رواية : و إن جابة الطاري بقول كان يهمني و مازال .

١٠٤+

اللهم صلِ و سلم على نبينا محمد
—
يَزيـد - قبل ميعاد الزفاف بيوم - الصباح بالمزرعة
خرج من غرفته على الازعاج بالصالة ... لا ليله ليل ولا نهاره نهار

مَنـاف مستلمهم بالصباح و سُعـود بالليل يغازل ولا احد عارف مين و طَـلال صاحي طول الوقت معاهم ما قد شافه يَـزيـد نايم و اما سَعـد فمن وصل من سفره امس و هو قافل على نفسه بغرفته و يتحجج بالتعب و النوم و بكل الاحوال نومه ثقيل ما يتأثر بازعاج محيطه دام مكيفه شغال على البارد

تأمل الوضع حوله متقرف حتى الفطور ما انتظروه او صحوه و ما فيه الا بقايا من كل شيء و قبل لا يتكلم لفته وقفه طَـلال على عكازة بدال الكرسي المتحرك

انتفض جسمه من غير وعي و قام ناحيته بيلحق عليه ... يحسبها وحده من الاعيب العيال شايلين الكرسي عنه عشان يجبرونه يمشي

يَـزيـد انفعل و خرب يومه من بدايته و اخذ بيد طَـلال يسنده عليه و يعاتبهم لين شافه يمد يده بيهديه : صل على النبي وشبك ؟ ترا مالهم ذنب انا اللي شاري العكاز و مُصر امشي عليهم .
يَـزيـد ما اقتنع و هو يشوف بوادر التعب و الألم على وجه الثاني : و انا كم مرة قايل لك لا تسوي شيء من راسك ؟ هذاك تو طالع من الحمام بالله لو انت زالق الحين ولا طايح مهيب مصيبه و عرسك بكرا ؟ خاف الله فينا يا رجل انا وش فايدتي و غرفتي بجمبك ما حتى دقيت علي اجي اعاونك .
طَـلال تم ساكت فترة لين رد بغصة : امس عاونتني و اليوم هذاك تعاوني و تسندني عليك و يمكن بكرا بس عقبه من بيقوم بي ؟ .
يَـزيـد ما فهمه و كل اللي يبيه هو بس يجلس طَـلال بأقرب مكان لأن الألم باين على محياه : وش لزومه هالكلام ؟ .
طَـلال غصته زادت : تهقي بنت الناس هي اللي بتقوم بمكانك ؟ انا مدري ليه الكل يحسب اني متزوجها عشان تخدمني ! ... هذاك بصحتك ما شاء الله و تتعب لا سندتني عليك من ثقلي فكيف هي الضعيفة ؟ .

يَـزيـد و كأنه عرف بأن مزح سُعـود الماصخ جاء بقلب طَـلال و حاول يهدي الوضع : لا يكون العيال رامين كم كلمة عليك على اساس مزح ؟ انت داري بهم مـ... .
طَـلال هز راسه و هو يقاطعه : محد جاب سيره ، انا بس ما ابي الضعيفة بنت الناس تتحسف على زواجها مني ... وش ذنبها فيني ! اقلها بيوم عرسي ابكابر و بوقف على عكازتي بدال الكرسي قده يوم بالسنة اتحمل فيه ولا اني اندم باقي عمري .
يَـزيـد ما عجبه الكلام و قام يعاتبه : هاللي تسويه مهوب صحيح ، انت يبغالك تبدأ تأهيل تدريجي ولا تزعل مني لك فترة طويلة رافض العلاج و جاي الحين بيوم و ليلة تبي ترجع مثل قبل .
طَـلال طالعه و خاطره متكدر : وش السوات ؟ تكفى تجمل فيني بس بكرا و عاوني ، ما به حد امون عليه غيرك و انت داري مابه اخوان و وحيد اهلي ما ابغاهم يشيلون همي .
يَـزيد اخذ انفاسه و هو يدق له الصدر : ابشر و اخسى اردك لكن لا عاد اسمعها على فمك كلمة تكفى لأنه ما بيننا و انت حسبة اخوي ... وعد مني لأقوم معك بكرا و اسندك من غير ما تقول لي لكن ابي عهد و وَعد منك دام نيتك موجودة انك تصمل على العلاج و تكمل لين تعود احسن من قبل و دام الموضوع ما وصل لعمليات جراحية فامورك بالسليم و انا اخوك .
قال كلامه و هو يسحبه على اقرب كرسي و طَـلال يبتسم له و هو متطمن