كلي بكلك مغرم 🩶⛓️مكتملة

كلي بكلك مغرم 🩶⛓️49

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة49:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

تلفت ليها ناظرها بنظرات ماشي مفهومة و كسيرا مقلع بأقصى سرعة حتى ترفدت و تحطت من بلاصتها بسبب السرعة القصوى لي كان طاير بيها وسط الطريق وحدو حطت يدها على قلبها من الخلعة لي ركبها فيها و بقات تشوف فيه تحاول تلقط أي لمحة من ملامحو و تفهم واش راح يدير بصح ماقدرت تفهم والو ملامحو جامدة ماتعبر على حتى حاجة ..

لوهلة جات لبالها فكرة خلات وجهها يصفار و يخضار قالت خلاص هاذي اخرتي معاه و اليوم يسموني مدفونة تحت لقبر واحد ماجايب خبري ..

بقات تتنفس بهدوء تحاول تهدي نفسها و تبعد افكارها الغريبة من عقلها باش ترتح قلبها شوية بصح كلما تشوفو دخل لطريق ماتعرفهاش تزيد تتوتر كثر و ماتعرفش كيفاش تتصرف خاصة هدوءو و صمتو المفاجئ زاد شككها فنفسها كثرر وكثر..

بعد دقايق طوااال بالنسبة ليها عاشت فيهمم حقهاا من الخووف و الذعر لي تسااراو مع عروقهاا كانو وصلو لمكان واسع محاوطاتو غابة شكلو شبيه بشي مركز كبير مايبانش واش فيه من داخل صوارو طوال مغطيين كلشي من داخل..

حبس الطونوبيل قدام بابو و هبط كان راح يدخل على اساس يلقاها مواره حتى مالمحش خيالها قدامو تلفت يشوف فيها لقاها مزالت فالطونوبيل تشوف فيه بعيون شرسة مستعدة لدفاع بأي طريقة من الطرق لمهم تنفذ بجلدها منو لوهلة جابتلو الضحك من منظرها لأنو مبدئيا فهم تفكيرها لوين داها حرك راسو بلاحول و راح فتح عليها الباب مخليها تبلع فريقها بتوتر من الموقف لي راهي محطوطة فيه ..

خدات نفس شجعت فيه روحها باش تحكي و نطقت بهدوء عكس هيجان اعضائها داخلها من التوتر ..

ريام:وين راانا ..علاش مااديتنيش لداار تكون ختي راهي تستنا فياا ..

همام:اعتبريها قاعدة تتعرفي بيها على شخصيتي..كي جيني حاجة في راسي نطبقها ديراكت بلا مانستناا ..

ريام:المعنى؟؟..

همام:يعني حبيت نجيبك هنا و طبقت واش راني حاب ..

ريام:وين رانا..

همام:اهبطيي تعرفي ..تقدري تنحي نقابك مكان حتى واحد لداخل ..

ريام هبطت من الطونوبيل و طلعت نقابها على وجهها حتى بانت حمورية خدودها من نفسها لي كانت حابساتو داخلها من كمية التوتر لي قدر يعيشهولها في ثواني قليلة فقط ..

تمشات موراه و هو قبلها يتنصت لخطواتها المتوترة قدامو تبسم على جنب من الخوف لي التمسو فيها و فتح الباب خلالها المجال باش تدخل و تستكشف بنفسها المكان لي جابها ليه ..

دخلت للداخل بانتلها مساحة كبيرة طوول وعرض فيها مخزن متوسط الحجم مغلوقة بابو و هليكوبتر لونها اخضر عسكري محطوطة فالنص تلفتت شافت فيه لقاتو ديجا كان يشوف فيها مستني منها شي ردة فعل دارتلو اشارة براسها لواش شافت و نطقت بإستغراب..

ريام:واش رانا نديرو هنا ..

همام:حبيت نعيشو تجربة فالسماء..

ريام:و الرؤية الشرعية تاع ختييي..

همام:عوضيهالها فالخطبة ..

ريام:تباانلي لازمني نبدا نخاف من الخرجات الغريبة تاعك  ..

همام:متخافيش مزال عندي خرجات اغرب من هاذو ..

ريام:ماغلطتش كي سميتك غضنفر..

همام:واش هذا ثااني..

ريام:ياك مقبيل قتلك درتلك اسم جديد يليق بيك دوكا نتا اسمك همام و الغضنفر عندو نفس معنى اسمك بصح هو اقرب اكثر من شخصيتك..

همام:وليت حيوان دوكا..

ريام:ههه راك ملك الغابة واش تزيد كثر ههه بصح حااجة مليحة تلقاا وحدةةة في حياتك ديرلك اسم على حسب شخصيتك ااه يالغضنفر دياالي اااه نورمالمون تفرح بوجودي في حياتك..

همام:اممم مليحة بزاف..استناي هنا دوك نجي..

حركتلو راسها بالايجاب و بقات تستنا فيه وين خلاها أما هو راح لجهة المخزن هذاك جاب منو زوج لي كاسك و عاود رجع لعندها دارهولها في راسها و نطق قبلما يحطو على وذنيها باش تسمعو ..

همام:هاذو باش ينقص الحس لي ديرو الهليكوبتر كي تكون تقلع ..

ريام:بصح انا جامي ركبتها كان طيح بيناا و نمووتوو..

دارلها الكاست على وذنيها و جاوبها بهدوء و هو يشوف فوسط عينيها مخليها مافاهمة والو من واش كان يقول لأنو كي دارلها الكاسك ماولاتش تسمع واش كاين حواليها ...

همام:ماراحش تموتي إلا على يدي متخافيش..