كلي بكلك مغرم 🩶⛓️مكتملة

كلي بكلك مغرم

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة15:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

في جهة اخرى و عند ريام لي كانت في خدمتها لاهية مع صحبتها يحكيو مع بعض كانو هذاك وين كملو مهمتهم لي تكلفو بيها من عند الشاف و رجعو من مشوارهم الطويل نوعا ماا فبقاو يرتاحو حتى يلحق الوقت لي يخرجو فيه و يروحو لديورهم ..

بعدما فات شوية وقت سمحلهم الشاف باش يخرجوو خرجو مع بعض و بعدها كل وحدة فيهم شدت طريق لدارهم ريام ركبت فطاكسي و وصلهاا حتى لحومتها هبطت بعدما خلصاتوو و راحت تتمشى بخطوات بطيئة من التعب لي كان نال عليها من كثافة الخدمة لي خدمتها هاذ العشية و زادت جات فوقت متأخر شوية يعني العياا لي كان فيهاا عالم بيه ربي ..

طلعت راسها صدفة جات ديراكت في عين رجل كان مقابلها متكي على طونوبيلتو يشوف فيها بكل هدوء كأنو كان حافظ التوقيت لي ترجع فيه لدار و بقا يستنا فيها جي ..

ريام غير شافتو بلعت ريقها بتوتر و زيرت على طرف حجابها بين يديها عينيها بقاو مركزين عليه متأهبة لأي حركة يديرها عكسها ماكانتش صعيبة عليها باش تعرف انو هذاا هو نفسو لي قومت الحالة الصباح معاه و انوو هذااا هوو بالذااات لي سرقت منو البيسي لأنو بعدما تفارقت معاه صباح بقات في جدال مع عقلها تتفكر وين شافتو حتى تفكرت حكاية الفيلا و البيسي لي داتوو و عاودت رجعاتوو ..

من حضوورو المتكرر قداام انظارها حست بالخطر يحووم علييها ماعلابالهاش علاش باش جاها احساس بلي فاق بيها و راح ينهيلها حياتها مافيهاش شك و هذاا شي طبيييعي و متوقع جداا من واحد مكانتو مرموقة فالمجتمع و جنراااال و ماا ادرااك ماجنراال هي راحت خربت فيه مكفاهاش انها سرقتلو ممتلكاتو زادت ختمتها بلي دارتو صبااح يعني مجال ولو صغير باش يسامحها و مكانش..

تحركت بسيف كي حست بروحهاا طولت فالوقفة و هي تشوف فيه و هو يشوف فيها يتبادلو النظرات من بعيد كأنو كان كاين تواصل بصري بيناتهم هبطت راسها بزربة و كملت طريقها تمشي بسرعة حابة تلحق لدار بأسرع وقت و ماتخليش المجال للقاءهم مرة أخرى بصصح السي همام كان عندو رأي اخر و فلمحة البصر لحقها فخطواتها حتى رجع هو قبلها قطعلها الطريق بجهامتو ونطق بهدوء بصح رغم هدوء نبرتو الا انها التمست القوة و العظمة في صوتو ..

همام:اصبريي!..

ريام:احم! اا سي مانعرف واش اسمك شفتك زياراتك كثرو هناا هاذي ثاني مرة نشوفك فيها في حومتي..

همام:غلط ..هاذي رابع مرة.. زوج مرات جيت فيهم ماحالفنييش الحظ باش نشوفك بصح المرة هاذي ماخليتهاش للحظ انا صنعت حظي بيديا و تلاقيت بيك بسييف عليك..

ضغط على اخر كلمات قالهم تحت سنانو و بقا يشوف في ملامحها و نظرات عينيها لي كانو يتبدلو بين كل ثانية و اخرى تبسم على العجز لي قدر يصنعو فيها و بقا مستني منها جوابها أما هي حست بالدعوة حماضت عندها حتى باش دافع على روحها ماتقدرش و هي مقابلة راجل يسوا قيس 4 رجال جسدياا برك أما من جهة القوة ماكلفتش روحها باش تخمم فيها لأنو بظفرو برك قادر ينفيها ..

خدات نفس طويل و زفراتو لبرا بعدما حبساتو داخلها لثواني معدودة رمشت بعينيها عدة مرات الشي لي خلاه يتعدل في وقفتو لي اختل توازنها بالحركة لي دارتها بدون قصد منها و جاوباتو بهدوء مصطنع ..

ريام:علاش واش تسحق من عندي باش راك مولع بلقائي؟؟؟..

همام:امم عندك ذااكرة ضعيفة مالا..بلخف نسيتي واش درتي الصباح؟؟..

ريام:جيتني في سااعة ناقصة كنت مقلقة برك ..بصح بعيداا على الشي هذاا ..الحطة تاعك و الطونوبيل ماتبانش بلي نتا تاع البلايص هاذوو ..

همام:امم صح ..انا خداام فالدوولة جيت لهنا باش نحوس على وحدة سرقتني و القدر لاقاني بيك..

ريام حلت عينيها بصدمة بشكل مصنطع بلا ماتبين فيه ولا ذرة تمثيل حتى خلاتو يصدقها من صِدق كلامها لي مانعرف منين جابتو..

ريام:ااا تخدم فالدوولة و سرقوك شكون عندو الجرأة ماخافوش على رواحهم اذا تحب نعاونكك مكاش مشكل انا نعرف تاع الحومة هنا واحد بوااحد نجيبلك السراق حتى لعند رجليك..

همام:امم تباني قافزة الله يبارك من عينيا لي قريب رزيتيني فيهم عرفتك قادرةة على شقاك ..

ريام:ههه اسمحلي ..تبانلي راك مليح ماخصك والو ..

همام:حمدلله..مالا قلتي تعاونيني؟..

ريام:اييه ولله نعاووونك مكااش مشكل ..

همام:لي سرقتني وحدة يعني مراة..

ريام:اييه..زييد؟

همام:منقبة! زعما ماتكونش نتي؟

نقف هنا حطولي ارائكم على الحلقات لي قريتوهم 💕💕💕