كلي بكلك مغرم 🩶⛓️

كلي بكلك مغرم 97

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة97:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

همام رمقها بنظرات ترعب مخنزر فيها على قسوحية الرااس لي عندهاا و راح لجهة الكوزينة مخليها واقفة تشوف فيه بتحدي حالفة ماتكرهو في حيااتو كيما راهو ناوي يكرهها في خدمتها راحت لوين راح لقاتو يوجد في قهوتو باش يتقعد مع راسو في حضور عناادها هذا لي راح تخرجو من عقلو بيه..

رفد فنجالو بعدما دار قهوة قااسحة بلا سكر و تلفت ليها دارلها اشارة بعينيه باش تخرج و نطق و هو يشوف فعينيها ببرود كأنو كان يقوللها بنظراتو اذا نتي راسك قاسح فراسي راهو أقسح منو ..

همام:اتحركي براا..عندك بزاف اموور يستناو فيك..

ريام:هي منيش خايفة بصح نظراتك راهم يبينولي بلي راح ديرلي حاجات تع..ذيبية ماشي تدريبية .. ياا سي الجنرال ماتنساش بلي راني انثى منيش راجل! ..

همام:دوك نشوفو..

ريام:واش تشوف وااش تشوف ..

همام طنشها مخليها تهدر وحدها بلا مايجاوبها و خرج لبرا جاب كرسي حطو وسط الساحة هاذيك و قعد ترشف من قهوتو بكل هدوء و طلع راسو ليها لقاها تشوف فيه بصمت مستنية منو شي أمر مفاجئ بقا ثواني و هو يبادل فيها فالنظرات الهادية كأنو كان يدير معاها فتوااصل بصري صمتي فالاخير شاف لساعتو ريقلاها على وقت محدد و نطق بصيغة امر..

همام:راكي تشوفي المربع هذا لي راهو مرسوم فالساحةة..بداية الانطلاق فيه من هاذيك النقطة عندك ربع ساعة تاع جري تحبسي قبل الوقت هذا يزيد يتاضعف الوقت..

ريام طلعت راسها تشوف فالمربع هذا لي راهو يحكيلها عليه لقاتو مرسوم فالارض مساحتو كبيرة يعني اذا جرات كل هاذ الامتار في ربع ساعة تموتلو فأول خمس دقايق مافيهاش شك  ..

ريام:ربع ساعة و انا نجري حسبتني حمار ولا وااش!!!..

همام:قلتي ماننساش بلي راكي انثى هما يجريو كثر من نص ساعة و مرات يلحقو لساعةة نتي راني رحمتك كي مديتلك نصف الوقت تاعهم..

ريام:وااووو شكرااا انقذت حيااتي ..

همام:على فكرة تقدري تنحي خيمارك هنا..رانا غير انا و نتي اليوم ماعندهمش تدريب اليوم تاعك برك..

خنزرت فيه بلا ماجاوبو و فتحت نقابها نحاتو و تبعاتو بالخمار رماتهم عليه و زادت نحات عبايتها بقات غير بسورفات خفيفة جمعت شعرها على شكل كوتشوفال و راحت وقفت فالنقطة لي قاللها باش تبدا منها غير شافت اشارتو لي عطاهالها بدات تجري بسرعة بطيئة و هي تسب فيه في قلبها على النمكر هذا لي راهو يديرو فيها..

كانو فاتو غير 3 دقايق ملي بدات حتى لقات روحها عيات ماقدرتش حتى باش تزيد تتحرك حطت يدها على قلبها و حبست شوية حاسة بذاتها مهلوكة مافهمتش علاش حطت يديها على ركابيها و حبست الجري لثواني ترد فالنفس حتى سمعاتو نطق بصوت عالي و هو يشوف فيها من بعيد ببرود ..

همام:قلنااا اذااا حبستييي يزيييد الوقتتت ..فاتووو غير خمس دقااايق بركك هاايا هاياا..

ريام:الله لا تربحك ..دييير واش تحب دوكا اومبعد انا لي ندير واش نحب..

همام:بركااي ماتمتميي لتم و كملييي شغلك خيرما يتضاعفلك الوقتتت..

خنزرت و كملت تجري و هي تصارع فالوقت وقتاش يخلاص لأنو حست بعمرها خلاصت و هو مزال عاودت حبست للمرة الثالثة على التوالي و المرة هاذي ترمات فالارض تتنفس بزربة حاسة بجسمها كلو يرعش من التعب لي حكمها ..

همام كان يستنا فيها تعاود تنوض و تكمل بصح شافها طولت و هي مرمية فالارض ناض بهدوء و قرب ليها يشوف شبيها حط يدو على خدها و جوزها عليها ببطئ حتى حلت عينيها فيه و نطقت بصوت خافت..

ريام:خلاص عييت..

همام:هاذو غير عشر دقايق تاع جري ..كي تلحقي للباقي تموتي مالا!..

ريام:علاش راك ديير هاكا..

همام:نتي لي علاش راكي تيبسي في راسك!.. كاش وحدة تخلي عيشة الراحة و الدلال و تروح لتمرميد !! حاجة وحدة طلبتها منك تبعدي على خدمتك و ماتنحيش حجابك هاذو جاوك صعاب؟..

ريام:اومبعد كي تولي تسحقني فخدمتك تندم على هاذ الهدرة..و الدلييل انوو فسرقة الاثاار اختااروني اناا باش نروح نتكلف بيهم خدمتي مهيش بالشي البسيط سي الجنرال!..

همام:مايهمش كاين البديل ..

ريام:مانبدلش بلاصتي تبقاا بلاصتيي و خدمتييي مانفرطش فيها..

همام ناض من قدامها و هو مخنز فيها و نطق بصرامة متناسي رأفتو لي جاتو عليها كي شافها فهاذ الحالة قبل ما تعاود تشعلو دااخليا و خارجيا من كلامها الاخير لي قالتو ..

همام:نوضي ..ماجيتيش باش تريحي هنا خمس ثواااني نلقااك قداااميييي واقفة!!..