" أسفل وادي الربع الخالي "

Part : 85

لا أبيح القراءة بدون لايك
؛
يوم الثلاثاء، أول يوم الامتحان، صحت بدري على الساعة خمس، توضت وصلت، ثم مسكت كتابها تراجع المادة.
حست بشغف للدراسة أكثر بعد ما شافت أبوها، اختفى الكره وتبدلت مشاعر الرحمة والاحترام، لبست المريول وعبايتها وطلعت من الغرفة، شافت مشاري قاعد يفطر بالصالة، ورجعت شوي، محتارة تسلم عليه ولا تتجاهله. قربت منه وهمست: "صباح الخير".
مشاري، بدون ما يناظرها وهو ياكل، رد: "صباح النور".
ريم رفعت حواجبها "ايش فيه ذا؟ ليكون زعلان مني؟ هذا اللي ناقص!"
تنهدت، الأيام اللي فاتت كانت تتجاهله وحركته لما مسك يدها ما عجبتها، والحين هو يتجاهلها.
ريم قالت: "أممم، أبغى جوالك شوي".
مشاري: "ليش؟".
ريم ما توقعت يسأل، بس جاوبت بهدوء: "بكلم عبير تمر لي".
مشاري رفع راسه أخيرًا وطالعها وقال وهو يوقف: "أنا بوصلك".
ريم كانت بترفض بس وهو مشى بتجاهل، تنهدت: "ياربي، وش ماكل ذا؟".
ناظرت أم مشاري الي طلعت من المطبخ، ابتسمت لما شافت ريم وقالت: "يا صباح الورد".
ريم باست راس أم مشاري لأنها حستها عوض عن أمها، همست: "ورد بوجودك".
أم مشاري: "بتفطري؟".
ريم: "لا، مالي نفس، دعواتك لي في الاختبار". أم مشاري: "الله يوفقك يا عمري، جعلك من الأوائل".
ريم رفعت يدها ونظرت للسقف: "آمين، آمين".
لفت وشافت مشاري طلع، استأذنت من أم مشاري وطلعت وراه.
؛
في بيت أبو فارس:
فارس كان قاعد مع إخوانه حول الطاولة والفطور مرتب عليها.
فارس يطالع في وجيه إخوانه ويهمس: "وش السالفة؟ ليه أبوي سافر مع أمي فجأة كذا؟" دانه رفعت يدها وقالت بلا مبالاة: "مدري، يقولون بيسافرون يغيرون جو."
فارس رفع حاجبه مستغرب: "بدوننا؟"
دانه ردت بعصبية: "تراك مو بزر!"
فارس يرد: "أقول لا أفك راسك بالملعقة، بس غريبة يسافرون."
مروان، اللي دايم ما يسكت، فارس همس له بابتسامة: "مروان، تبي تاخذ سيارتي؟"
مروان عرف وش يبغى فارس وقال: "مع الأسف، أنا ما أعرف."
فارس تنهد وقال: "طيب عبير ما قالت لأبوي شيء."
مروان رد: "من يوم خطبها أبوي وهي ساكتة." فارس استغرب وقال: "أنا قعدت يومين برا، ويوم رجعت لقيت البيت كذا، محد طايق الثاني."
وقف وراح لفوق عند غرفة عبير، طق الباب وقال: "عبير، لا تتأخري، عندك اختبار."
محد رد عليه، كان بيفتح الباب بس غير رأيه، يمكن تكون تلبس أو شيء.
فارس يفكر في نفسه: "وش سالفتك يا فارس؟ لا تخرب على نفسك، أهدأ، البنت قاعده تدلع مو مشكله "
؛