قصة زواج متقـــف الفصــــل الثاني(التتمة)

بارت 346

الفـصـــل الثـاني:ما خــلف الأقــعنة🫦♟️
                ______

      𝑩 𝒂 𝒓 𝒕  346🚬

شافت فماماها لي بحالا حسات بخوفها لي مخزون...

نسرين:كولشي غايكون بخير ما تخافيش[قربات جلسات حدى رقية]على من هضرتك أ خالتي عندك شي فكرة..

رقية:معلوم راه فاطمة الزهراء غالية علينا و ما نبغي ليها المضرة..و لا تغلط نفس الغلطة لي غلطات ساريتا...ساريتا دبا علاش كان كايلقاها داك البزناز؟..غا حينت الى جيتو تفكرو بحالو حتى نتوما الواحد الى بغى يهرب يا غايتخبى عند شي واحد من طاسيلتو و لا عند صحابو أما تا الجيران يخافو من المشاكيل...

نسرين:[مركزة معاها]اييه عندك الصح فلي قلتي هي أشنو غانديرو؟...

رقية:ما غاتديرو والو..غاتمشو ترحلو للدوار كيف قلتو و لكن فاطمة الزهراء لا...

فاطمة الزهراء شافت فآية و رجعات شافت فمها..

فاطمة الزهراء:كيفاش زعما؟...

نسرين:لا ما يمكن نمشي بلا بنتي و نخليها بوحدها ما يمكن...

رقية:أوا شكون قاليك ما غاتمشي معاك...معلوم غاتمشي و لايني بصفتها ختك...يعني غاتنكر و تخبي راسها ورى صورة ختك...و من جيهة خرى خاصكم تبينو بلي فاطمة الزهراء ما مشاتش معاكم...

فاطمة الزهراء:[بتفكير]فهمت اش كاتقصدي...كاتقصدي الى وهمناه بلي ما مشيتش معاهم يعني انا مصايفطيني لبلاصة خرى و هاكا غانخليوه يقلب على الخوا و بهاكا يكون الوقت الكافي حتى توصل الوقيتة فاش  غانتزوج...

رقية:اييه..غانلوحو ليه الماكلة فجيهة خرى يتلاهى فيها و ما يجي فين يعرف بلي كاينة مع واليديك حتى تكوني تزوجتي..

نسرين:[بتاسمات]ولاهيلا فكرة عندك و أشمن فكرة..الحمد لله لي جيتي و قلتيها لينا أما كون ضيعت بنتي بيدي...

فاطمة الزهراء:[طلعات نفس عميق]سبحان الله تقولي غير ساريتا قدامي...تمنيتها تكون حدايا فهاد الوقيتة..ربي لي عالم شحال محتاجاها...و لكن غانعذرها هي دبا مزوجة ماشي كيف قبل...ما غاتعطيش وقت لصداقتنا كيف اللول...

رقية شافت فنسرين هما عارفين شحال فاطمة الزاهراء و ساريتا متعلقين ببعضياتهم..رابطاهم علاقة اكبر من الصداقة...

رقية:غير الظروف أ بنتي لي مفارقاهم أما تيقني بلي بلاصتك عندها ما غاتغيرش...نتي عارفة الكسيدة لي عاد وقعات ليها خلاتها غا شادة فالفراش..حتى من هادشي لي واقع عاد قلتو ليها غير اليوم...ساع ما كملت معاها الهضرة الله و علم اش واقع ليهم تاني...

آية:فاتي نعلي الشيطان..حتى حاجة ما غاتبدل ساريتا عليك...غير عذريها حتى هي ماشي بالساهل هادشي لي كادوز منو...غير انا نهار حطيت رجلي تماك فداك الدرب شداتي القفقافة و الخنقة عساك هي...

رقية:[حطات يد فوق يد]من هادشي كامل نقوليك ما تخافيش أ بنتي..حنا معاك و حتى ساريتا معاك..الى كانت يدهم واصلة و كايستقواو على النسا..حنا كيدنا عظيم و ما يقد علينا حد من غير لي خلقنا...

بانتهاء كلامها تعالاو الضحكات شادين فهضوراتها...و مرة مرة تضربهم بالعكاز دايرة فيها الحاكمة...كل وحدة تكلفات بحاجة...ها لي كاتحط و ها لي كاتستف و تقاد فالكراطن..

هما كايضحكو من غيرها هي لي ضارها قلبها...قلبها المجروح...صعيب عليها تخلي الدار لي والفاتها و تخلي صحبتها و تمشي...صعيب عليها تنسى ما طرا ليها...

استأذنات منهم بدعوى غاتمشي تجمع لي باقي فبيتها...طارت دغيا سدات عليها الباب و قفلاتو وراها...

جلسات على الأرضية واضعة يديها على وجهها حاسة براسها مخنوقة...

فاطمة الزهراء:وقفت معاك فالوقت لي حتى حد ما كان معاك و لا باغيك...ساندتك فوحدتك و درتك خويا قبل ما نبغيك فاللخر تدير ليا هادشي...حرام عليك حرام...

طول هاد الساعات لي دازو كانو صعاب عليها...كل مرة كانت كاتقفز و تخاف من شي صوت...بسباب لي دارو معاها و الخوف لي عاشتو الراحة ما لقاتها...

و الأسوء فعز ݣلستها سمعات صوت شي حاجة تقرقبات...من حسن حظها كانت غير مشة..حتى دخلات عندها رقية...

رقية:[جلسات حداها شادة فالعكاز]عارفة هادشي لي داز  صعيب عليك و لكن على ود والديك بزز منك تقواي و تصبري ما بقى والو و تزوجي و راجلك يطلع ليك وراقك...ما بغيتيش تخوي هاد البلاد...

فاتي:انا درت نيتي معاه من اللول...ساندتو و وقفت بجنبو... [دورات وجهها ناحيتها]لا هو و لا أي واحد غايقدر يهرسني...

رقية:و على هادشي بغيتك تصنطي ليا و تحلي وذنيك معايا...هاد النوع فكرني فداك صعصع لي تزوج بحفيدتي و واخا هربات منو لقاها فاللخر...و ما يصعابش على هاد خينا يلقاك...وا حضري عقلك معايا الى بغيتي تسلي الشوكة بلا دم...

فاتي:[ركزات معاها]اشنو المعمول ندير بان ليا بحالا عندك شي بلان فراسك الميمة...

رقية:ما كاين غير الخير...حلي وذنيك خاصك ***********...فهمتي؟

فاتي:[سمعاتها حتى اللخر و حركات راسها مبتاسمة ليها]عجباتني فكرتك بزاف...[باست ليها راسها]الله يطول فعمرك الميمة...