كلي بكلك مغرم 🩶⛓️

كلي بكلك مغرم 🩶⛓️52

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة52:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

كانت قاعدة بكل توتر يماها قاعدة قدامها من جهة اليسار و صحبتها من جهتها اليمين و هي في وسطهم ماشكتش فأنو دقات قلبها كانو يسمعو فيهم بكل وضوح و هما قربها مقابلينها كانو قاعدين يمات استبرق و عمتها و خالتها مرة يحكيو معاها مرة مع يماها..

جو بسيط بيناتهم كانو خالقينو هما مستمتعين بيه إلا هند لي كانت راح تزيد شوية و تموتلهم من فرط التوتر لي كان في ذاتها طلعت راسها على صوت يمات استبرق و تبسمت معاها بلطف حشمانة منها و من كلامها لي وجهاتو ليها ..

لطيفة:ظهرت عروستنا حشامة كثر ملي وصفتهالنا استبرق ههه ..

استبرق:ههه شفتيهاا ماما خياالها و تحشم منوو سعادتناا بيهاا ..

لطيفة:اييه سعادة خوك بيها ههه ..

عاودو دخلو في جو حديث ثااني حتى سمعت راضية ناصر يعيطلها من برا قاللها باش تقول لهند تخرج و تروح تهدر مع حمزة كأي رؤية شرعية عاادية دخلت تعطيلها كيما قاللها و نوضتها خرجتها للكولوار لقات باباها يستنا فيها باش يدخل معاها كان بابات حمزة خرج باش يخليهم براحتهم و حمزة كان يستنا فيها تدخل..

هند شافت في باباها قدامها ونزلت عينيها ليديها لقاتهم يرجفو بطريقة ماشي طبيعية لدرجة انها ماقدرتش تحبسهم و لا تضبط تصرفاتها كانت حابة تتحرك بصح ماقدرتش تقول رجليها جمدو مع الارض بلعت ريقها و غمضت عينيها تستغفر بينها و بين نفسها..

تحركت بخطوة جهة باباها و شدت فيدو ساندة ثقلها بيه خدات نفس طويل استجمعت فيه شتات خجلهاا و دخلت للداخل مهبطة راسها حاسة بروحها دايرة ذنب كي دخلت ليه بلا نقاب رغم انو كانت بحجابها و خمارها ساترينها و هو من حقو يشوفها بلا بيه ..

راحت قعدت فالكانابي لي مقابلو و شبكت يديها ببعض تحك فيهم بتوتر و حتى هو كي شافها متوترة زادت وتراتو و تواجد باباها معاهم زاد على مابيهم .. حمحم باش يلفت انتباهها و تشوف فيه و نطق و هو يشوف فيها بنوع من الخجل..

حمزة:السلام عليكم ..واش راكي؟؟..

هند حركت لسانها بصعوبة و نطقت بكلمات متقطعة رغم غرابتهم الا انو قدر يفهم واش قاتلو و يجاوبها بشوية راحة كي حس بروحو تطلق فالحديث معاها ..

هند:ح حمدلله ..و .ونتاا؟..

حمزة:حمدلله ..بما اني تقدمت للخطوة هاذي و جيت لداركم طالب الحلال فأني رااني سمعت بزااف عليك و بالخير الحمدلله .. ختي تحكيلي عليك دايمن بالخير و من كثرة ما مدحاتك و مدحت تربيتك و اخلاقك حبيت نتعرف عليك..

ناصر كي شاف هند بقات ساكتة جاوبو هو في بلاصتها باش ينقد الموقف ..

ناصر:مرحبا بيك وليدي احسن ماعملت كي جيت طالب الحلال ..

حمزة:ايه حمدلله ..و فالحقيقة ماعنديش اسئلة محددة نسقسيها عليهم تقريبا رانيوعارف عليها كلش ختي ماقصرتش في وصفها و مدحها ليا .. و نظن حتى هي نفس الشي ..حبيت نسمع برك الموافقة من عندها على الخطوة هاذي لي رانا نخطيو فيها ..

ناصر:الله يبارك ..ايه عندك الحق..قولي هند جاوبي ماتحشميش ..

هند:احم.. لي تشوفو فيه خير هذاك هو بابا..

ناصر:ايا مالا نقولو مبرووك عليكم بالبراكة والهنااا لعاقبة لزواج و الذرية الصالحةة..

حمزة:الله يسلمك عمي ..

ناصر:وقتاش ناويين ديرو الخطبة ..

حمزة:على حساابها هي تشوف ..انا السمانة الجاية نكون واجد ماعنديش مشكل..

ناصر:واش رايك هند..

هند:ايه عادي..

ناصر:ماالا السمانة الجاية نقولو على بركة الله ..

حمزة:على بركة الله عمي الله يحفظك..

ناض سلم عليه و هند رجعت لصالون وجهها حمر نص اعضائها حابسين مهيش تسال فيهم من كثرة حشمتها و التوتر لي عاشتو اليوم ..

استبرق:اييه قوليينا هند واش صراا واش حكيتو..

هند:والوو..

استبرق:كيفاش والو..

لطيفة:ههه خلي الطفلة بالاك حشمت ..

راضية:تفاهمتو وقتاش الخطبة ..

هند:ايه قالو السمانة الجاية..

استبرق:ايا مليح كيما كان قالنا ههه راهو مزروب السيد مبروووك علييك هننند ولله فرحتلكم بزاااف..

هند:يسلمك العاقبة ليك ..

استبرق:ان شاءالله ههه ..

لطيفة و راضية ناضو تسالمو مع بعض و زادت سلمت على عمتها و خالتها باركو لبعض و سلمو على هند لي كانت تتحرك بسيف عليها شوية من الحشمة و شوية من الفرحة لي غمرتها و شوية من التقلاق على ريام لي ماجاتش عندها في نهار كيما هذا ..

كملو قصرتهم مابين بعض حتى جا الوقت باش يروحو فيه توادعو مابيناتهم و زادو تفاهمو على الخطبة مليح هما راحو لدارهم و هند بقات مع يماها يرفدو و ينظفوو فالحالة هاذيك حتى كملو و لتم وين كانت ريام وصلت لدار ..

♡نهاية الفلاش باك♡