كلي بكلك مغرم 🩶⛓️

كلي بكلك مغرم 86

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة86:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

همام زاد عقد حواجبو كثر من جوابها الغريب و بقا ساكت من كثرة صدمتو لي طاحت عليه طلقها و خلاها تروح مافهمش وشمن خدمة قصدتها في كلامها هو اصلا مكانش فاهم واش سبب حضورها هنا بالشكل هذاا زادت غلقت عليه بواب الوضوح بالجواب الغريب لي عطاتهولو..

بقا متبعها بعينيه حتى غابت عليه و ناض خارج وقف معاه اديب متبعو فخطواتو حتى خرجو لبرا كان ناوي يهدر معاه حتى لقاه رايح ديراكت لجهة الطونوبيل اسرع فخطواتو حتى لحقو و نطق بإستغراب..

اديب:وين رااك راايييح!!!! ..فهمني واش كان صاري لدااخل!؟؟؟..هاذييك مرتتك ولا ماشي هييي فهمني مااراني فاهم والووو ؟؟؟..

همام تلفت خنزر فيه ماشي حامل سيرة الموضوع هذا و طلع فطونوبيلتو بلا مايجاوبو كسيراا بأقصى سرعتو حتى ترسمو روايض تاع الطونوبيل فالارض و قلع مخلي غير الغبار موراه حابب ينفرد بعقلوو و يتناقش نقااش منطقي معاه يفهم واش كاين باش يعرف كيفاش يتصرف منا وجاي..

اديب بقا يشوف فيه حاير واش يدير حتى غبر على عينيه نفخ بعدم رضى على لي صاير و زاد راح ركب حتى هو و راح تابعوو خايف لايدير كاش حاجة و هو بهاذ الحالة هاذي ..

ريام كانت مزالت لداخل غير كملت خدمتها خرجت من الغرفة لي كانت فيها و عاودت دخلت للقاعة لقات غير شوية ناس برك لأنو المزاد كانو اعلنو على نهايتو بقات تحوس عليه بعينيها مابانلهاش لتم عقدت حواجبها بإستغراب و خرجت لبرا تشوف اذا تلقاه فلخر مالقاتو لا هو لا طونوبيلتو عرفاتو يكون راح ..

بلعت ريقها من الفكرة لي تغلغلت لأعماقها و نفخت بعدم ارتياح اول مرة تخاف لهاذ الدرجة ماعرفتش واش صرالها ممكن يكون لأنو خافت تخسرو ولا لأنو قلبها تحرك من جيهتو الفكرتين هاذو بذات ماحبتش دخلهم لراسها و لا تتقبلهم عضت على شفايفها بقوة و نطقت بهمس بينها و بين نفسها..

ريام:علااااش راكي خايفة دوكا مافهمتش حتى و اذا بعد عليك واش دخلك!! كأنو موالفة بيه في حياتك..مستحيل نكون حبيتو مستحيييييييل..

راحت ركبت فالطونوبيل لي جات فيها و قلع الشوفور مرجعها من وين جابها حتى وصلها للمصنع هبطت و خبطت الباب موراها معصبة غير مع روحها..

دخلت للداخل لقات منال تستنا فيها غير شافتها قربت ليها بزربة متحمسة تحكيلها واش صرا ..

منال:ارواحييي احكييلي واش صراا كيفاش فريتيييها الاثاار راهم لحقو قبلك ههه ماينخافش عليييك الشاف راهو ميت بالفرحة ..

ريام:روحي بعدييني غير مكلاه جو تهدرو معايا..

منال:علاش واش صراا..

ريام دخلت لوحدة من الغرف و بدات تمسح فمكياجها حاسة بعصبيتها متمكنة منها من الموضوع هذاا لي دخلت روحها فيه مع همام لأنو حرفيا ماعلابالهاش كيفاش راح يتعامل معاها و كيفاش هي راح تتعامل معاه بخصوص واش صرا مقبيل !!..

منال كانت داخلة ليها تشوف شبيها لقاتها تنحي فالروبة بجهالة شوية و تقطعها عاودت خرجت خلاتها وحدها لأنو من منظرها عرفتها مهيش في حوالها و قادرة تخّسر معااها فهاذ اللحظة..

أما ريام لبست حجابها ودارت نقابها رفدت صاكها و خرجت بلا ماتحكي مع حتى واحد خرجت برا و بقات واقفة تخمم واش دير حرفيا حارت ماعرفتش اذا تروح لدارهم و تهرب بجلدها منو ولا تروح ليه و تواجهو بقات دقايق و هي تفكر فالاخير قررت و كقرار اخير خمت فيه نطقت بهدوء تشجع في روحها ..

ريام:نرووح ليه و خلاص واش راح يدير زعما ماراح يدير والو..خلي نفريها معاه اليوووم و نحطو النقااط على الحرووف نشوفو واش سبب حضوورو لتتم ..بصح واش راح نقولو انا دوكا كيفاش نقنعو  على حكايتي..نقووووولوو الحقيييقة و خليها تخلااااا يااك هو راهوو داخل فيييها داخل نفرش كلش قدامو و خليييها ترعد و تبرق عليا و علييه..