كلي بكلك مغرم 🩶⛓️

كلي بكلك مغرم 108

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة108:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

بقات دقايق معدودة واقفة على نفس حالتها متكية على الحيط تتنفس بزربة و تحاول تستوعب كلامو و تتأقلم مع الوجع هذا لي راهو يزيد بين كل ثانية و اخرى زيرت على كرشها كي حست بحِدة المغص و كمشت ملامح وجهها للالم تعدلت في وقفتها كي نقص عليها الوجع هذاك و راحت لوين قاللها تشوف واش راهو ناوي يدير المرة هاذي..

راحت لساحة لقاتو قاعد فكرسي لي متوسط مسااحة الساحة الشاسعة وين يقدر يشوف كل اتجاه بعينيه عقدت حواجبها بإستغراب كي لقات معاه كلب ماعرفت منين جابو و بقات بعيدة عليه شوية ماحبتش تقرب بحضورو لتم ..

شافتو يشوف فيها بنظرات خالية من أي مشاعر ماقدرت تعرف من خلالهم ولا أي جزء من تفكيرو خلاها حتى هي تشوف فيه بصمت مستنية منو واش راح يدير..

أما هو كان دار للكلب اشارة بيديه باش يجي لعندو و بقا يشوف فيها بإبتسامة جانبية تحت طياتها كانت تحمل الشر و الخبث من جيهتها .. الكلب كان من نوع "دوبرمان" و هو من بين اشرس انواع الكلاب لكن ليس اخطرهم غير شافو نادالو جاه يجري و هو ينبح بقا يدور على رجليه و هو مخرج لسانو و يحوم عليه ..

ريام طلعت حاجبها للفوق بإستغراب و ربعت يديها على صدرها حايرة فيه و في افعالو الغريبة كيفو مافهمتش واش قصدو كي جابلها كلب قدامها وبقا ساكت يشوف فيها بدون كلام..استقامت فوقفتها و عقدت حواجبها بصدمة و هي متبعة حركة يدو بعينيها حتى شافتو بلي دارلو اشارة باش يهجم عليها شافت فيه بمعنى منيتك و نطقت بصوت عالي نظرا لبعد المسافة القليلة بيناتهم ..

ريام:رااك منيتك! راح تخوفني بكلب؟؟..

همام:نتي الكلاب و تخاف منك ..

ضحكت بتحدي و حركت راسها بالموافقة متوافقة مع كلامو بكل تواضع ..

ريام:في هاذي ماكذبتش..

تبسمت بإستهزاء و جوزت طرف لسانها على شفايفها ببطئ وهي تلاحظ فالكلب لي كان مستعد باش يجي يجري جيهتها طلعت يديها جمعت شعرها بهدوء باش مايقلقهاش و ركزت عينيها مع عينين الكلب لي انطلق بسرعة و راح يجري ليها غير شافتو تحرك تحركت حتى هي رايحة بنفس اتجاهو تجري و تعيط ..

الكلب ماعرف باش تبلى كان ناوي يهاجمها حتى قلبت عليه الطابلة و رجعت هي تهاجم فيه ماعرف ينبح ولا يعيط وهو يشوف فيها جاية تجري جيهتو حتى رجع قلب الدورة و راح هارب منها مخلي همام حال عينيه بصدمة من الكارثة لي راهي قدامو ماعرفهااش باش مصنووعة حس روحو راهو مع وحدة مهبولة مقطعة كوارطها حتى مع الحيوانات ماشي غير مع الناس!

حرك راسو بلا حول و حط صباعو على جبهتو يمسد فيها بقلة حيلة اما هي جات وقفت قدامو و رمقاتو بنظرات تحدي خلاتو يبلع ريقو من حدة نظراتها لي بثتتهم فيه تبسمت على جنب و عاودت طلقت شعرها الاصفر على كتافها مخلياتو متبع معاها حركاتها كي المشلول..

ريام:ياك قتلك ماتتحدانييش..راني لبوؤة بسبع سبوعة يالغضنفر دياليي ..!!