كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة18:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

قبل ساعات قليلة و عند ريام لي كانت راجعة لدار بعدما الشاف تاعهم سرحهم كامل لعدم وجود خدمة يديروها و بما انو الوقت كانت مزال بكري قالت نروح ندير شوبينق نشري فيه واش خصني و كيما قررت طبقت شدت طاكسي و راحت لأقرب منطقة تجارية عندهم..

هبطت بعدما خلصاتو و راحت تتمشى و تشوف فالحوانت من برا دخلت لواحد فيهم كان يبيع حجابات و ما الى ذلك شافت حجاب عجبها رفداتو و راحت تقيسو جات تنحي حجابها اومبعد تفكرت واش كانت تقوللها هند و نطقت بهمس تستحضر في كلامها ..

ريام:اييه صح ياك قاتلي بلي مايجوووزش نحيو حوايجنا فالسوق ولا فالحوانت باش نقيسو حوايج لي راح نشروهم واش قااتلي قال الرسول نسيت ..اييه تفكرت قاتلي عن عائشة رضي الله عنها سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ : ( مَا مِنْ امْرَأَةٍ تَضَعُ ثِيَابَهَا فِي غَيْرِ بَيْتِ زَوْجِهَا إِلَّا هَتَكَتْ السِّتْرَ بَيْنَهَا وَبَيْنَ رَبِّهَا ) صححه الألباني في "صحيح الترمذي" .
بصح انا مراحش نحي حوايجي كامل راني لابسة من تحت! اييه تمتم برك ربي يغفرليي ..

نحات حجابها بلخف و لبست الثاني من وازعها الديني الضعيف كان جات هند في بلاصتها كانت راح تقول حتى و اذا راني لابسة الاحسن نتقي الشبهات و نبعد على الحرام بصح هي حلت الحكاية بسلاسة و خلات نفسها عُرضة لهمزات الشيطان ليها..

بقات تشوف في روحها بالحجاب الجديد و تستعرض في جمالها قدام لمراية وقفت عن الحركة لثواني و شافت في حجابها بلعت ريقها بتوتر و حكت خدها تخمم فواش راح دير و بدون أي تردد رفدت حجابها و لبساتو فوق الحجاب لجديد عاودت دارت نقابها و رفدت صاكها غير خرجت شافت فمول الحانوت و نطقت بزربة ..

ريام:خووياا راني خليت الحجاب لداخل ماعجبنيش يعطيك الصحةة ..

خرجت بخطوات سريعة و عطات الريح لرجليها هاربة من تم و هي تضحك بهمس فالوقت لي كان لازم تحس فيه بالذنب هي كانت حاسة بالنشوة طالعة معاها مستمتعة بواش دارت و هذا ماشي لخاطرهاا و انما مرض نفسي فيهاا حتى هي ومهيش عارفة كيفاش تنحيه من قاموسها و حبت تنحيه بصح ماقدرتش الله غالب عليها ..

دخلت لبازار ثاني و المرة هاذي شرات واش كان خاصها رفدت الصاشيات لي شراتهم و جات خارجة مضاربة معاهم و زادتلها السخانة لي طلعتلها من الدوبل حوايج لي كانت لابسة وقفت فنص الطريق ترتاح و نطقت وحدها كي المهبولة ..

ريام:دوكا انا واش خصنني مافهمتش لابسة زوج حاجاباات تقول راني فالروس ياربي صبرني على بلاياا واش ندير قلبي كلاني باش نديه مع انو ماعندي ماندير بيه هفف..

عاودت رفدت صوالحها كي رتاحت شوية و خرجت من البازار هذاك بعدما كملت المشتريات تاعهاا و راحت في طريقها راجعة لدار حتى اثار انتباهها بيجوتري جديد كان هذاك وين حل مالقات روحها الا وهي رايحة تشوف فالذهب لي حاطو بإعتبارها انسانة موولعة بالذهب الابيض تعشقو و تعشق في تفاصيلو لدرجة انها كانت شارية باغوغ بأكملها بلا علم والديها لأنو علابالها كي يعرفوو راح يفتحولها محضر و هي مهيش نااقصة ..

دخلت للداخل عندو و بقات تشوف فالذهب و تسقسي فيه على ثمنو لي يشوفها يقول هاذي راح تشري الدنيا وهي بقالها غير قيسما تركب فالطاكسي و تولي لدار .. وراتلو خاتم خفيف سمكو رقيق و ألماسو صغيير عجبها و دالها عقلها و حبت تشوفو على يديها نحات قفازها و دارتو في صبعها تشوف فيه بإعجاب ..

شافت فالصياغ لي كان يرتب فواش جبدلها باش تشوف و نطقت و هي تحسب فشحال كاين من خطوة بينها و بين الباب كي لقاتها قصيرة كملت كلامها بهدوء كأنو مراحش دير كارثة بعد قليل..

ريام:خويا معليش توريلي الباغوغ هاذيك لي راهي لتم عجبتي واقيل نشريها ..

جيست ما الصياغ دخل راسو باش يجبدها هي تحركت بسرعة و جات خارجة ماجات تلحق على عتبة برا كان السيد اسرع منها و بكبسة زر وحدة تغلق الباب البراني تاع الحاونت في وجهها مالقات وين تحط كرامتها بالشي هذا لي صرا خاصة كي سمعت الراجل يهدر فالتلفون تلفتت ليه بزربة و بقات تحرك في راسها بنفي مصدومة من الزربة لي زربها عليها ماخلاهاش حتى باش تفهمو ..

الراجل:الوو شرطةةة الحقوني كاين وحدة حبت تسرقني مزالت فالحانوت عندي ..!!