قصة زواج متقـــف الفصــــل الثاني(التتمة)

bart 276

الفـصـــل الثـاني:ما خــلف الأقــعنة🫦♟️
                ______

      𝑩 𝒂 𝒓 𝒕  276🎲

دراغون:مزيان..سيرو حطوه فالكوفر...

حناو ريوسهم و سبقهم غادي بثبات و هما وراه...حل ليهم الكوفر و حطو فيه الصنادق هز منهم وحدة بين يدو...تبعهم بعينيه حتى مشاو  و غبرو...

تاجه ركب فاللوطو حداها حتى تفزعات بعد ما كانت ساهية...حط ليها الدلاحة فحجرها ناطق بهدوء..

دراغون:ها لي منوضاني عليها من نعاسي..هزي شمي هاد الريحة لي باغا...و أري نقطعها ليك...

ساريت هزاتها و عينها مرة عليها و مرة عليه..قرباتها لنيفها كاتستانشق ريحتها مغمضة عينيها..بتاسمات على وضعها و قالت...

ساريتا:ريحتها فنة كيف تشهيتها...[حنحنات بخوف]و لكن ما بقيتش مشهية الدلاح ناكلو...

دراغون:تسحابي كانلعب معاك هنا[بنظرة صارمة قايل]بزز من مك غاتاكليها كاتسمعي؟..

ساريتا:[كادمع]علاش كاتغوت عليا دبا قدام ولدك..

دراغون:[علا حواجبو كايشوفها كاتهضر من نيتها]بلا ما تحمقي جد مي..أنا إيمتا غوت عليك!!..

ساريتا:[شهقات كادمع دميعات نازلين]أنا ماشي لخاطري و نتا..نتا باغي توكلني بزز..

دراغون:[شد من عندها ديك الدلاحة و رماها من النافذة معصب و دار لعندها بملاميح مخنزرة]بربي لي خلقني و تقولي لي تشهيت شي دلاح حتى نلوحك من هنا المرة الجاية...

ساريتا:[قفزات مخلوعة سرعان ما بقى فيها الحال ديال بصح و دورات وجهها للجيهة لاخرى]واخا..أصلا ماشي من حقي نتوحم كيفي كيف المزوجات...

دوز يدو على وجهو متنهد بضجر ما عارف كيف يدير معاها...

عرف ماشي لخاطرها و لكن ما دازتش ليه أنه بدقايق كايقلب على الدلاح و صايفط رجالو يقلبو قنت بقنت...كانت صعيبة و فاللخر تقوليه ببرودة ما بقاتش بغاتو!!!!..

دراغون:[خدا يدها بين قبضتو]عارف ماشي لخاط

سكت ملي حس بيدها مرخية...دور وجهها لعندو و لقاها نعسات..بسمة صغيرة زينات شفاهو و طبع قبلة على شفايفها...

دراغون:ما بقيت نذوق النعاس غا بسبابك..نعسي نعسي أ أناكوندتي نتي لي جات معاك...

قادها فبلاصتها و ديمارا اللوطو مكسيري بشوية على حساب حالتها.. ما باغيهاش تنوض تفيق ليه و تصدق قايلة ليه جيب شي حاجة خرى ما كايناش بوقيتها...

وصل الدار بعد دقائق...و تاجه للدار حاملها بين يديه و هي مخشية فيه ناعسة...كان غايطلعها للفوق حتى لمح ضو شاعل فبيت حسناء...

طلع الفوق حطها فالسرير مغطيها مزيان...سرق قبلة خفيفة منها..هز بواطة من الماريو و سد الباب نازل كايماصي عنقو بعياء...

طرق بأصابعو على الباب..ما دازت دقيقة و الا كانت فاتحة حسناء دغيا سرعان ما بتاسمات فاش شافتو...

حسناء:بابا...خاصاك شي حاجة؟..

دراغون:[طبطب على راسها]علاش مزال ما نعستي همم؟..

حسناء:كنت كانحفض فالقرآن شوية حتى يوذن الفجر..

دراغون:[دخل للداخل جالس فوق سريرها و طبطب على بلاصة حداه]أجي لهنا..

تقدمات لعندو بابتسامة جلسات حداه بعد ما سدات المصحف كاتلعب بيدياتها..

حسناء:وصلت دبا للحزب 23...