كلي بكلك مغرم 🩶⛓️

كلي بكلك مغرم 🩶⛓️61

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة61:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

همام جرها ليه حتى طاحت قدامو و جبد لغطا عليهم حتى تغطاو حطلها راسها فوق يدو و اليد الثانية لفها على كرشها ظهرها جا على صدرو وشعرها تفرش جنب وجهو خلاها باهتة من تصرفو رغم انو عجبها  واش دار بصح جاها غريب لأنو اول مرة يتقرب ليها لهاذ الدرجة بإستثناء الليالي لي يدي فيهم حقو منهاا ..

بقات متبسمة و هي تستغل فلحظة الصمت لي جازت عليهم حتى قطعها عليها كي نطق بصوت هادي قدام وذنها حتى حست بجسمها قشعر من الاحساس الغريب لي زارها لدرجة انها بدات تحس بفراشات قاعدين يحومو وسط انسجة قلبها دغدغوها خلاوها طايرة وسط الغيوم وهي معاه ..

همام:مزالت حكايتك بااش ماتقولييش نسيتت ..

ريام:كنت قتلي حكاياتنا متشابهة ظهروو مهمش كيف كيف صح لي دارو بابا خلاني نحقد عليه بصح نظن الحقد هذا راهو من حقك نتاا على يمااك ..بعدما حكيتلي حكايتك ولات تبانلي نروح نسمح لبابا ههه ..

همام:هاني نستنا فيك باش تحكي..

بعدت عليه بخفة و حطت راسها على مخدتها غمضت عينيها و عاود فتحت عين وحدة باش تشوف واش راهو يدير لقاتو يشوف فيها بنظرات استغراب من تصرفها تبسمتلو بتبهليل و نطقت مجاوبة استغرابو قبلماا تغمض عينيها و ترقد لأنو صح كانت عياانة من واش جوزت الصباح معاه..

ريام:انتهت رحلتنا في كوكب الحكايات نلتقي غدا على نفس التوقيت و نفس المكان اسمحلي بصح عييتني الصباح بالطيارة تاعك مزالت فيا الدوخة تاعها تصبح على خير..

حرك راسو بلاحول من تهربهاا الدائم باش تحكي و زاد تكسل حتى هو بقا ثواني يشوف فسقف الغرفة عقلو مديه لبعيد حتى رقد بلا مايحس ..

صبااحاا و عند ريام لي بداات نهارها من العشرة تاع صباح من التعب لي كان فيها رقدت حتى خمرت مافطنت ماحست بيه كي ناض و خرج لأنو غير فتحت عينيها تفقدت بلاصتو مالقاتوش ناضت من بلاصتها و هي دير فحركات رياضية باش تصحى مليح دخلت لدوش دارت روتينها الصباحي و خرجت لبست بيجامة صيفية خفيفة تاع دار طمت شعرها طوماطيشة و هبطت للتحت على اساس انها تلقاه كي مالمحاتوش لتم حبست وحدة من الخدم لي كانت تسيق و سقساتها..

ريام:عفواا همام راهو هناا؟..

الخدامة:لا ماداام خرج الصباح بكري..

حركتلها راسها بالايجاب و جات تكمل طريقها حتى تلفتت على صوتها وهي هابطة شايدة صاكها بين يديها داير نظارتت شمسية على راسها باين كانت ناوية تخرج هبطتها من فوق للتحت بنظراتها حتى وترتها وربعت يديها على صدرها تسمع لحديثها لي بدات تمل و تكره منو ..

سراب:يااك رااجلك صرعتينا براجلي راجلي فلخر ماعلابالكش اصلا وقتاش خرج ..اصلاا كان جيتي مرااة تحاوزي كامل الخدامات هاذو و تقومي بدارك وحدك بااينة أمية و مرااحش تخرجي تخدمي اكيد...

ريام:شوووفي يااا.... استغفررر الله يااربييي ماتخلينيش نبداا نجبدلك فالباااصي تاعك علابالي رااااجلي عندو وذنين ووعينين فهاااذ الداار و إلا راني شرشمتك بين سنااني و رجعتك سيرة على كل لساان باش يشوفو امومتك لي راكي تتباهااي بيها علينا اتقييي شري راني ماشي سااهلة كيماا رااكي دايرة فيي باالك!!! ..

سراب بلعت ريقها بتوتر من موضوع الباصي لي جبدتلها عليه تقريبا من كلامها و اشارتها ليه عرفت بلي همام يكون حكالها واش دارت فيهم شافت فيها بعجرفة و هزت كتافها بعدم اهتمام مكملة طريقها لبرا بلا ماجاوبها ..

أما ريام غير شافتها خرجت راحت للكوزينة لقات 3 خدامات قايمين بيها كل وحدة فيهم واش دير غير شافوها دخلت حطو واش كان في يدهم و بقاو يستناو فيهم تأمرهم بكاش حاجة حتى شافوها طنشتهم و راحت للفريجيدار جبدت منو قرعة جو و راحت تحوس على الكيسان كي مالقاتهمش تلفتت ليهم لقاتهم يشوفو فيها كي الصنم مصدومين منها ..

ريام:شبيكم تشوفو فيا هاكا ياك لاباس!..

الخدامة:مادام ريام خلي عليك قولي نتي واش راكي حابة و حنا نديروه احسن مايزعف علينا سي همام..

ريام:مانسحقش اعطوني كاس برك و خلوني نروح بحاالي قرمدتني شيبة النار هاذيك مع الصبااح اوفف الهم هاذي وقتاش تفهم روحها و تروح..

الخدامات شافو فبعض بإستغراب و بقاو ساكتين من ملامحها عرفوها راهي معصبة راحت وحدة فيهم بزربة جابتلها كاس و سنيوة حطت الكاس فيها و شدت من عندها القرعة حطتها فيها و مدتهملها تحت طلبها خرجت لبررا للحديقة و قعدت فالطابلة لي مقابلة البيسين فرغت الجو و بقات تشرب منو و تستكشف فالطبيعة و تشوف فالاجواء لتم حتى جاها الملل جابت تلفونها و عيطتلو بقات تستنا فيه يجاوب حتى قريب كان راح يتكوبا باش سمعت صوتوو ..

همام:لهاذ الدرجة توحشتيني!..

ريام:اممم سبحان الله كيفاش فقتلييي..

همام:حسيت بييك..

ريام:ملييح احساسك في محلو مالا..نضت صبااح مالقيتكش قلت نعيط نسقسي عليك..

همام:راني فالخدمة كي نكمل نجي..

ريام:وقتاش..

همام:ممكن فلييل ..

ريام:اييه ان شاء الله ربي يقدرك ..

همام:امين ..ابقاي عاقلة و اخطيك من سراب..

ريام:اذا جبدتني تلقاني اصلا مكاشها خرجت مقبيل..المهم اناا نخلييك مانعطلكش على خدمتك تشااو اومبعددد..

كوبات عليه و بقات قاعدة لتم تشرب في عصيرهاا برواق شدت تلفونها و هبطاتو لتحت الطابلة نحات الكاش و جبدت منو بيس وحدوخرا ركبتها بلخف و عاودت جبدت تلفونها دير بيه كأن شيئا لم يكن ...