رواية : و إن جابة الطاري بقول كان يهمني و مازال .

١١٨+

استغفر الله العلي العظيم و اتوب اليه
—
الهَنـوف - بعد اسبوعين - بدايات شروق الشمس
تجهزت و تروشت و جهزت بنتها مِيـرال بعد ما باستها ثم نزلت تفطر مع امها بكل سعادة

اخيراً و اخيراً و اخيراً ، سُعـود و باقي اعمامها راجعين بعد انتظار بالاشهر ... انتهى تقسيم الورث و بيع الاراضي و اخر حاجة اخرتهم كانت بسبب افتتاح سُعـود لمكتب عقار جديد و لأن سيارته تعطلت في اخر لحظة فتصليحها احتاج وقت لذلك اعمامه و هو شخصياً اخذوا تذاكر للرجعة بالطيارة

ثلاث شهور و اسبوعين من اخر مرة شافت ابوها حَمـد فيها و الشوق مليون ... و بهالمناسبة السعيدة العم فيصَـل قرر يسوي عزيمة ترحيب في البيت عنده بعد طول الغيبة

انفَـال اختها قد راحت من يومين مضت لبيت الجد مِتعـب مع فَـاروق لجل تستعد مع ليَـان لهالعزيمة الكبيرة الاستثنائية طالما رِحـاب مشغولة بتجهيزات زواجها لأنها اخيراً وافقت على آسِـر لكنها اجلت موعد الزفاف و عقد القِـران لأسباب شخصية

الهَنـوف حزمت اغراضها هي و امها و بنتها كذلك استعداداً للمبيت هناك ... العم فيصَـل كان مُصر على الجميع يبيت عنده بالبيت بعد هالعزيمة دامه مشتاق بالحيل لأخوانه و بناتهم و وده لو يقضي وقت معهم دام اخر مرة شافهم فيها بزواج طَـلال اللي هو بنفسه تتسائل الهَنـوف هل بيجيب عَـواطف زوجته معه ؟ و وين بتنام ؟

اجلت هالتساؤل لبعدين دام فَـاروق ارسل لها انه جاي ... لبست عبايتها بعجلة و خلت عاملتها تنزل الاغراض و توديها له

ركبت هي و مِيـرال الصغيرة ثم والدتها و هم بطريقهم مروا على بيت السَـالم اخذوا زوجته هِيـلة و جُمـانة معهم بامتعتهم و آخر مشوار كان لبيت هَـالة ام اريَـاف اخذوها معهم دامها لوحدها من زواج بنتها اللي ما دقت ولا اتصلت ابداً و مشغولها بشهر عسلها مع مُعـتز الان

اما الباقين فكانوا قد وصلوا بفارق دقايق معدودة الا فَـايزة ام مَنـاف الوحيدة اللي اعتذرت عن الحضور العزيمة و وَضحـى ام سُـلطان و ولدها كذلك اعتذروا

الهَنـوف نزلت من سيارة فَـاروق بعد ما اخذتها الاحاديث مع جُمـانة طول الطريق و هي تسألها بحرج عن اريَـاف و اخبارها اذا كانت تعرف عنها شيء لكن الثانية جاوبتها بأنها ما تعرف و ولا سألت حتى لأنها اكيد مشغوله مع مُعـتز

اما جُمـانة فكأنها ارتاحت من شافت العاملات قاعدين ينظفون البيت و ليَـان فوق راسهم تتأكد من شغلهم و بخاطرها تدعي لمَنـاف اللي جابهم و انقذهم بأخر لحظة لأن محد من البنات له خلق ينظف او يمسح و هم وراهم عزيمة لأخر الليل

الهَنـوف صعدت لفوق و تلاقت عيونها بأختها انفَـال اللي كانت طالعه من غرفتها ... و كالعادة ما بينهم حديث تجاهلوا بعض