قصة زواج متقـــف الفصــــل الثاني(التتمة)

bart 279

الفـصـــل الثـاني:ما خــلف الأقــعنة🫦♟️
                ______

      𝑩 𝒂 𝒓 𝒕  279🎲

رقية:وا الله يهديك مالك تغوتي على البنت...تا هي بحالها بحالك عاد البارح عرفات بكولشي...

فاتي:أه أ ماما أنا غير البارح كتاشفت ولد من...ما منتش متوقعة غايكون ولد خو دراغون...

نسرين:[بنبرتها الحادة]إيوااا هانتي عرفتيها...الحمد لله عرفتيها قبل ما ديرو لي يدار...صافي هادشي لي بقى ليا غير نتناسبو مع عائلة البزناز...

رقية:سبق قلتها أنا يا بنيتي لولدي...قلت ليه بلي عائلة البزناز خايبين غا يجيو منها المشاكيل و هانتي تشوفي البزناز تزوج بزز منها و واخا هربات منو لقاها و جابها عندو...

نسرين:[بنبرة حادة قايلة]هي لي عمرها تكون واخا نموت ما نعطيهومش بنتي...بنتي ما شايطاش علينا[دورات عينيها لفاتي]من اليوم ما نشوفش كلامك جا فكلامو و غاتبلوكي نمرتو من عندك كاتسمعي؟..

فاتي:[بزز باش خرجو الكلمات بحزن]و لكن أ ماما راك م

نسرين:[قاطعاتها بنبرة جافة]لي عندي قلتو...و دبا تهزي ديري الغدا...

فاطمة الزهراء تقلقات و على كلامها حزنات...و لكن اش فيدها ما دير ماماها على حق فكلامها..و باش يوافقو على هاد العلاقة غاتبقى فالحلم...

شداتها البكية و ناضت كاتشتف نازلة بعد ما هزات العدس طيبو...مخلية ماماها تنهج معصبة و خوفانة على بنتها...خايفة يطرا ليها ما طرا لساريتا...

رقية:ما شفتيش أ بنتي نسرين بلي قصحتي الهضرة معاها...كريم فاللخر ولد الناس مربي أشنو ذنبو هو...

نسرين:[ضربات على فخادها]ذنبو أنه ولد خو البزناز...الله يقطع ليهم الخبار...وليت خايفة على بنتي يا لالة رقية...خايفة عليها يخرجو عليها و يديرو فيها شي حاجة...

رقية:من حقك تخافي أ بنيتي و لكن اش فجهدك ما ديري...طال الزمان و لا قصار غايجي كريم تال هنا و يبغي بنتكم الزواج..أشنو بغيتو ترفضو؟يصدق مغتاصبها فشي قنت و لا قاتلها و يمرمد وجوهكم فالتراب...

نسرين:لا لا لا هي لي عمرها ما تكون...بنتي ما جايباهاش من الزنقة..كاين المخزن..

رقية:[حطات يد على حنكها]اييه يا بنيتي موحال واش تتعرفي شناهوا البزناز...تسحابي يدهم ما واصلاش تال البوليس...غا الفلوس قاضية الغرض تسكتهم...غير تقبلي يا نسرين بلي المغرف لي تسقات بيه حفيدتي غاتسقى بيه فاتي...و راني وليت خايفة عليها بحالك...

نسرين:[بحزم]الى ما نفعنيش المخزن غانخدم قوة أمومتي و نحمي بنتي منهم بيدي...

قالت هاد الكلام و سكتات نايضة تعطي الحاولي الفصة..مخلية الجدة حايرة فأشنو غادير نسرين باش تحمي بنتها...
             ______________

             فالدرب البزناز

فقهوة شعبية..واخد بلاصتو كالعادة فقنيتة حاجبة على الأنظار...و مقابل معاه عتيق كايشربو فآتاي منعنع...

عتيق:السلعة ديال داك يعقوب عليها إقبال كثير خاصها تزيد توسع فهنا و طنجة و سلا..

دراغون:[بثبات قايل]بلا ما نحتاج نوصيك...رجال ثقة كلفهم بهاد المهمة...من غير طنجة غايتكلف بيها ولدي نزار...

عتيق:[باستغراب]و لكن ما نظنش واش عارف بطريقة الخدمة...خاصو وقت باش يتعلم...

دراغون:مع الوقت غايعرف...

عتيق:يعني على هاد الحساب ايمتا غانبداو نوجدو ليه الدار فين يبقى...

دراغون:من هنا لمن ورى العيد الكبير بيوماين غايمشي لتماك...

عتيق:سمح ليا أ برو على سؤالي و لكن جاتني غريبة بين نهار و ليلة كانشوفك باغي تصايفط نزار ولدك دغيا لطنجة..[سكت للحظة و قال بذعر]ياكما!!

من صمت دراغون بدى يفهم و يتأكد من شكو و تيقن موسع عينيه...