قصة زواج متقـــف الفصــــل الثاني(التتمة)

بارت 247

الفـصـــل الثـاني:ما خــلف الأقــعنة🫦🪔
                ______

      🚬 𝑩 𝒂 𝒓 𝒕  247

دراغون:المرة الجاية فكريني نسلفهم ليك فغيابي عليك..

ساريتا:أصلا كنت عارفة بلي نتا داير لي لونتي و عينيك ماشي حقيقين...ملي تسالي عطيني نجربهم

دراغون:[شاف فيها شوفة من نيتك جابت ليه الضحكة]حمقة و زادك هاد الحمل..[جرها من يدها غادي بيها للسرير ݣلسها]رتاحي من الهضرة شوية و كولي ليك...

قرب لعندها البلاطو عامر ماكلة غير ليها..و حطو فوق رجليها موكلها بزز منهاو هي مخسرة سيفتها ..شي شوفات خايبين كايديرهم فيها خلاوها دوز على الماكلة بزربة...عاد رتاح لي كلات و جرها لعندو معنقها...
              ______________

دازت سيمانة بلمح البصر...فيها كانو أحداث جميلة من بينها...تطورات العلاقة كثر بين دراغون و ساريتا بالتفاهم و الخلافات لي ما بقاتش كيف اللول...

ساريتا زادت تعلقات بيه و باش تكسب ثقتو شوية بشوية و باش تحرر من قيودو عليها بدات تخدم حيلها بالفن..لا هي بقات تتشاد معاه و لا تدير حوايج يعصبوه يعني بدات تعلم و تحفض كل خطوة و كلام قبل ما تقولو...

من غير هادشي دايرة جهدها بالكامل تخليه يسامحها و يولي يتيق فيها..

هادشي خلا دراغون ما يقيدهاش فالدار كثر من القياس خصوصا و أن الدكتورة لي دوزات عندها وصاتو يخلي نفسيتها تكون مرتاحة حتى يثبت الجنين و دوز هاد الفترة الحساسة من الحمل...

لهذا عطاها الموافقة تتلاقا مع صاحبتها اولا تمشي عندها بشرط تاخد إذنو و ما يجي كلامها فكلام شي راجل...

من جهة ثانية كانت فاطمة الزهراء و كريم العلاقة بيناتهم تحسنات و رجعات حسن من اللول..و هاد المرة ما قدروش يخبو احاسيسهم لبعضهم بالغيرة لي كانت كاتاكل فيهم..هي فحالة كانت مع ولد خالتها و هو فحالة كان مع شي بنت دربو...

من ورى داكشي لي وقع لكريم و من داك النهار صلاح ما وصل لنجلاء مزال و غبر ليه الآثار..خلاها توعى بلي ولفات وجودو معاها  لا و الأسوء ولات كاتحس بلي بدات تنجاذب ليه و عرفات راسها منعاجبة بيه...

            ________________

هذا ماشي أي نهار عندو..هذا نهار لي من سنين و هو يتسناه..يتسنا نهار يعرف بيه بلاصة عمو فين كاينة...

لبس عليه بالخاطر متكايس على الجرحة...تحنى بغا يهز القبية يلبسها حتى حس بيدها تحطات فوق يدو مانعاه...

خلاها تعاونو فاللبيس حتى سالا و زيرات على يدو مبتاسمة ليه..

فاتي:كولشي غايكون بخير تيق بيا...

كريم:خايف..خايف لا نتعلق بأمل و نفرح و فاللخر نلقا كولشي كذوب...

فاتي:[طبطبات على يدو]تفائل بالخير...اليوم وصل لي تجمع فيه مع عائلتك...

كريم:[بنظرة عاشقة و هو كايشوف فيها]ما عرفتش أشنو كنت غاندير لو ما كنتيش معايا...

فاتي:حنا علاقتها مبنية على هاد الشكل..نتشاركو الفرحة و الحزن و ما نتخلاوش على بعضياتنا...يعني ما تسناش مني نمشي و نخليك...

كريم:[بلا شعور قال]ااه شحال كانبغيك..[شافها خرجات فيه عينيها متفاجئة من كلامو و هو يقول دغيا]زعما كانبغيك كيف كاتبغيني يعني ما كارهينش بعضياتنا فهمتي؟..

فاتي:[حشمات و تصنعات الغباء]واخا واخا فهمت..يالاه راه غانتعطلو...

كريم:و نتي فين غادة بالسلامة؟..

فاتي:معاك هاويلي بغيتي نخليك بوحدك..