كلي بكلك مغرم 🩶⛓️مكتملة

كلي بكلك مغرم 270 الى 280

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة271:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

♡فلاش باك♡

كانو فالطونوبيل ماشيين بسرعة فائقة بعدما داوها من عند والديها و فوتو طريقهم تحت انغام بكاها و ترجيها ليهم باش يرجعوها لدارهم بصح هيهات شكون سمع بيها ..وصلو لواحد المكان كبير شبيه بشي مركز فوحدة من اللافتات تاعو كانو مكتوب عليها هيئة حماية الطفولة حبست الطونوبيل فالباركينڨ لي لداخل هبطت منها المراة اولا بعدها هبط الراجل أما ريام غير شافتهم حبسو و هبطو تكمشت في بلاصتها و بقات تحرك فراسها بنفي خاصة كي شافت المراة هاذيك فتحت عليها الباب و شدتها من يدها جبدتها لعندها باش تخرجها ..

ريام:مانجييش مانجيش ادوني لعند ماماا رجعوني لداارناا ..

المراة:راح يعجبك الحال هناا خيير هاياا برك كاين بناات قدك راح يلعبو معااك ثاني هايا هايا..

ريام:مانجييييش خليييني نرووح مانلعبش معاهم نلعب مع ختتتي بعدينييي مااااماااا ..

المراة هاذيك خنزرت فيها و شدتها من يدها بقوة جرتها معاها للداخل و هي تبكي و تعيط على طوولها حتى حلوقها خرجو و دمعو حلفو ما يحبسو داتها معاها لواحد من البيوت لي لتم و حلت الباب كان كاين اصوات بزاف اصوات طفولية لولاد صغار اعمارهم يتراوج من 8 سنين ل15 سنة كأحد اقصى..

غير دخلت هي كااامل سكتو و بقا يتسمع غير صوت بكاء ريام لي حتى هي غير شافتهم كامل حبسو فواش كانو يديرو ووبقاو يشوفو فيها زادت من حدة بكاها و بدات تضرب فيد المراة باش تطلقها و تخليها تروح ..

ريام:خلييينيييي نرووح رجعووونييي لعند مااماااااا و ختتتييي خليينننيي نحي يديككك علياا مانقعدش هنااا رجعوونيي لداارنااا ..

مراة:شوفي هاهم صحاباتك جدد راح تحبيهم و راح يحبوك " قربت لوحدة من البنات لتم نحاتلها اللعبة تاعها و مدتهالها " هاه شوفيي منال هاهي عطاتلك لعبة تاعها باش تلعبي معاها شفتي شحال تحبك ..

منال:مانحبهااش رجعيلي اللعبة تاعيي..

المراة خنرزت فيها و رجعتهالها كي شافت ريام ماشدتهاش و ماداتهاش فيها اصلا شدتها من يدها و داتلها جهة سريرها قعدتها عليه و نطقت بتحذير وهي رافعة صبعها السبابة فوجهها ..

المراة:شوفيي راح تبقااي عاقلة بلا مشااكل يااك فهمتتتي كان ديري كاش حاجة راح تتعاقبي و ماتروحيش تتعشااي اليوم تفاهمناا!..

بلا ماتزيد معاها الهدرة راحت وخلاتها معاهم بعدما عاودت غلقت الباب عليهم مخليتهم يتلمو على ريام كاامل و هما يشوفو فيها حابين يتعرفو عليها وحدة منهم كانت تقريبا فنفس عمرها أو اكبر منها بعامين كي شافتها تبكي قربت ليها و طلعت معاها لفوق سريرها عنقتها و نطقت بهمس طمن فيها ..