجع للور و طيح حتى حست بيدين تحطو على خصرها شدولها توازنها و خلاوها ترجع توقف مليح ..

حلت عينيها ببطئ حتى استواو انظارها عليه و بلا ماتحس خنزرت فيه و طبعاتو بزربة مبعدة عليه و نطقت بصوت عالي مضاربة غير مع روحها مخلياتو صافن فيها وفالشاقلالة لي كانت دايرتها مصدوم فيها ..

ريام:العماااا مرااكش تشوووففف دااخل فيااا بالميات كيلوو لي فيييك تقول زدم فياا حيييط اذا عوور دير نواظر ولا رووح دااوي يخخ على الاشكاال مع صبااح ربييي..