رواية : و إن جابة الطاري بقول كان يهمني و مازال .

١٢٨ +

لا اله الا انت سُبحانك اني كنت من الظالمين
—
ليَـان - بعد ايام - فترة ما بعد الظهر -  احد المولات
هي و جُمـانة خرجوا مع فَـاروق لأقرب مول ... يتسوقون فيه هدايا عشان اريَـاف بمناسبة سكنها بشقتها الجديدة و لأنهم ارسلوا لها ان ودهم يزورونها يوم الخميس يباركون لها بالسكن و اريَـاف ما رفضت لأنها عارفه وضع البنات و نفسياتهم و تبيهم يغيرون جو اما السبب الثاني فهو لأن جُمـانة تبي تشتري هدية بمناسبة سلامة سَعـد اللي بيرخصونه من المستشفى اليوم عشان لو زارته بعدين هو و انفَـال ببيتهم

خلصوا مقضاهم و تموا ياكلون بوحده من المطاعم قبل يرجعون البيت ... ليَـان ما صدقت على الله ان مستأجرين بيتها دفعوا الايجار بعد ما كانت على خط الفقر طول هالفترة و حمدت ربي ان الايجار يدفعونه شهري مو سنوي لأنها تصرف الفلوس اول بأول و ما تعرف تدخر ابداً

رفعت عيونها تطالع لـ جُمـانة و كأنها الحمدلله بدت تتغير نفسيتها بعد ما طلعت مع الناس و غيرت جو

تموا يسولفون سوا و يتناقشون اذا لازم يزورون الهَنـوف و امها ببيتهم ولا لا لأن لهم فترة ما شافوا بعض و ودهم لو يتطمنون عليهم
و ليَـان سألت باستغراب و هي تطالع لجوالها : وي ... اريَـاف غيرت كلامها تو مرسلة ان العزيمة بتصير ببيت اهلها بدالها لأن شقتها باقي ما جهزت و الاثاث بيتأخر .
جُمـانة مسكت راسها : تحزن يختي مدري اشبه رجلها ما جهز شقتها كاملة بعدين نكبها قد قالها مُعـتز ان اثاث صالتها بيوصل اليوم ... مفروض ما تزوجها لين جهز كل حاجة عشانها .
ليَـان تنهدت : ودي انه ارتاح دام ذي بدايتها لأني متأكدة زوجاته الباقين ما اخذهم معه الا و هو قد جهز بيوتهم بس مو مشكلة يلا احسن ان العزيمة ببيت اهلها عشان مرة وحده نتحمد بسلامة ابوها سِليـمان قد له اسبوع من طلع من المستشفى ولا زرناه .
جُمـانة وافقتها : اي والله صادقة و زين جبتي طاري الموضوع الحين ، اذا خلصتي اكل قومي خل نروح نشوف له هدية قبل نمشي .
ليَـان قامت و هي تلم اغراضها : ما يحتاج يبنت كلها بوكية ورد و بحط فيه فلوس بلا وجع راس و هَم .
جُمـانة سكتت منحرجة لأن ما بحسابها البنكي الا مبلغ قليل ... كان ببالها تدور هدية على قد الميزانية و ليَـان ما استوعبت الا متأخر و رقعت الموضوع و هي تضحك : بـ-بس خلينا نروح نشوف عادي يمكن نلقى له شيء زين و بنتقاط بفلوسه و عاد البنات الباقين اي وحده مؤكدة روحتها بتجيب هديتها معها لأن للحين ما فيه الا انا و انتِ صاملين على الروحة عشان نوجب .
قالتها و هي تسحبها يدورون على الاسواق و يتفرجون

جُمـانة تركت محلات العطور و دخلت اقرب محل للمستلزمات الرجالية و هي تتفقدها : لولو فيه سؤال ببالي من زمان .
ليَـان همهمت و هي تطالع حولها : وشو ؟ .
جُمـانة استحت و هي تتكلم : اذا حسيتي السؤال قليل ادب لا تجاوبين ، بس صدق ليه انتِ و مَنـاف كل واحد بغرفة و فوقها ما طلعتوا لبيت لحالكم ؟ يعني قلت يمكن عشان عمي فيصَـل ما طلعتوا من البيت لكن فيه بالدور الثالث جناح كامل محد يستعمله غريبه ما اخذتوه ؟ .
ليَـان كتمت ضحكتها : تدرين انك آخر وحده سألت ؟ .
جُمـانة ما فهمت و ليَـان كملت : الهَنـوف و رِحـاب و اريَـاف و يمكن انفَـال بعد بس ماني متذكرة سألتوا نفس الشيء ... السبب الاول هو اني ما حسيت اني ابي اطلع مع مَنـاف ببيت لحالنا يعني انا قد جربت يوم كنت بالرياض معه اذا تذكرين و ما جاز لي الوضع حسيت بضيقه لأني طول الوقت لوحدي دام حضرته دايم طالع و حتى لو قعد معي فبنتهاوش ، السبب الثاني فعلاً انا ما ابي اطلع من البيت عشان اقعد مع عمي فيصَـل حرام بعد هالعمر كله ينهجر و يقعد لوحده محد حوله و هذاك شايفه رِحـاب بتتزوج و بتروح و يَـزيـد اخوي كمان ما ظنتي مطول بعد و عمي بنفسه اصلاً رافض يطلع من البيت ، السبب الثالث اني مستمتعه لأن قعدتي بهالبيت يعني انكم بتقعدون رايحين جايين عليه و تزاوروني و تقدرون تنامون عندي و دايم نجتمع فيه نفس الحين انتِ معي و اسباب كثيره الصراحة مقدر اعددها .