كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة13:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

في جهة اخرى و عند هند لي كانت توجد فالطابلة تاع الفطور باباها كان هذاك وين دخل فراحت تحط الفطور باش يفطرو مع بعض كانت متوترة لأسباب هي و كانت جاهلتهم ماعلابالهاش علاش بصح رعشة خفيفة كانت تتسارا في جسمها كلما تتفكر بلي ريام قاتلها بلي كاين خطابة سقساو عليك رغم انها ماحبتش تصدق الموضوع بصح تفكيرها يديها ليه بلا هواها ..

كملت وجدت الطابلة و حطت الفطور اجتمعو كامل فيها و بداو يفطرو بهدوء الصمت هو سيد الموقف..

هند كل دقيقة طلع راسها في باباها تستنا منو كشما يقول على الموضوع هذاا بصح مااقال والو و باينةة بلي مكانش ناوي يقول لأنو اصلا ماعلابالو بوالوو ..

طلعت راسها فيه بزربة كي سمعت تنحنيحتوو دليل على انو راح يهدر و من ملامح الحماس لي اكتساو وجهها عاودو ترخفو و جاو في بلاصتهم ملامح عادية من الكلام لي سمعاتو منو لأنو كان عكس واش كانت حابة هي..

ناصر:اليوم ثاني خدمت ريام؟؟ الصباح ماشفتهاش ناضت باش تروح تخدم..

راضية:ايه مقبيل لي راحت ..خلاتلك دراهم باش تقضي بيهم ..

ناصر:ياك قتلك ماتزيديش تشدي عليها لي عندي يكفوني باش نعيّشكم حمدلله ماخصنيش بنتي تخدم عليا ..

راضية:قتلها ماحبتش شدهم عليها و اسكت الطفلة راهي تخمم عكس واش راك تخمم ..

ناصر:علاش واش راهي تخمم؟؟..

راضية شافت في هند لي هبطت راسها كي فهمت واش قاتلو و عاودت شافت فيه بنظرات هادية مجاوباتو ببرود ..

راضية:والو..كمل فطوورك و روح للجامع راهو قريب يأذن الظهر ..

ناضت من تم قبلما يجاوبها مخلياتو يشوف فيها بصمت فهم كلامها و فهم مليح موقفها منو بصح ماعندو مايعلق علييه الحكاية صرات و خلاصت و ماباليد حيلة باش تتصلح الامور بقا ثواني قاعد يستوعب فالاخير زاد ناض حتى هو كي حس بالشهية انقطعتلو خلاو غير هند قاعدة وحدها فالطابلة تشوف في حالتهم لي يوصلولها كلما يجبدو على موضوع ريام ..

تنهدت بقلة حيلة و زادت ناضت مام هي فرزت الحالة رفدت الماعن غسلتهم و دخلت لبيتها بعدما توضات و صلات الظهر كملت صلاتها و تكات على الحيط تشوف فنقطة وحدة مخلية عقلها يدي و يجي فيها بزاف افكار داهموها و خلاوها تسرح لبعيد تبسمت ابتسامة خفيفة و نطقت بهمس مخاطبة نفسها..

هند:زعما يكون يخمم فياا كيما راني نخمم فيه؟؟ ياربي راني بعدت على الحراام باش ترزقني بيه فالحلال ..ياربي ارزقنيي بيه و ماتخليش قلبي معلق بيه هاكا ..

تنهدت بقلة حيلة و حطت راسها على سجادتها غمضت عينيها و خلات المجال لعقلها يديها لبعيد و هي تتفكر فأول لقاء بينها و بينو و كيفاش حتى بقا عقلها عالق فيه هوو برك كأنو مااكاش رجاال غيروو فالدنياا ..

♡ فلاش باك♡