قصة زواج متقـــف الفصــــل الثاني(التتمة)

بارت 348

الفـصـــل الثـاني:ما خــلف الأقــعنة🫦♟️
                ______

      𝑩 𝒂 𝒓 𝒕  348🚬

نتر يدو منها بقوة حتى تراجعات بخطوات اللور...و شار بصبعو ناحية وجهها و أعينو الحمرا مصوبة نيشان فعينيها...

دراغون:نتي بالضبط يا البرهوشة ما نسمعش حسك...جبتي تيليفونك؟..

ساريتا:[قلبات عينيها لجيهة أخرى]لا..شكون لي خلا لي الع..

دراغون:[قاطعها بصوت عالي قفزها]تزيدي كلمة وحدة غانهضر معاك بيدي و ندير ليك حد لهاد التبرهيش...

عطاها بالظهر ..و ندافع لواحد القنت حاط يدو على خصرو كايمشي و يجي...تفحص جيوب سروالو كايقلب على تيليفونو و من سوء حظو ما لقاهش...

تفكر ملي خلاه فالطموبيل و ضرب يدو مع الحيط مغدد...خلاها و هي قالبة عينيها لجهة أخرى تقفز من بلاصتها على اثر الضربة...

كل واحد فيهم حاكماه الأعصاب من جيهتو كان طلع ليه الدم من الموقف لي طاح..من المستوى لي نزل ليه على ود برهوشة كيف كايقول...

كان مبرد مع راسو و ما تهز فيه شعرة من الغضب حتى طاح معاها...خرجاتو على طوعو..

و هي من جيهتها واخدة موقف منو...ما عطاها لا وقت تشرح ليه و لا رعى لحالتها...حتى ملي بغات تهديه رجع ليها اللومة..و زاد هرب ليها الخاطر ملي عرفات لي غايدير نزار و هي ما بيدها حل...

             مكـــــان آخـــــــر

نازلة فالدروج متنهدة بارتياح لي قدرات تسلت من أسئلة فضيلة بالكشيفة...

تاجهات لبيت دراغون حلات الباب بلا حس...سبقات راسها هو اللول شافت ما كاين حد فالبيت و هي دخل...

سميحة:بنتي ساريتا...أرغد ..كاين شي حد هنا...

بان ليها باب الحمام محلول...عرفات ما كاين حد فيه...لاحت الشوفة فالبالكوم و نفس الشي...

سميحة:[مع راسها]هادي هي الوقيتة فاش خاصني نقلب على راس الخيط...[طارت سدات الباب بالساروت و بدات تقلب قنت بقنت]ما يمكن أرغد يخالف وصية باه و يقتل خوه..ما يرتاح قلبي الى ما حيدت شكي و لقيت راس الخيط يوريني الطريق الصحيح...

خدات وقت و هي كاتقلب البيت سفاه على علاه و لا حاجة لقاتها غاتفيدها..

شوية لمحات شي حاجة مدلية من تجاكيط ديال أرغد...صغرات عينيها و جبداتها...لقاتها سنسلة رقيقة ذهبية ديال المرحوم راجلها..كان خلاها لولدها الثاني حيدر...

دمعو عيونها و هي كاتدوز أصابعها عليها...قرباتها لقلبها و سالو دموعها...

سميحة:طلع بصح أرغد ملاقي بخوه...ياربي عطيني الصبر ...يا ربي عطيني من ورى موت المرحوم قلبي ما يصبرش  الى وقعات شي حاجة لولدي...

بصعوبة باش تمالكات راسها و جمعات الروينة لي دارت...خبات السنسلة عندها و خرجات من البيت...

سميحة:[نزلات كاتقلب عليها]ساريتا...واا ساريتاااا..فين مشات هاد البنت حتى هي..

          مـــــكان آخر

على قرب من الدرب وقف الطاكسي و نزل نزار...كان ملاميح وجهو متغيرة و هو شاد فراسو لي ضارو اثر الضربة...ضرب يدو مع الطاكسي بعنف قايل...

نزار:انا اشنو كنت ناوي ندير...[عاود ضرب يدو]اشنو كنت ناوي ندييييير...

كون ما الطاكسي مشى كان غايبرد فيه جنونو بالضرب ...

تقدم بخطواتو للدرب فين كاينة دار فاطمة الزهراء...قرب لدارهم و لمح محمد من بعيد واقف كايهضر مع مول الهوندا و شي رجال باقيين كايهزو الرحيل...

نزار:[موجه كلامو للرجال موقفهم]أش كاين ..اش واقع هنا الشريف!!!...

•••: أسي حيد من الطريق...ما كاتشوفش الرحيل لي كانهزو...

نزار:[عقد حواجبو]اينا رحيل هذا...

من بعيد كان محمد منغامس فالهضرة...حتى سمع شي صوت عالي...دور راسو و هو يزيد فالتخنزير ملي لمحو...

قرب عندو و بلا ما يشعر نزل عليه بضربة الوجه على غفلة...

محمد:يا الق••واد من بعد هادشي كامل لي درتي أش جاي دير هنا يا الكلب...[تشادو مع بعضياتهم و ولاد الدرب تجمعو عليهم]هضر اش جاي دير هناااا..

نزار:خليني محتارمك و قولي فين هي فااااتي....فين ديتوها...فين بعدتوهاااا عليا.. هضرررر[رجع ليه الضربة]....فين هييي...

محمد:فين خليتي شي احترام يا الكلب...نفخ ليك داك البزناز ديال عمك الريش و تعلمتي تضرب و تعرعر و تهدد بنات الناس...[عطاه ضربة خرى خلاتو يطيح للأرض و الدراري دخلو بيناتهم يفكو]صافي عمك حل ليك العينين بالفلوس الحراام وليتي باغي تدير لي بغيتي و حتى حد ما يهضر معاك....

نزار:انا ما تبدلتش أ ز•بي ما تبدلتش و ما عمر فلوس عمي تبدلني كاتسمع...

•••:أ الدراري بردو الطرح هضرو بالهداوة بلا ضرب واش نتوما مراض باقيين صغار....

محمد:[شادينو الدراري]نسحابك ولد نقي و رباتك الزنقة تحتارم بنات الناس و لكن طلعتي بخبيزتك ولد الحرام مقطرر و عمك و فلوسو حل ليك العيين ...و هاد كثرة البلا البلا ما تنفعش و لا غادوز عليا...