كلي بكلك مغرم 🩶⛓️

كلي بكلك مغرم 280 الى 290

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة281:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

دوب ماتلفتت للور طيحت الطرشونة من يدها لوهلة كلشي عندها توقف الاكسجين ومابقاش قادر يطلعلها باش تقدر تستوعب واش راهم يشوفو عينيها من اول نظرة عرفتها من شوفة وحدة برك قدرت تعرفها وعلاش لا وهي كبدتها لي تشوات عليها من صغرها لي تحرمت منها و خلاوها تتحرم من شوفتها و ممارسة الامومة عليها جات راح تخطي خطوة باش تروح ليها و تنهي شوقها منها حتى بلا ماتحس جفونها ثقالو عليها و جات طايحة فالارض مغمى عليها ..

اول وحدة كانت تحركت هي ريام ماحستش على روحها كيفاش حتى لقات رجليها نجرو ليها رايحة ليها بخوف رغم الحقد لي كانت حاملاتو ليهم بصح تبقى و تعيااا تخبي انها مزالت حاملة شوية شوق و مشاعر ليهم ماتقدرش تحقد حقد كلي مهما يصراا راهي يماها هي جابتها لهاذ الدنيا و ماتقدرش تعاتبها لأنو في نظرها باباها هو المسؤول على حالتها و حالتهم كامل يعني هي و هند ماعندهم مادخلهم في قراراتو الغبية لي قررها!..

قربو ليها بين زوج مخلوعين عليها تعاونو باش رفدوها و دخلوها لصالون حطوها فوق الفوتاي هند راحت جيب كاش حاجة تفطنها بيها و ريام بقات واقفة عند راسها تشوف فيها بخوف حتى شافتها بدات تتحرك و تسترجع وعيها زادتلها هند رشت عليها بارفان خلاتها تعاود تفطن مليح بلا ماتزيد تخلي الوقت يمشي ناضت بزربة و قربت لعند ريام عنقتها بكل قوتها حتى قريب طاحو بين زوج كان يتسمع غير صوت بكا راضية و هند اما ريام دمعة ماقدرت تنزلها حتى باش تمثل انها تبكي و ماقدررتش كأنو زوبعة ثلجية اكتسات مشاعرها خلاتها تتعامل بكل برود ماشي قادرة تتفاعل معاهم ..

راضية:تكويييت يابنتتتتي تكويييت بغياابك حسبي الله فلي كااان للسبب يااربي حمدلله لي رجعتلي كبدتي حمدلله يااربي لي استجبت لدعائي و ماخيبتنيش حمدلله يااااربي على النعمةةة لي رجعتهالي و ماشويتنيش فيهاا حمدلله حمدلله ..

بعدت عليها شوية و بدات تبوس فيها فكل جزء من وجهها ماشي قادرة تعبر على فرحتها بيها ماعرفتش اصلا واش تقوللها كيفاش تبررلها واش تسقسيها واش دير معاها كلماتها خانوها و ردة فعل مناسبة باش ديرها مالقاتش ..

راضية:توحشتتتككك توحشتتتك توحشتتككك حياتي ظلامت بلا بييك بعدوني عليك بسييف ياكبدتي ولله بسييف عليااا مالقيتش واش ندير ماقدرتش ندافع عليك وانا ماعنديش لي يداافع علياا ماكنتش حابة يصراا هكاك بصح مالقيتش واش ندير تغدرت كيما تغدرتي نتيي سمحييلي سمحيييلييي  ..

بعدت عليها و شدتها من يدها قعدتها قدامها و بقات تمسحلها على شعرها و على وجهها كأنها كانت ترسم في ملامحها و تتأكد من وجودها معاها بلي راهو حقيقة مسحت دموعها بسيف و عاودت حكات مرة اخرى كي لقاتها ساكتة ولا حتى انفعال صغير مادارتوش..