رواية : و إن جابة الطاري بقول كان يهمني و مازال .

١٣٢ +

لا اله الا انت سبحانك اني كنت من الظالمين
—
مَنـاف - اليوم التالي - فترة ما بعد العشاء
راجع من بعد دوامه و من بعد زيارته ليَـزيـد بالمستشفى و هو تعبان بالحيل و يفكر ياخذ اجازة ... اجازة لأن نظرات زملاء عمله بالدوام و الناس حوله اهلكته

مصيبة اريَـاف و يَـزيـد على كل لسان و هذا اليوم الثالث من انتشار الخبر ... فيه بعض المتجمهرين قدام البيت يرمون كلام مثل السِم و ما ينفع معهم غير الشرطة اللي تجرهم من قدام البيت و كل احد يقول قصة من عنده و يزود بالاحداث و تشويه السمعة

مَنـاف قعد يدور حول البيت بسيارته اكثر من ثلاث مرات لين المتجمهرين يختفون ... كلهم جماعة اهل مُـعتز و اغلبهم من اهل الحي و عيالهم المراهقين اللي يحبون يمشون مع الموجهة و التصوير لتوثيق اخر الاحداث ... الناس تتوقع ان اريَـاف ولا يَـزيـد احد منهم بيطلع من البيت و يدلي بالقصة ، لكن كل هذا ما يهم لأن حتى لو مُعـتز عنده معارف فـ يَـزيـد عنده كذلك و يقدر يتكتم على موضوع القضية حتى تنتهي ... ما يحتاج تصير رأي عام !

المشكلة في اللي يسرب المعلومات ... لأن المفترض ان هوية الجاني و الضحية مخفية
لكن تجمهر اهل مُعـتز و جماعته قدام باب البيت خلى الانظار كلها تلتفت عليهم

حتى بالمسجد مَنـاف ما عاد يقدر يروح له ... المصلين من اهل الحارة ينقسمون لفئات كثيرة
ناس يتجنبونه ، ناس فضوليين يتعبونه بالاسئلة ، ناس شامتين ضاحكين و مصدقين ، و ناس صامتين ما وقفوا لا مع الحق و ولا الباطل

جماعة اهل مُعـتز و قبيلته امتلوا بالمسجد في كل صلاة ... غايتهم مو العبادة ... بس الاستعطاف !

يروون قصص مؤثرة عن خير و مواقف مُعـتز و ان فعلته بس من حميته و غيرته على شرفه و يطالبون بالتنازل
و مَنـاف في كل مرة يحاول يفتح فمه و يدافع عن يَـزيـد يلقى ضحكات و شماته من احد الجيران القديميين و هو يذكره بسالفته مع مَـرام بنت جارهم حَسـن و فضيحتهم

مَنـاف ما كان يقدر ينكر ... لكن ما يحق للجيران ينسبون الرذيلة لكامل عائلتهم آل بَـدر من الاجداد للأحفَـاد

انتظر لين الشرطة جت و ابعدت المتجمهرين حتى يقدر مَنـاف يدخل بسيارته ... هو حتى مو قادر يوقفها بالشارع لأن الناس وصلت فيهم الجرأة يدمرونها و يتلفونها بقدر استطاعتهم

مثل الأن ، مراهق رمى حجر على زجاج السيارة الخلفي حتى تهشم
مَنـاف انفجر ما عاد قدر يتحمل ... نزل من سيارته و هو متجه له و للباقين

المراهق كان يحط عينه بعينه و هو يستفز مَـناف و يتحداه لو يقدر يواجهه

مَنـاف عطاه لكمه على وجهه لدرجة ان الولد لصق بالأرض من قوة الضربة ... الهوشه كبرت و تدخلت اطراف كثيرة و كلهم ضد مَنـاف محد كان معه