قصة زواج متقـــف الفصــــل الثاني(التتمة)

البارت 205

الفـصـــل الثـاني:ما خــلف الأقــعنة🫦🪔
                      ____________
                       𝑩𝒚  𝑺𝒂 𝒓𝒊 𝒕𝒂

      🚬 𝑩 𝒂 𝒓 𝒕  205

ساريتا:[شارت لنفسها]أنا بن داوود يجي يفرض عليا هضرتو و ما يخليني بحريتي...أنا لي يسوى و لي ما يسواش عمرو تجرأ يفرض عليا شي حاجة يجي راجلي العزيز يديرها...[بشر]ما فخباروش بلي سبق دارها خويا و فضلت العصا و الضرب على أنه يفرض عليا رجولتو و يجردني من حريتي...[لاحت التيليفون للجنب و بدات تلبس فالفوقاني د بيجامتها]واخا...واخا أ سي أرغد إلى ما خربت عليك ديك المشية لديك المدينة ماشي أنا بنت فضيلة....

ناضت حلات على حسناء الباب ..لي بدورها كانت مخلوعة عليها تسحابها غا سخفات و لا شي حاجة ...

حسناء: واش نتي بخير؟...علاش تعطلتي باش تحلي عليا؟...

ساريتا:والو...غير كنت كانهضر مع باباك...[خدات من عندها الكاس بعيون لامعة]عصير الباربا ياك؟...

حسناء:[طبطبات على كريشتها]اييه يا لالة...باك نتي ظلي تشهاي علينا بشي عصير بلون الحمر...[باستغراب]واخا ما عرفتش علاش مشهياه بالحمر...كون خديتي الليمون حسن...

ساريتا:[حركات راسها بلا]لا أنا بغيتو يكون لونو حمر...[سهات و هي مبتاسمة بحماس]يكون بحال لون الدم...

حسناء:[سحباتها غا كاضحك معاها]لا لا هنا طلعات قشابتك واسعة أ طاتي...

ساريتا:و لكن راه بص

قاطعهم صوت الدقان الواضل تال عندهم..

نزلات حواجبها باستغراب و شافت فحسناء...

ساريتا:ياك قلتي خوك صلاح ما غايجيش اليوم بكري؟...

حسناء:أه بصح...و حتى من خويا فتاح راه ناعس فبيتو....

ساريتا:الى كانت هاديك الكلبة هي لي رجعات...ما غايفكني منها حد..

ناضت بزربة ناوية على خزيت و وراها حسناء تابعاها...خرجو من البيت و تمات غادا و صوت كايختارق وذنيها ما غريبش عليها...صوت فتاقداتو من هادي سنوات و شحال توحشاتو...

رجليها يبسو فبلاصتهم حالفين ما يتحركو...و هي لامحاها معانقة هي و سميحة...كايهضرو و يضحكو و صوتها واصل حتال عندها...

حتى طلعات ماماها راسها لعندها و تلاقاو العينين...هنا ما صدقاتش لي شافتو...ظنات راسها فحلم...قلبات عينيها لجيهة اخرى و عاودات رجعاتهم فيها...

لكن كانت فعلا حقيقة!!!....

طلعات النفس بصعوبة مخلية طبقة شفافة من الدموع تظهر...و تفيض على خدها نازلة...

ساريتا:م..ماما...ماما...

فضيلة بعدات على سميحة و قربات ليها بخطى بطيئة...كاتدقق فيها من راسها حتال أغمس رجليها...كاتشوف بنتها كيف تغيرات على اخر مرة شافتها...كاتشوف اشراقة فوجهها و لمعة فعيونها مضوية...

وقفات قدامها و دموعها نزلو...تفكرات لي دارت...تفكرات الموقف لي تحطات فيه هو و عيسى...و شحال طلبات و رغبات دراغون ما يأديهاش...

رفعات يدها الفوق و نزلات عليها بتصرفيقة ما كانتش فالحسبان...قبل ما تستاوعب زادتها الثانية و الثالتة...خلاتها طيح للأرض واضعة يد فوق حنكها و يد على كرشها...كاتشوف فيها يعيون دامعة و جسدها كايرجف...

جرات لعندها سميحة محنية لعندها هي و حسناء كايتفقدوها واش هي بخير...لكن دموعها فقط لي كانو مسموعين و هي منزلة راسها...

سميحة:هاويلي يا فضيلة مالك مصرفقة البنت...

فضيلة:[بنبرة باكية]تستاهل...تستاهل و ما غايبردش لي القلب...[بيدها ضربات على صدرها]ما يطفيش العافية الشاعلة فقلبي...[تحنات لعندها شادة فكتافها و تشهق باكية]أنا لي حملت بيك تسع شهور...أنا لي كنت حاملة بيك و صبرت لحر العذاب لي كانت مدوزاه عليا جداتك...أنا لي سهرت عليك و قطعت من عندي و عطيتك.....[عاودات ضربات صدرها و ساريتا كاتزيد تبكي]باش فاللخر هاكة تجازينا أنا و باك...تهربي؟...تهربي منا؟...علاش هاااا؟ قولي علاش!؟...

ساريتا:[بالكاد قالت كلمة من بين دموعها]م..ماما...

فضيلة:دبا عاد وليت مك... ملي هزيتي الراس و هربتي علاش ما تفكرتينا؟..ما فكرتيش داك البزناز لي هربتي منو يكون ذبحنا و شفا غليلو...ما فكرتيش  فوجهنا لي يتردم فالتراب...

ساريتا:ع..عرفت راسي غالطة ا ماما ..و الله العظيم الى نادمة...نادمة و الخوف دارها ليا...و الله أ ماما ما كنت ناوية نوصلو لهاد الحال...و الله أ ماما حتى ندمت...