كلي بكلك مغرم 🩶⛓️مكتملة

كلي بكلك مغرم 🩶⛓️58

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة58:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

♡فلاش باك2♡

كان هذاك وين خرج من الليسي شايد كورطابو بين كتافو و ورقة تاع اختبار فرحااان بيها وبالعلامة لي مكتوبة فيها بخط احمر وااضح كانت علامة 20\20 فمادة الرياضيات و هذاا بحد ذاتو حسوو انجااز وسط المأساة لي كانو عايشينها و قدر يحقق النجاح هذا خلاه فخور بنفسو و طموح باش يلحق لحلمو ..

راح لدار وهو فرحاان طالعلو المورال كان عندو شوية صرف شرا بيهم قاطو و حلوة لأديب باش يفرحو كيما كان هو فرحان وصل لدار لقا اديب فالغرفة هاذيك و يماه فالكوزينة ديرلهم فالفطور راح مد واش شرا لخوه و دخل للكوزينة لعندها و هو متبسم ورالها الورقة و نطق بثقة..

همام:شوفي شحال جبت قتلك نقدر نوصل لوين راني حاب..

سراب:غير كي جبت عشرين معنتها راح يدخلوك لأشباال الامةة اصبر جيب الباك اومبعد ساهل..

همام:ايه نجيبو علاش لا..المهم مانحبسش قرايتي ..

نحالها الورقة من يدها وراح قعد مع خوه لأنو لقاها مهيش مبادلاتو نفس شعورو ولا فرحت لفرحتو بنجاحو لي حققو ولو في حاجة وحدة .. راح قعد مع اديب وبقاو يستناو فالفطور يحضر و هما قاعدين منسجمين مع بعض حتى سمعو الباب تهد عليهم و البوليس مطاوقين الحالة خرجت سراب تجري تشوف واش كاين لقات مجموعة من الرجال داخلين عليهم واحد منهم غير شافها قرب ليها و نطق ..

الشرطي:هاذي هي دار همام المنصوري ؟؟؟

سراب:ايه علااش انا يماه؟؟

الشرطي:جانا بلاغ باش نعتقلووه فورا ..

دار اشارة لشرطي باش يروح يجيبو حتى لقاه خارج بنفسو باش يشوف واش كاين غير شاف البوليس راح يجي عند يماه وقف قدامها باش يحميها حتى جاه الشرطي شدو من يدو و خرجو معاه بلا مايخليه يفهم واش كاين ..

همام:لوين راكم مدييني وااش دررت ..

سراب:صصحح واش داار فهموونا على الاقل..

الشرطي:فالمركز تعرفي كلشي..

سراب وصات اديب باش يبقا عاقل فالدار و خرجت تجري ركبت معاهم و راحو للمركز طريق كامل و هي تحك فيديها بتوتر و دور فعينيه من و منهيه حاسة بالدعوة قراصت عليها و كيفاش تمنع ماعرفتش ..

وصلو للمركز و هبطو مع بعض داوهم لمكتب الشرطي المكلف بالقضية و دخلو للداخل لقاوه يستنا فيهم كان مهبط عينيه يقرا فالدوسي تاع همام قدامو مستغرب من المعلومات لي فيه ..

شاف فيهم كي دخلو و أمر الشرطيين باش ينسحبو بقا غير هو و سراب و همام لي كان خايف من الاجواء هاذي لي اول مرة يدخل فيهم ولا يعيشهم قدام عينيه ..

الشرطي:مادام سراب القاضي زوجة اسماعيل المنصوري؟..

سراب:ايه انا هي .. علاش جبتو وليدي للهنا واش دار..

الشرطي:راني نتأكد من صحة المعلومات لي عندي ..شحال في عمروو؟؟..

سراب بلعت ريقها بتوتر و جاوباتو بتأتأة..

سراب:خ ..خمسطاش سنة..

الشرطي:علابالك باش راهو متورط؟؟..

سراب:بب باشش.؟..

الشرطي:فالاونة الاخيرة البنك تواصل معانا علاجال انشطة مشبوهة راهي تصرا فحساب بنكي كانو يدخلو فيه دراهم بمكيات وفيرة و يّخرجو الدراهم هاذو فنفس الوقت لي دخلو فيه و مع بعض الشبهات لي لاحظوها ثاني بعتولنا بلاغ و حنا استكلفنا بالموضوع و بعدما درنا تحرياتنا كشرطة لقينا انو صاحب الحساب هذا هو همام المنصوري..و الدراهم لي كانو يدخلو ليه دراهم مشتبه فيها ناتجة عن اعمال غير قانونية و الدراهم هاذوك استعملووهم في تبييض الامواال يعني وليدك راهو مورط بكل هاذ القضايا !..