كلي بكلك مغرم 🩶⛓️مكتملة

كلي بكلك مغرم 137

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة137:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

همام بقا يشوف فيه بنظرات خالية من أي ردة فعل حتى وترو من نظراتو ليه لأنو حس بلي فاقلو و مهوش غبي باش يفهم بلي جا علاجال هند ماشي علاجال شي ثاني تبسملو بتبهليل و بدا يرجع بخطوات للور كي شافو راهو يقرب ليه بخطوات بطيئة ملامح هادية ماتعرف على واش راهو ناوي بيهم حبس الخدامة لي كانت داية الفاليزا للفوق و شدها عليها راح حطها قدامو بهدوء و نطق بنبرة هادية عكس اعصابو لي راهي فايرة داخلو..

همام:ارفد قشاوشك و طير منا عليا..

اديب:ماحبيتهاااش منك راك تحاوز فياا؟؟؟؟..

همام:افهمها كيما حبيت نهار تكمل الطفلة ضيافتها ارواح عيش هنا اذا حبيت..

اديب:وشمن طفلةة هااذي راك تظلم فياا ..

همام:ماتخليينيش نخسر معاااك اديييب!! رااك تشوووف فيا حمار بلا وذنين!!!! ياااك رحت خطبتها و ماقبلتش علاش مزلت تجرييي موراهاا!!..

اديب:نهار تشوف السماء انطبقت على الارض لتم اعرف بلي اديب ماولاش يدير لي فراسو و يدي لي حاابو!..

همام:لا حول ولا قوة الا بالله..شوووف تلحقني كااش هدرة هااك ولاا هااك ماتلووم غير رووحك !! ..

اديب:متخاافش خوك قادر على شقااه ..

عاود رفد فاليزتو و طلعها للفوق و هو يدندن مع روحو راشقتلوو وطالعلو المورال دخل لبيتو و ترمى على الفراش لتم مخلي تبسميتو شاقة تفاصيل وجهو من الطرف لطرف بقا دقايق و هو ساكت يتنصت لأفكارو فالاخير نطق بهمس..

اديب:مافهمتش علاش غير هي لي جرجرتني هااكا انااا غير نشوف فيهم يجوو يجروو موراايا ميتين عليا هاذي انا رحت ليها و رفضتني ااه ياهندووش اه ماتعرفيش صلاحك ..معليش بصح غير نتي لي تقبلي بياا مزاال الحال برك..

فجهة اخرى ماشي بعيدة عليه جيست فالبيت لي كانت مقابلاتو كانت هند و ريام قاعدين قدام بعض يحكيو مابيناتهم على الاحداث تاع قبيل هند شافت فريام لي بقات ساكتة تخمم فشي حااجة ياادرا واش هي و نغزتها بيدها باش تفيق..

هند:الوو راني معاك..

ريام:هاا واش قلتي..

هند:قتييلي فراوها بصح ماقتيليش كيفاش..

ريام:جا اديب ..و همام مايحبش يتناقش مع يماه فحضورو طلع و خلاهم..

هند:يعني راهو هنا؟؟..

تلفتت شافت فيها بنص نظرة و صغرت عينيها فيها ناطقة بشك..

ريام:شكوون..

هند:احم ..خلاص والو..

ريام:قصددك اديب ماانعرف ممكن يكون مزالو هناا ..

هند:روحي شوفي على الاقل مانخرجوش هاكا قدامو ..

ريام:مانخرجوش؟؟..

هند:قصدي بلا نقااب..

ريام:اه ايه..

حركتلها راسها بالايجاب و ناضت رايحة تشوف اذا راهو هنا ولا راح مافكرتش فواش كانت تفكر هند لأنو نسات كامل موضوع النقاب و عندها هي شخصيا عادي لو تظهر قدامو بلا بيه لأنو اصلا شافها من قبل فالمزااد بصح راي همام فالموضوع هذاا ماعلابالهاش كيفاش راح يكون خاصة بعد اصرارو عليها باش ماتنحيهش و تبقا بيه يعني كان عندها شك فأنو مراحش يقبل و زاد أكدهولها كي تلاقات كي كانت خارجة و هو داخل للبيت وقت شاف فيها بصرامة و نطق بحِدة..

همام:هذا منظر خارجة بيه و اديب راهو هنا؟؟