كلي بكلك مغرم 🩶⛓️

كلي بكلك مغرم 180الى 190

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة181:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

هند عضت على شفايفها متوترة و بقات ساكتة مكانتش حابة تخلعها ولا تقوللها اصلا بصح من كثرة ماحست بقلبها تعمر لقات روحها رفدت تلفونها و عيطتلها حتى ولات تبكي قدامها بدون وعي منها، شدت شهقتها بسيف كي سمعتها عاودت كررتلها السؤال مرتين بخوف و مسحت دموعها بلخف مجاوبتها بصوت متقطع ..

ريام:هننننددد انطقيييي واش كاين كشماا بيييكممم كشمااا بيه اديب؟؟؟..

هند:لاا ..مكان والو ..حبيت بررك تقولي لهمام يعيطلو..

ريام تلفتت شافت فهمام لي دارلها حركة براسو بمعنى واش كاين و جاوبتها بإستغراب..

ريام:كيفاش يعيطلو علاش وين راهو؟..

هند:شوفي دووكا هو ممكن يكون فالخدمة بصح قتلو المرة لي فاتت مايزيدش يديرهاا ماعرفتتش علاش رااهو يدير هاكا ..

ريام:واش يدير يابنتي فهميني بلعقل ..

هند:المرة لي فاتت قالي بت فالخدمة لأنوو من التعب ماافاقش بصح قتلو ماتزيييدش ديرهاا راني نبقا مقلقة علييك قالي ايه دوكا عااودهاا ..راني نعيطلو مايجاوبش ولله تقلقت..

ريام:عادي بالاك يكون فالخدمة كيما قلتي..حتى هماام مرات مايجيش لدار عاادي هاذي هي خدمتهم بلا ماتقلقي روحك ..

هند:راني وحدي فداار ريام!!..

ريام:حتتتتى انا نكون وحدي شبيك تصعبي فيها هند ..

هند:خلاص خلاص صحيتي و سمحيلي قلقتك فهاذ الوقت ..

جات جاوبها لقاتها كوبات عليها تنهدت بقلة حيلة و رمات تلفونها قدامها مجاوبة همام على سؤالو لي نطقو بشك..

همام:شبيه اديب واش دارلها؟..

ريام:والو هي برك حسااسة ماشي موالفة تبقا وحدها فدار علابيها جاتها غريبة الحالة.. وااقيل بات فالخدمة هي تقلقت عليه ..

همام:لا هي ماتحبش تبقا بعيدة على راجلها نتي برك لي باردة القلب..

ريام:ياااه لقيييت وحدة متفهمةةة تخليك براحتك فالحياة و تزيد تشرط ..

تجاهل كلامها و راح جاب تلفونو عيط لأديب مكانش يستنا فيه يجاوب لأنو سمعها كي قاتلها راني نعيطلو و مايجاوبش بصح غير عيطلو سمعو جاوب عليه الشي لي خلاه يعقد حواجبو بإستغراب و يبقا ساكت حتى نطق اديب في بلاصتو..

اديب:همام؟..

همام:وين راك!..

اديب:فالخدمة علاه كشما تسحق..

همام:لا عيطت نسقسي عليك برك ..تصبح على خير..

كوبا عليه و عاود تلفت لريام ناطق بحزم وهو مخنزر غير مع روحو..