رواية : و إن جابة الطاري بقول كان يهمني و مازال .

١١٦+

اللهم صلِ و سلم على نبينا محمد
—
ليَـان - البيت - غرفة نومها - فترة العصر
كانت على سريرها و بيدها اليمين دفتر و يدها اليسار جوالها على حسابها البنكي ... المنافسة بينها و بين حَنـين كان لها آثار وخيمة

ليَـان على خط الفقر و الافلاس و مديونه بمبالغ لأنفَـال اللي ترجتها قبل كم يوم عشان تسلفها و تشتري فيها من اغلى الماركات دام مصروف مَنـاف ما يكفي و بطاقته الصراف قد رجعتها له من اشهر ... هي وين و هالمصاريف وين ؟ هي بالليالله كل جمعة و سبت تدخل مع جُمـانة و اريَـاف على ارخص مواقع عندهم عروض و تخفيضات و يشترون منها مو لأن ميزانياتهم محدوده الا لأنها مهدوده

اغنى وحده فيهم انفَـال ٥٠٠٠ ﷼ يحطها سَعـد بحسابها شهرياً من غير الذهب و باقي الاشياء لدرجة انها ما تحتاج حتى تلمس مصروفها من كثر ما هو موفر لها كل شيء و اخر فترة عشانه بعيد مدلعها زيادة اما الباقين تحت خط الفقر

رِحـاب مكافئتها الجامعية تروح اقساط ما يبقى معها الا قليل لأن مَنـاف ما عاد صار يعطيها مصروف و هي تستحي تاخذ من ابوها ، و الهَنـوف يكفيها مصاريف بنتها و عاملتها مستحيل احد يطلب منها شيء و اما جُمـانة و اريَـاف على باب الله مرات اهاليهم يعطونهم و مرات لا بحجة انهم ما يحتاجون و حتى لو اخذوا مصروف مصيرهم يحطونه ببنزين لسيارة فَـاروق عشان مشاويرهم

ليَـان تنهدت و هي تمسك راسها و فيها بكية ... وش هالغباء فيها عشان تصرف كل الفلوس اللي كانت عندها على اشياء هي مو بحاجتها ولا تستهويها !
و ما فيه شيء بينقذها غير مبلغ الايجار حق بيتها هي و مَنـاف اللي مأجرته على ناس لكنه مطول عبال ما يجيها ... حسابها بالبنك كان مليان فلوس بس مع سفرها للشرقية عشان زواج طَـلال اضطرت تصرف ما فيه عليها بدايتها كان بالرياض مع رِحـاب يتسوقون ثم الى الشرقية تكمل صرف عليها و على البنات من صيدليات و طلبيات و اسواق و فساتين و حجوزات و مطاعم و مواصلات و مواجيب و هدايا للعروس عَـواطف  ثم خطبة و مِلكة اريَـاف و غيرها من المصاريف الثانية اللي ما تنذكر ، كانت مدلعه نفسها و البنات على الاخر

عضت على شفايفها بقهر ، لو انها تمت قاعده بغرفتها او لبست اي شيء من غير هالتكاليف مو احسن لها ؟
لكن هي خافت تخسر ... تخسر قدام حَنيـن اللي مَنـاف حاط عينه عليها

اول شيء مَـرام و الحين هالزفت الجديدة حَنـين ! ... محسسينها ان مَنـاف اخر حبة

رجعت تحسب مصاريفها و هي تدور بالغرفة يمكن تلقى فلوس طايحه او مَنـاف حاط لها شيء و هي ما انتبهت لكن ما فيه امل ، تقريباً بذمتها لأنفَـال ٣ الاف و لأن مصروف مَنـاف لها مو ثابت فما كانت عارفه شتسوي و متى ترجع لها المبلغ