كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة14:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

♡فلاش باك♡

كانت فالجامع قاعدة مع صحبتها يراجعو مع بعض فواش راح يعرضو للاستاذة من اوجه تاع حفظ كملو مراجعتهم و راحولها بين زوج عرضولها المحفوظ و خرجو مع بعض راجعين لدار هند كانت راح تودعها باش تكمل طريقها لدارهم حتى شافتها شدتها بسيف و بدات جر فيها باش تديها معاها لدارهم ..

استبرق:هندووش هاياا معايا لدارناا نمدلك الكتب لي قتلك عليهم و نقصرووو شوية و رووحي ماراحش نشدك بزااف ..

هند:لا بلااش الكتب جيبيهملي المرة الجاية كي نجو للجامع تعرفيني مانحبش نروح لديور النااس و نقلقهم ..

استبرق:ديرو النااس؟؟ انا ناس!! صحييتي ولله صحيييتي..

طلقت من يدها و راحت مخليتها واقفة تشوف فيها وهي عاضة على شفايفها من الموقف لي حطتها فيه من كلامها لي قالتو و من ردة فعلها عرفتها زعفت منها ومن حقها تزعف في نظرها لأنو قالت كلام ماينقالش لوحدة تعتبرها رفيقة دربها و انيسة وحدتهاا و مهيش غريبة عليها و هما من بكري و هما صحابات ..

عضت على شفايفها بخفة و راحت بخطوات سريعة ليها شدتها من يدها و كملت تمشي معاها بنفس الخطوات رايحة لدارهم معاها استبرق شافت فيها بنص عين و بقات ساكتة حتى نطقت هند ملطفة الموقف ..

هند:ايواا خلاااص هااني جاية معااك ..

استبرق:قولييها من الاول ياختي تقول رااح ناكلووك عاادي ..

هند:الصرااحة مانحبش نجي معاك لداركم علاجال خوك نحشم منو و بالاك هو مايعجبوش الحال..

استبرق:بوه علياا خويا مهوش سامع بينا كامل هايا هايا نروح نديرلك برااد اتااي و نقعدو نقصرو مع بعض..

تنهدت على اصرارها و راحت معاها دخلو للداخل مع بعض لصالون و قعدو يحكيو هند من حشمتها بقات قاعدة بنقابها حشمت حتى باش طلعو رغم انو كانو غير هما الزوج لتم حتى جات استبرق ليها و نحاتهولها بسيف باش نحاتو ..

استبرق:نتي خيالك و تحشمي منوو ههه خودي راحتك الداار داركمم نروح نوجدلك لاتاي و نجيك..

هند:بلااش ماتخلينيش وحدي هنا ..

استبرق:يابنتي هاني جاية منيش هاربة..

هند:مااطولييش..

استبرق خرجت و هي بقات لاهية مع تلفونها تلف فالوقت بيدما تعاود ترجع صحبتها طلعت راسها على صوت الباب لي تفتح في بالها استبرق رجعت حتى تتصدم بالصوت الرجولي لي سمعاتو كان باين هذااك وين ناض من النعاس و الشي هذا كان باين من شكلو المكرفس كامل ..

ماجات تستوعب صدمتها لقاتو دخل للداخل و هو يعيط بإسم استبرق شاف فيها و حل عينيه مليح باش يفطن من نعاسو خاصة كي شاف وجه جديد عليه جامي شافو حتى فالحومة ..

حمزة:استبررق ويين درتي الشارجور تاع.......

قطع كلامو فالنص كي وضاحتلو الرؤية مليح بلي هاذي مهيش ختو خاصة كي لقاها تشوف فيه بصدمة حالة عينيها على وسعهم جامدة في بلاصتها الدموع تحجرو فيها و ماعرفتش حتى كيفاش تهبطهم حك شعرو بإرتباك و عاود خرج بزربة يستوعب فواش صرا قبل لحظات طلع راسو في ختو لي جات تجري كي شافتو واقف قدام باب الصالون و نطق بحدة..

حمزة:علاش ماقتيليش بلييي كاين ضياااف!!!! ..

استبرق:ماتقوليييش بليي دخلتتت للدااخل اييي الطفلة داايرةةة نقاااب و نتاا زادم عليها كي الجحش ماتعرفش تصبر شويةةة انااا اصلا بسييف باش قنعتها و جبتها معاياا دووك تحلف ماتزيد جيها لهنااا اوففف اوففف...

طبعاتو و دخلت لعند هند مخلياتو واقف يحك في لحيتو يخمم في كلامها و فلي صرا معاه مع الطفلة هز كتافو بعدم اهتمام و عاود رجع لبيتو مطنش لحكاية كاامل على عكس هند لي كانت راح تزيد شوية و تموتلها لداخل ماتقبلتش فكرة انو كاين راجل شافها بلا نقاب رفدت نقابها و بدات دير فيه و يديها يرعشو حابة غير تغطي روحها و تخرج من هنا ماتزيدش تبان قدامو كاامل ..

استبرق:يااطفلةةة اصبريي شبيك هااربة ماشاافكش ملييح كان هذاك وين ناض ماديريي والو في باالك ..

هند:ماندير والو في باالي؟؟ كااين راجل شافني بلا نقااببيييي حلييلي الباب خليني نرووح ..

استبرق:ولله ماتخرجي حتى تتكالمااي .. غلطةة برك ماصراتش بلعاني يااك ماراحش تتحاسبي علييهاا ..ياك ربي قالنا "ربنا لا تؤاخذنا ان نسينا او اخطئنا" و الرسوول صلى الله عليه وسلم قالنا : "إن الله تجاوز لي عن أمتي الخطأ والنسيان وما استكرهوا عليه." خلاااص ماصرااا والوووو..

هند غير سمعت واش قاتلها هدات شوية راحت قعدت قدامها بصح بقات بنقابها ماحبتش تنحيه بعد لي صرا استبرق كي شافتها هدات تنهدت براحة و قعدت حتى هي مكملة كلامها بتمسخير..

استبرق:هفف حمدلله لي هديتي خلعتيني ولله ..

هند:غير اسكتي اول مرة نتكشف على كاش راجل من غير محارمي ..

استبرق:اممم وبالاااك حتى هوو يولي من محاارمككك هههه .. حتى خويا عاازب و خصاتو مرااة ..

هند:احشميي ..

استبرق:علاش نحشممم ولله صح اومبعد نقولو علييك السيد خداام وعندوو داروو يبني فيهاا يعني كل مؤهلات الزواج فيه وفييك نتي تان ..

هند:اوفف استبرق اسكتي ولا خليني نروح ..

استبرق:يووو حشمتييييي ههه خلاص خلاص الهدرةةة معاه هوو ماشي معاك نتي تقبلي بسيف عليك و تولي مرت خوياا و انا اللوسة الشريرة ههه..

هند:ههه استغفر الله ..

كملو يحكيو مع بعض و اغلب حكاياتهم على حمزة استبرق حلفت الا تسكت عليه حكاتلها على حياتو كاملة واش قرا و واش راهو يخدم شحال في عمرو و كيفاش يتعامل مع والديه الحاصول مدتلها السيرة الذاتية تاعو الشي لي خلا هند تدخل فالجو هذااك و تحب تعرف اكثر عليه حتى بلا ماتحس لقات روحها تسقسي فيها على حياتو اكثر و هي جاوب فيها بكل سروور متحمسةة لعلاقتهم ببعض كيفاش راح تكوون..