كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة22:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

قبل دقائق و في جهة اخرى عند هند لي كانت خارجة من الجامع راجعة لدار مع صحبتها استبرق كانت باينة فيهاا متوترة شايدة فمها بسيف كأنها كانت حابة تقول حاجة بصح حشمت منها و حشمت تسقسيها فيها لأنو شافتها ماجبدتش الموضوع معاها و خافت انها تجبدو هي و تتبهدل ..قطعت عليها حبل افكارها كي نغزتها بذراعها و نطقت فاهمة سبب انقباض ملامحهاو سكوتها المفاجئ هذا ..

استبرق:شبيك من مقبيل ساكتة اذا راكييي حابة كشما تقولي غير قولي منيش انا لي تحشمي مني..

هند:لا والو..

استبرق:حابة تسقسينيي على خوياا يااك ههه..

هند:اوفف استبررق!..

استبرق:ههه عادي شبييك راني لوستك المستقبلية ماتحشميش مني..المهمم مانيشش نحكييلك علييه بزااف لأنوو مهوش فداار راح يخدم فولاية وحدوخرا اتخيلي علاااش..

هند:علاش؟؟..

استبرق:لأنو الخدمة لتماا يخلصوه الدووبل تاع هنا اياا مالا قاالك بمااا انييي خممت نخطببببب احم احممم خااصو درااهم يعني راهو يخدم باااش يخطبببب احم احم..

هند:امم وشكون هاذ المحظووظة..

استبرق:زعما شكوون في ميزك راح نخليه يخطب غيرك هههه ..

هند:هه ان شاء الله ربي يقدروو ..

استبرق:امييين اميييييين باش نديروو العرس هذاا فأسرررع وقتتت..

وصلو لمفترق الطرق باش كل وحدة فيهم تروح لدارها تسلامو مع بعض و كل وحدة فيهم راحت من جهة هند غير تفارقت معاها خلات المجال لتبسيمتهاا باش تترسم على ثغرها بكل حياء كأنو وردة ناشفة و سقاوها رجعتلها الحياة كان ماشي نقابها لي كان ساترها كانو راح يحسبوها هبلت من طريقة ضحكتها لي شقت خدودها من الطرف لطرف..

دخلت لدار وهي تتنهد براحة متبسمة فرحانة غير مع روحها جيست ماعتبت باب الدخلة تاع دارهم جا على مسامعها اخر كلام قالو باباها عقدت حواجبها بإستغراب و دخلت تجري تشوف واش كاين لقاهم كلهم واقفين لحظة صمت جازت عليهم من اخر هدرة هدرها ناصر ..

شافت في ريام لقاتها كتمثيل حرفي لشمعة كي تكون متوهجة بعدها تبدا تطفا شوية بشوية حتى يروح نورها كامل هكاك كانت هي لوهلة كانت منفاعلة معاه و داخلة في نقاش عقييم بيناتهم حتى طفالها انفاعلها و بصيييص الامل لي كانت دايراتو فيه بكلامو الاخير لي قالو زاد راح ..

و من واش سمعت منو و من ردود افعالهم لي شافتهم فيها عرفت بلي ريام دارت كاش مشكلة و باباها اختار يعاقبها بطريقتو و قاللها هكاك بصح لي كانت متيقنة منو انو هذاك كلام كان نابع من غضبو و مستحيل يخليها طبقو قربت ليها بزربة و هي تنفيلها براسها لعلى و عسى تنقد الموقف قبلما يزيد الطين بلة حطت يديها على خدودها وحركتها بحركة خفيفة باش تفيق معاها لأنو عينيها كانو مركزين غير فباباها بدوون ماترمش ولا تنبس بأي كلمة ..

هند:ريام ريام هشش شوفي فياا ماديريش عليه راهو مقلق بررك راكيي تسمعي فياا رياام !!

من اسمها لي سمعاتو منها بصوت عالي فاقت من اللاوعي تاعها شتت تركيزها لي كان في باباها و شافت في هند لي كانت تحاول تنقد فالموقف تبسمت ابتسامة باهتة و بعدت عليها داخلة لبيتها خبطت الباب موراها و راحت ديراكت لخزانتها جبدت حجاب و خيمار لبستهم بزربة و زادت دارت نقابها رفدت دراهم كانت حاطتهم بين حوايجها رماتهم في صاكها و خرجت ديراكت بلا ماتعير أي اهتمام لصواتهم وهما يمنعو فيها باش تخرج ..

هند:ريااام وين راكي رايحةة اتقي الله في هااذ النهاار ولله قالهاا في لحظة غضب بررك مادييريش علييه ..

راضية:يابنتي وين خارجةة وين راكي حابة تروحي مااعندك لوين ترووحي هااذي داركمم اذا حب هوو يخرج منهاا ماشي نتي نتييي طفلةةة الشارع مرااحش يرحمممك ..

زربت فخطواتها قبلما يلحقوها و غلقت الباب موراها تقول خبطتها حتى قريب ريبت الدار و مابقاوش اصواتهم يلحقو ليها ..زادت شحنت و حقدت كثر كي ماسمعت منو والو حتى باش يمنعها باش تخرج و مامنعهاش تقول هي زايدة ناقصة في حياتو حركت راسها بتوعد و راحت تتمشى بخطوات سريعة المهم عندها انو تبعد من هنا باش ماتزيدش تشوفهم و تبدل الساعة بأخرى احسن ماتزيد تتطور الامور بيناتهم و تولي ماتتحلش ..