قصة زواج متقـــف الفصــــل الثاني(التتمة)

بارت 349

الفـصـــل الثـاني:ما خــلف الأقــعنة🫦♟️
                ______

      𝑩 𝒂 𝒓 𝒕  349🚬

نزار:[خرج عينيه معصب]نتا اش كاتخربق هااا اش دخل عمي فالموضوع...و على اينا فلوووس هاضر...[كاينتر من قبضة الدراري]طلقو مني حتى نتوما طلقو ...طلقوووو...[رخاو منهم بجوج]

جاو شي رجال كبار كايحاولو ينصحوهم و يبردوهم و هما غير مخنزرين فبعضياتهم...

محمد:[وجه كلامو للناس لي كاتشوف]الله يرحم الواليدين بلا ما نخرج العيب معاكم و نتوما عارفيني... لي عندو شي دار و لا خدمة يمشي ليها..

نزار:غير سيرو هاد الموضوع غانحلوه راجل لراجل بلا مضاربة...

تسناو الناس حتى بعدو و مشاو..قرب نزار لمحمد ناطق بصوت كايحاول ما أمكن يتحكم فيه و ما يغوتش...

نزار:شوف أ خاي محمد انا ما كنتش باغي نوصل معاك لهاد المواصيل ....من زمان نتا عارفني و أنا عارفك و معتارف بلي نتوما عوضتوني شوية فراق عائلتي و ما خليتونيش..و نتوما فوق راسي و عمرني نفكر نأديكم...

محمد:[دوز يدو على وجهو مطلع النفس]تبدلتي...تبدلتي و بزاف..من نهار عرفتي دمك من دم داك البزناز الموسخ و نتا غادي للخسران...تحلو ليك العينين و وليتي باغي تعاند مع القانون...تخطف البنت من حدى دارهم..تهددها بالموت و تكرفس عليها تسحاب هادي عندك هي الرجلة...

نزار:كانعاود نقولها ليك هادشي ما عندو علاقة لا بعمي نتا ما عارف والو..والوووو...[زير على قلبو و هو حاط ينيه فوسط عيونو]باش حسيت و انا كانسمع بلي البنت لي باغي قلبي غاتزوج غيري...بلي لي عشقتها غاتخطب لغيري...ما قدرتش نتقبلها...ما قدرتش نتحكم فأعصابي...

محمد:هذا ماشي سبب يخليك تنوض تنوي تكرفس عليها أ الكلب...واش نتا بنادم ولا حيوان كاتسحاب العنف و التكرفيس و الخوف هو لي يخليها تمشي معاك و تزوج بيك...

نزار:[تنهد تنهيدة من القلب مسموعة]  ندمت و ما غانكرش...اه ندمت على الهزة لي هزيتها بلا خاطرها...فديك الوقيتة كانت العصبية معمية عينيا و لكن نحلف ليك ما كانت فنيتي نتكرفس عليها...كنت ناوي غير نخوفها باش تراجع على الزواج...راه هي حياتي و عمري نموت الى طرات ليها شي حاجة...

محمد:الله ينعل هاد الحب المريض ديالك...على ديك البنت لي شدات فيدك و نتا غاطس وسط الزبل...كانت حيط تسند عليه ملي ما لقيتي حد...عاوناتك حتى حيدتي البلية حينت شافتك بنادم و ضبر ليك باها على خدمة الحلال..خلي على مها مسكينة لي خليتي النعاس ما يزورها من بعد لي درتي...و هي لي كنتي عندها عزيز و دخلاتك لدارها و دقتي ماكلتها فالوقت لي كنتي ما لاقي الماكلة...باش فاللخر تجي تخرب حياتهم و تخليهم يطجو من الدار...ما رجلة ما والو...

نزار:[سكت غير كايتصنط...و جلس قفازي متكي على الحيط و حاط يديه على راسو]

محمد:كون كنتي باغيها من اللول تقصدها للحلال[تكى هو الآخر على الحيط..سارح عيونه فالفراغ]حتى عمك دار نفس البلان لختي و ما كان فخباري والو ديك الوقيتة...شحال و هي تهرب و هو كايلقاها...ما لقات حد يوقف بجنبها و يحميها منو و لكن بقات صابرة و قوية...و لكن فاطمة الزهراء غير...هادشي لي درتي بان فيها..هرستيها من الداخل و دمرتيها بفعايلك...و خيبتي ظنها فيك..دير فبالك ما غانخليكش تقرب ليها..غلطت فاش ما كنتش فجنب ختي ملي كانت محتاجاني و لكن ما غانعاودش الغلطة...

نزار:لا نتا و لا حتى عمي غاتحسو بيا...واش تسحاب ما كنتش ناويها الحلال...

تفكر نهار تلاقى مع باها فالقهوة و فتح معاه أمر الزواج و كان رد الأب الرفض...الرفض لي ما كانش متوقعو...
⬅️⬅️
كانو جالسين مقابلين مع بعضياتهم و نزار على ملاميحو الحزن و هو كايتصنت لأب فاطمة الزهراء...

الأب:القاصح فوجهك حسن من الكذاب أ ولدي...ضايفناك و لقيت ليك خدمة تسلك فيها راسك و نتا طمعتي ليا فبنتي...هذا ما نتخلصو من عندك غير الطمع...

نزار:حاشا أ عمي نتا و بنتك و خالتي نسرين على راسي و عيني...و انا ما طلبت منك غير الحلال و قصدتو...

الأب:سمع أ ولدي كريم..انا راني بهاد اليدين ضربت التمارة حتى كبرت بنتي و قريتها ما شايطاش عليا باش نخليها تكمل حياتها فتكرفيس الكرا...و هي المخير فسيادك طالبينها للزواج...هادي ثاني مرة و اخر مرة نهضر مرة معاك فهاد الموضوع ما عندي بنت للزواج...

نزار:فاطمة الزهراء بنتك كانبغيها و قاد بيها...نقطع من راسي و نعطيها غير باش تكون مرتاحة...اشنو الديفو لي فيا ياك خدام و مسلك راسي فالكرا...واش انا كرهت نكون فقير...

الأب:هاد الحب و لا الزمر ديالكم ما غايوكلهاش الخبز...و على اينا خدمة كاتهضر؟..على الفيرمة لي كاتضرب فيها 2000 درهم للشهر تحت الشموشات هاد الصالير ما يكفيك حتى لراسك...انا ما نرضى لبنتي تزوج بواحد خدام فالفارم...سير الله يعرضك السلامة و نسى عليك نمرتي قبل ما نوصل معاك لشي مواصيل ما يعجبوكش...[ناض من بلاصتو كايبرݣم]مزيان تبارك الله قاليك يتزوج قال...

خلا نزار وراه حزنو طاغيه و قلبو محروق من الهضرة لي قال...
⬅️⬅️

عاود ليه كولشي مخلي محمد يبرد و يتعاطف معاه...

نزار: [تقابل معاه بحزن مالي عينيه]انا قصدت الباب ما مرة ما جوج ما طالب غير الحلال من عند باها و لكن هو رفضني و من حقو...علاه شكون انا...انا غير واحد لقاوه فالزنقة ما عندو لا اصل لا مفصول...قاري حدي الباك ما عندي مستقبل و لا خدمة تليق بيا بحالك...واحد خدام فالفيرمة عيشة الدل لي جا يمسح فيك رجلو حتى واحد ما يبغيها...