قصة زواج متقـــف الفصــــل الثاني(التتمة)

بارت 369

الفـصـــل الثـاني:ما خــلف الأقــعنة🫦♟️
                ______

      𝑩 𝒂 𝒓 𝒕  369🚬

مشات دات الطباسل للكوزينة و سميحة ناضت للصالون و تبعها أرغد كايتمختر فالمشية...

سميحة:يا ولدي ما بغيت نقول والو قدام بنتك و لكن ماشي بحالا زدتي فيه...مالك على هاد القصوحية القلب مع ولادك..

أرغد:[دوز كفو على وجهو بإهمال]عاوتاني نفس الموال الواليدة ما عييتيش...

سميحة:من بعدي حتى حد ما غايبقى ليهم من غيرك...نتا هو السند ديالهم..[باس ليها يديها بجوج]حتى نزار لي لقيناه من بعد ما سحباه مات خليتيه يبعد واش شفتي قصوحية قلبك فين وصلات ولادك...

أرغد:الواليدة الله يطول فعمرك...الى ضسرتهم غايطغاو و يوليو مسرحين رجليهم فوسط الدار...خليهم يتحاكو مع البنادم و يعرفو بحق الوقت...ملي كانو قرانهم كايقراو و كايوجدو لمستقبلهم...هما كايتسركلو...

سميحة:واش ما كاتشوفش أ ولدي بلي قد ما قسيتي عليهم...غاتبعدهم عليك كثر...

دراغون:[لاح يدو على المخدة]هادوك راه كايبقاو ولادي و عمرني نخليهم و لا نتخلا عليهم...خليت كل واحد يدير ما بغى و لكن خبار كل واحد فيهم كاتوصلني كل نهار...غير رتاحي الواليدة هما بخير...

جات عندهم ساريتا هازة كاس الما و حبة ماداها لسميحة...

ساريتا:هاكي أ خالتي خودي دواك...

سميحة:الله يرضي عليك أ بنتي...غا سمحو ليا وليداتي حتى السفر ما سافرتو بحال الناس بسبابي...

أرغد:[جر ساريتا من يدها حتى جلسات حداه و لاح يد ورى كتفها معنقها و يد عنق ماماه]الليام الجاية طويلة غانعوضو فيها السفر...و لكن الإنسانات القراب لقلبي لي ما غايتعوضوش...

على آخر كلمة دور راسو ناحيتها و هي كاتشوف فيه...قابلها ببسمة صغيرة و هو طابع قبلة فأرنبة نيفها...و باس راس مو لي ما وقفش لسانها من الدعاوي معاهم...
            ______________

اللــــــــيل...

كيف أي ليلة عندها...كاتلقى راسها حاضنة الكراطن من البرد...

و هاد المرة كان ونيسها الدموع...كاتحس براسها خايبة و رخيصة و عاد الكلام من ديك المرا لي واقفة عليها كايزيدو يحرقوها...

المرا:أش بان ليك ها؟...منها تديري لاباس و منها تنقذي راسك من الزنقة و صحتك...و عندي شي كليان ديال الفريع تهلاي فيهم يتهلاو فيك...

نجلاء:[ناضت من بلاصتها قايلة بقهر كاتغوت]الله ينعلك يا الموسخة...نموت و ما نحطش رجلي فداك الوسخ...لعنة الله و عليك الى يوم الدين و على لي بحالك...

المرا:و كاتغوتي فوجهي يا الكلبة تحل ليك الفم ساع سري يانا لي مدخلة بنت الزنقة لداري...[ضربات داك الكرتون برجلها]حيدي عليا من حدى داري يالاه حيدي...

نجلاء ما جاوباتش و زادت مع الطريق كاتلوح رجليها بإهمال...

ولات تبان ليها الدنيا كحلة...ما بقى عندها أمل فالحياة...

ما حساتش بالوقت و هي غادة حدى الديور...حتى حسات بالدنيا كاتدور بيها...

خواو بيها الرجلين و فقدات الوعي...

على اثر الطيحة كانت وصلات لمساميعو و هو كايبرم ناوي يتلذد باللحظة...

عقد الشوفة مخنزر و هو ينوض لايح عليه تيشورت ديالو...

حل الباب و لقى مرا طايحة..شاف فنواحي مستغرب و تحنى لمستواها كاينغزها...

صلاح:لالة..لالة واش نتي بخير؟..[شافها ما كاتحركش مشى جاب الما و رجع عندها دور ليها راسها و تصدم]نجلاء...