رواية : و إن جابة الطاري بقول كان يهمني و مازال .

١٠٦ +

استغفر الله العلي العظيم و اتوب اليه
—
رِحـاب - قاعة الزفاف جهة النساء - ما بعد صلاة العشاء بفترة
على طاولة الطعام بعد ما اخذوا من البوفية ... صمت مهيب محد بادر فيه بالحديث

اريَـاف الثرثارة ما حضرت لأن امها منعتها بعد الكلام اللي طلع عنها و زيجات المسيار ، و كل من سأل عنها تحججوا بأنها مشغولة بتجهيزات زواجها مع مُعـتز و بالحقيقة هي بغرفتها مع مِـيرال الصغيرة بالبيت لحالهم
اما ليَـان جالسة مع انفَـال في احدى الزوايا مالهم نفس بالاكل بس يجاملون اهل عَـواطف لأنهم جلسوا معهم

و جُمـانة و رِحـاب مصدومين من تغير الهَنـوف المفاجئ ... الهَنـوف شخص آخر

صدمتهم من اول ما وصلت من سفرها ... شعرها الطويل المجعد مثل الخراف اصبح قصير و بالكاد ينشاف طوله
اسلوبها الناعم الوردي بالفساتين و الملابس صار كله اما احمر او اسود لا غير
و على طاري الاحمر ... روجها كان احمر صارخ و ثقيل ما يناسب الهَنـوف و تتحجج بأنه عاجبها طالما سُعـود مبسوط

محد تجرأ يعلق اساساً التوتر ما بينها و بين اختها انفَـال يكفيهم فـ حتى هي الثانية من جت من سفرها و هي ما تفارق غرفتها المشتركة مع ليَـان

ليَـان ... اخ رِحـاب كل ما تتذكر اللي سوته فيها بذكرى زواجها الخامسة كل مالها تموت ضحك ، كانت جالسة تقلب الاكل بصحنها و هي تسولف للهَنـوف و جُمـانة عن اللي صار دام هذي فرصتها الوحيدة من غير ما يسمعها احد او تغتالها ليَـان بنفسها

كانت تشرح لهم تخطيطها من البداية مع الفندق و توريهم صورة الكيك بالتجهيزات ثم تضحك و هي تسولف قبل تكشر بحسره
رِحـاب سندت خدها على يدها : ااخخ ما قهرني الا ان كل واحد يحسب الثاني هو اللي مجهز المفاجئة ، مَنـاف بباله انها ليَـان و ليَـان تحسبه مَنـاف و خفت اتكلم و اقول انها انا اللي جهزت و تقب مشكلة بينهم تعرفونهم يحبون المشاكل .
الهَنـوف استغربت : ليه يعني وش بيصير مثلاً ؟ .
جُمـانة ردت و هي تتنهد : تعرفين ليَـان بتبكي عليه و انو كيف تخلي اختك تتدخل بيننا و تسوي كل ذا بدال ما تسويه انت بنفسك و مَنـاف بيقلب الموضوع عليها و يكبره و انه انتِ السبب و ما فكرتي فيني حتى ولا تبينا نحتفل و كلام كثير ماله سنع .
رِحـاب ايدتها : منجد بعدين خلاص الله المستعان بحتسب اني سويت خير و جمعتهم مع بعض وربي اننا سافرنا بعدها مرتاحين .
الهَنـوف ضحكت : اي والله زين و احسن بعد ان اخوك نسى انه قالك عن ذكرى زواجهم بس احس لو ذكرتيه احسن لأن حرام احتفلوا من غير هدايا انا و سُعـود لازم كل سنة هدية .
جُمـانة تنرفزت من طاريه : يوووه يا سُعـودك ذا فكينا منه ، الحين رِحـاب منجدك يعني ليَـان ما ذبحت اخوك ؟ والله معجزة ما صار شيء .
رِحـاب غطت فمها : استغفر الله ما ابي اضحك ، هو انا اصلاً قعدت طول الليلة على اعصابي و ما عرفت انام قلت اكيد ليَـان بترجع او مَنـاف بيتصل و يقول شليها من عندي ... و مدري وش صار و غفيت ما حسيت بنفسي من التعب و على الفجر كذا صحيت اصلي و خذيت عبايتي بنزل اشوف اذا فيه فطور عندهم بالفندق و لقيت الموظفين يركضون بالممر مع مسعف او شيء مدري ما ركزت .
الهَنـوف شهقت : اللهم يا كافي .