كلي بكلك مغرم 🩶⛓️

كلي بكلك مغرم 91

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة91:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

همام شاف فيها ببرود بلا مايجاوبها و ناض خارج مخليها تشوف فنفس البلاصة لي كان قاعد فيها نفخت بتذمر و ناضت تخبط برجليها مع الارض معصبة غير مع روحها علابالها قادر هو بنفسو يخرجها بلا موافقتها و هي مهييش حاابة تخرج ماصدقت لقات خدمة مرتاحة فيها متناسبة مع رغبتها النفسية حتى جااها هو يقوللها تخرجي! ..رغم انو علابالها بلي الخدمة هاذي فيها ريسك و زاد فاجئها بجوابو كي قاللها اذا ستاهلتي الحبس ندخلك لييه بصح بقات عازمة على قرارها مصرة علييه ..

راحت جبدت حوايج من الخزانة و دخلت لدوش باش دوش و تروح ترقد لأنو حرفياا التعب نال منها من الخدمة و من المشاكل هاذو لي طاحو عليها مع همام فالاول كانت مرتاحة شوية من ردة فعلو بصح دوكا كي قاللها تخرجي من الخدمة و زاد هددها بالحبس خلا خوفها يعاود يتجدد شوية و زيد هدووءو بسماعو لقرارها مااعجبهااش لأنو حست بيه راهو ناوي على كاش حااجةة ماعرفتهاش واش هي ..

دخلت لدوش و نحات حوايجها كانت راح تحط حوايجها لي نحاتهم فسلة الغسيل حتى لمحت حاجة اثارت انتباهها فملابسها الداخلية رفدتهم بين يديها و عقدت حواجبها بإستغراب تتفكر وقتاش اخر مرة جاتها دورتها حركت راسها بعدم تذكر و نطقت بينها و بين نفسها..

ريام:واش هذا غير كيما جاوني علاش عاودوو جاو اليوم..ايي واقيل البنكرياس طرطقلي من الخلعة.. الله لا تربحو ركب فيا الرعب ليووم حتى عاودو هبطولي..و انا نقول علاش كرشي وجعتني حسباتلي رجعت فرماجة لدرجة وجعتني كرشي من خوفي منو هايا مليح مزال عندك شوية كوراج ريام كملي فيها ..

رمات حوايجها فالسلة و دخلت دوشت بلخف لبست حوايجها وخرجت وهي تنشف في شعرها غير خرجت بقات تحوس عليه بعينيها مالقاتوش ماعرفت وين همل فهاذ الليل تنهدت بتعب و راحت ترمات على فراشها غير غمضت عينيها غطت في نووم عمييق..

الساعة كانت تشير لل5:00 كي دخل للبيت لقا الحالة مسكتة شاف لجهة البونك لقاها راقدة فسابع نومة حالة فوهة فمها تتنفس بيه من وضعيتها المعوجة لي كانت راقدة بيها تبسم على جنب وهو يلاحظ في نعيمها فالرقدة هاذي و قرب ليها ببطئ  بقا يشوف فيها بدون حراك كأنو كان يحفظ فتفاصيل ملامحها الولهان بيهم..

بقا ثواني يخطط لواش راح يدير فالاخير تبسم بمكر و نحالها الغطا عليها و هي إلا تحركت ولا تململت تقول كانت ميتة نفخ بتذمر و حط يديه عليه يحرك فيها باش تنوض لأنو بانتلو راح جيبلو العشياا وهي بنعاس هذا لي راهو فيها..

همام:ششش رياام!!..

ريام حلت عينيها بصعوبة و شافت فيه بنص عين مدوخة بالنعاس بقات ثواني و هي تشوف فيه تستوعب فالاخير عاودت دارت للجهة الثانية و كملت رقادها مخلياتو يشوف فيها وهو رافع حواجبو للفوق من واش دارت خنزر فيها بنظرات ميؤوس منهم و راح فرغ كاس ما شرب منو شوية و فرغو عليها بكل برود حتى ناضت طافجة تشوف واش كاين..

ريام:وااش كاااين وااش صرااا شحال راهي الساااعةةةة ..

همام تبسم ببرود و جاوبها :الخمسة تاع صباح..

ريام:علاش نوضتني واش كاين؟؟؟..

همام:نوضي اومبعد تفهمي..

ريام:رااني نعساانة و عيااانة همااام عييشك خليني نكمل نرقدد واش راح نوض ندير على الخمسة تاع صبااح..

همام:نحسب منا ل3 ماتنوضيش ماتلومي غير روحك..

ريام شافت فيه بمعنى منيتك و عاودت رجعت تكسلت غير غمضت عينيها سمعاتو نطق بأول رقم وصل لرقم 2 حلت عينيها و شافت فيه تحاول تفهم واش راهو يدير غير قال رقم 3 ناضت بزربة وقفت قدامو تستنا فيه يهدر و يقوللها على واش راهو ناوي ..

اما هو تبسم على جنب كي خداتلو الراي و راح سابقها فالمشي ناطق بأمر..

همام:تبعيني!.