كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة4:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

في يوم عادي كيما كل الايام ناضت صباح دارت روتينها اليومي المتكرر لبست حوايجها و جات خارجة حتى شافت هند لابسة حوايجها و خارجة حتى هي، عقدت حواجبها بإستغراب فيها و نطقت و هي تشوف فيها جاية جيهتها لأنو هِند مهيش من النوع لي يخرج بزاف و معظظظم اوقاتها كامل فالدار تخرج غير كي يكون عندها حصص تاع تجويد فالجامع باش تقراا هذاا مكاان ..

ريام:راكي خارجة؟؟..

هِند:اييه ..راح نخرج مع بابا نقضوو لدار مهوش يقدر يرفد القضيان مسكين قلت نعاونو و هو يحب يخرج مع الصباح يقضي يعني نضت باش نروح معاه ..

ريام:اممم مليح ..

تبسمتلها ابتسامة غريبة و قربت ليها عنقتها و بقات طبطب على ظهرها مخليتها مستغربة منها بصح دارت في بالها بلي راهي تودع فيها بطريقتها الخاصة برك بادلتها العناق و باستها من خدودها حاسبتها كيما ختها الصغييرة رغم اختلاف السن بيناتهم مهوش هذاك الاختلاف الباين 8 سنين برك بصح من كثرة طيش و خفة ريام و رزانة هند رجعت تحسها كأنها راهي بنتها ماشي غير ختها برك ..

ريام بعدت عليها و خرجت ديراكت بلا ماتهدر معاها بقات تزرب فخطواتها حتى لحقت لطاكسي ركبت فيه و قلع أما هِند بقات واقفة مستغربة منها ضربت على يدها مالقاتش ساعتها فيها غمضت عينيها بعدم صبر و زيرت على قبضة يدها ماشي حاملة العادةة هاذي تاعها لي ماحبتش تبطلها ..

هِند: رياااااام ريااااام مراااحش تتربااااااي يعنيييي..لا حول ولا قوة الا بالله..صبر جميل و الله المستعان ياربي صبرني عليها برك..

نفخت بتذمر و بقات تستنا في باباها يجي حتى شافتو جا هبطت نقابها على وجهها و خرجو مع بعض باش يروحو يقضيو فالسوق لي قدام دارهم كانو التجار فيه حطو سلعتهم و بداو يبيعو فيها شراو مستلزماتهم الاسبووعية فقط نظرا لكمية الدراهم لي كانت عندهم قيسهم قيس رواحهم دخلو لحانوت تاع مواد غذائية و زادو شراو و راحو يخلصوو حتى نطق مول الحانوت..

الراجل:جاوك 300 الف عمي ميتين مايكفوش ..

ناصر:اه احم ..معليش نقص منهم مالا ..

الراجل:اذا تحب نكتبها فلكارني و فأخر الشهر تخلصهاا بصح بزيادة على حق التأجيل..

ناصر شاف فيه بدهشة و نفالو براسو حاير في كلامو لي قالو تنهد بقلة حيلة و قرب ليه مجاوبو بهدوء..

ناصر:اتقي الله ياوليدي هذا راهو ربا الزيادة و هو حرام في ديننا "و أحل الله البيع و حرم الربا" ..

الراجل:هذا الموجود عمي اسمحلناا ..

حركلو راسو بالايجاب و نقص القضيان دا قيس دراهمو و خرج و هو يخمم فطينة الناس هاذي لي تخدم بالحرام فاق من تفكيرو على صوت هند لي حكات وهي تحاول تسايروو في مشيتو السريعة ..

هند:الرااجل هذا فكرني فالمرة لي فاتت ..رحنا انا و ماما لعند الصيااغ باش نبيع خاتمي قالنا مانبيعش بدراهم يبدل الذهب بالذهب صدمني رغم انو علابالو بلي حراام بصح كان مكمل فيهاا الرسول صلى الله عليه و سلم قالنا "الذَّهَبُ بِالذَّهَبِ وَالْفِضَّةُ بِالْفِضَّةِ، وَالْبُرُّ بِالْبُرِّ، وَالشَّعِيرُ بِالشَّعِيرِ، وَالتَّمْرُ بِالتَّمْرِ، وَالْمِلْحُ بِالْمِلْحِ مِثْلًا بِمِثْلٍ سَوَاءً بِسَوَاءٍ يَدًا بِيَدٍ، فَإِذَا اخْتَلَفَتْ هَذِهِ الْأَصْنَافُ فَبِيعُوا كَيْفَ شِئْتُمْ إذَا كَانَ يَدًا بِيَدٍ" يعنيي الاصناف هاذي لي ذكرهم كامل حرام علينا انا نشروهم ولا نبيعوهم ببعض بصح الناس مايفهمووش..

ناصر:اييه ربي يهديهم حتى هاذو زعما لي يبيعو بالتقسيط زعما اذاا كان شرط من شروطو الزيادة هذا راهو حرام بصح كيما الناس علابالهم و مراهش مطبقين لحكم ربي ..و الموضوع هذاا راني شايفوو انتشر بزاف عند التجار و لي يشروو راهم يتبعو بررك ربي يهديهم ..

هند:امييين يارب المهم حنا نهيناهم على المنكر و نصحناهم الباقي ربي يسهل عليهم ..

ناصر:صحيتي وينما تشوفي المنكر انهاي عليه و أأمري بالمعرووف ربي و الرسول اوصاونا بالنصيحة و الرسول قالنا "من رأى منكم منكرا فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان" و في سورة النحل  قال تعالى:" ادع إلى سبيل ربك بالحكمة والموعظة الحسنة وجادلهم بالتي هي أحسن" يعني بلا مزيتنا ننصحو الضاال و نعاونوه بالاك بنصيحة صغيرة منا نكونو سبب في توبتو ..

هند:ايه صح ربي يقدرناا على فعل الخير ..

ناصر:امين..ياريت جات ختك كيما نتي ..كان مرانيش خايف عليكم كامل ..

هند:ههه خليها دوك كي تكره من الدنيا تعرف بلي مكاش طريق تديها للخير من غير طريق ربي ..

ناصر:راني خايف ماتكرهش منها و تغرها الحياة الدنيا و تنسا بلي كااين يوم الاخرة و يوم حسااب !!..

شافت فيه بنظرة كلها رهبة و ضيقت عينيها تخمم فلي قالو بلعت ريقها بتوتر و حركت راسها بنفي مجاوباتو بهمس سمعاتو غير هي..

هند:زعما؟ لالا بعيد الشر ماديرهاش !!..