رواية : و إن جابة الطاري بقول كان يهمني و مازال .

٩٦+

استغفر الله العلي العظيم و اتوب اليه
—
ليَـان - في نفس اللحظة - البيت
حطت مِيـرال عند امها الهَنـوف النايمة و طلعت من غرفتها بعد اتصال رِحـاب الكارثي

رِحـاب العاقلة اللي ما تطلع منها العيبة خرجت عن طورها و عشان ايش ؟ عشان درجات و دكتور مستفز ؟ ما يسوى يوصل الموضوع للشرطة على هالتفاهة

خرجت و هي حتى ما نشفت شعرها المبلول بعد ما تروشت لأن ريحة الطبخ كانت عالقة فيها بعد ما سوت الغداء و اول ما طلعت من الحمام استقبلها اتصال رِحـاب اللي فجعها و ما خلاها حتى تعرف تبدل ملابسها

على طول ركضت مع الدرج الخلفي من غير تركب المصعد تبي تلحق تشوف وضع مَنـاف و اذا عمها فيصَـل عرف بشيء

لقتهم يصلون الظهر و وقفت عند الباب تنتظرهم يخلصون و هي تعض على شفايفها تفكر بأي كذبة ... مَنـاف مجنون وقت الغضب ينعمي و عادي يمد يده و لا ليش هو و رِحـاب اخوان ؟

مسكت جوالها و ارسلت لها انها بتصرف مَنـاف عبال ما تدخل و تشرح لأبوها السالفة او تكذب عليه بأي عذر و تبقى عنده و تحتمي فيه لأن مستحيل يرد مَنـاف احد غير ابوه

ارسلت الكلام ثم بقت تنتظر حتى خلصوا صلاة و مَنـاف قام و شال السجادة بيده

فيصَـل عمها قام من كرسي الصلاة و انتبه لها ثم اشر لها تدخل و هي رفعت يدها ترفض بأدب : لا معليك مني بس جيت بشوف الغداء عجبك ولا لا و مرة وحده ابي مَنـاف بكلمة راس .
قالت كلامها بحرج و مَنـاف رفع حاجبه مستنكر و عارف عن حيلتها و تمثيلها الكاذب ... يا كثر ما هي و رِحـاب يسوون مصايب و يتكاتفون ثنتينهم لجل يغطون على بعض بس هو مو عارف خطتهم الحين و صاحبه اختصر اللي صار برسالة و كتب بأخرتها انه حصل خير و ماراح يكبر الموضوع

ليَـان ظلت واقفه عند الباب تنتظره ... يصفط السجادة مرتين على مهله ثم يتمشى بالغرفة و هو يقلب بالتلفزيون ... بعدها يسولف مع ابوه الفيصَـل عن السياسة و الاخبار و اخرتها يقرأ بتمعن نشرة الادوية في العلب و يماطل بالوقت على اساس ان رِحـاب بتدخل عليهم بأي لحظة لأن اكيد هذي خطتهم التافهة

ليَـان تلهيه و رِحـاب تحتمي منه عند ابوهم ... يا كثر ما سووها !!

مَنـاف ظل يماطل و ما امداه يفتح فمه يبي يفتح موضوع جديد مع ابوه حتى سحبته ليَـان مع ياقته بتقومه عن السرير : معليش والله عمي احتاجه ضروري و انا تأخرت تدري بعد مِيـرال لحالها تلعب تحت و امها نايمة محد بينتبه لها .
مَنـاف سحب نفسه منها : و الخدامه شوضعها ؟ بعدين روحي للبنت مين ماسكك ؟ .
ليَـان شدت عليه تبيه يقوم : اقولك انا ابيك بكلمة راس ما تفهم ؟ .
فيصَـل طالعها : وش هالموضوع يا بنيتي اللي ما خلاك حتى تنشفين شعرك من الموية ؟ ترا لا مرضتي محد ينفعك ما به شيء مثل العافية .
ليَـان ابتسمت مجاملة و تكمل تسحب بيد مَنـاف : ما انا عشان كذا اقوله يقوم بسرعة قبل لا ابرد و امرض .
قام اخيراً بعد ما ابوه قاله ثم مشى وراها و هي باقي تسحبه مع يده اليمين لبرا الغرفة