قصة زواج متقـــف الفصــــل الثاني(التتمة)

bart 302

الفـصـــل الثـاني:ما خــلف الأقــعنة🫦♟️
                ______

      𝑩 𝒂 𝒓 𝒕  302💀

قلب شوفتو ليها و هي ناعسة...قرب بخطاه لجيهتها و تحنى طابع قبلة طويلة على شفايفها ممزوج فيها الحب و كل الشكر لي دارت...الخطوة لي دارت هي بالنسبة ليه تضحية...

جلس حداها واضع يديها وسط يديه الباردين...كايتمعن فيها بنظرات لو شافتها غا دوب...بقدر لي عدم إعجابو من لي دارت زادت كبرات فعينيه...

شجاعتها و قوة شخصيتها ثبتات بلي مخلي لبؤة وراه قادرة تضحي براسها على قبل عائلة راجلها و تحطهم فعينيها...
        
طلع نفس عميق مخسر سيفتو واضع يدو على قلبو..مع كل نفس كايحس بشي نغزة بحال موس حاد كايتغرس فداخلو...

من حسن حظو كان جايب معاه الدوا..بصعوبة جبدو من الجيب و بلع حبة..هاز الما تبعو ليه و بعد ثواني بدا يخف الوجع تدريجيا...

تكا على ظهر الكرسي صدرو طالع و نازل...غمض عينيه كايلعب بالتيليفون لي بين يدو...بجلسة مرتاحة على الآخر أعصابو مبردهم على عكس قبيلة...

هدوءو جايب عاصفة محتومة لا هروب منها...مستحيل يدوزها ليه الى ما عطاه درس ما غاينساه...

بطبعو كايعطي فرصة وحدة للشخص باش ما يظلموش..و من بعدها كايعطيه درس فالوقت لي ما ضارب ليه حساب بطريقة ما ينساهاش و تخليه يتمنى لو ما لعبش معاه...

هاكا طريقتو باش متميز و مخلي الناس يخافو منو و يحتارموه...

صباح يوم غد

كان واقف قريب من دار فاتي مشطون البال...حاس بشي حاجة ماشي هي هاديك...ياك موالفة تعلمو فالبلاصة ملي كاتبغي تمشي تسافر أشنو وقع دبا؟...

من بعيد على بعد خطوات لمحاتو و هي جاية بقفتها...زادت عقدات حواجبها كثر ما هما معقودين...و قربات بزربة لعندو مقندشة...

الأم نسرين:نتا أش كادير هنا ها؟...

دار لعندها نزار مستغرب فطريقة هضرتها معاه...

نزار:خالتي نسرين ؟...ما موالفاش ليك تهضري معايا واقعة شي حاجة؟..

الأم نسرين:[معصبة]قول أشنو ما غايوقعش..ما حشمتيش لي واقف حدى الدار و الجيران كايشوفو...دوزناها ليك المرة اللولى و لكن عيقتي واااه...

نزار:[حنحن بإحراج]أحم كنت بغيت غير نشوف فاتي...تشوشت عليها و صافي...

نسرين:بأشمن حق هاا؟..أش كاتجيك؟...يوقع ليها لي بغا يوقع نتا مالك؟..تفرق عليها و شوف ليك شي بنت اخرى لصق فيها؟...

نزار:[غرس سنانو فباطن فكو بعصبية محتومة]واخا يوقع لي يوقع ما غانتفرق عليها أ خالتي غا رتاحي...هاديك لي ولدتيها راه مكانتها فقلبي بوحدها...و من حقي نتشوش عليها...

نسرين:[تنفسات بعنف محمرة فيه العين]شوف نقول ليك...من اليوم غا ضرب على هاد الدار و هاد الدرب كامل...و لا بيناتنا البوليس تسحاب كاينة السايبة هنا...

نزار:و لكن راه ..

نسرين زادت من حداه و خلاتو كاتم أعصابو...ضرب يدو مع الحيط بعصبية بالغة و لقى اخر نظرة على شرجم بيتها قبل ما يمشي...