رواية : و إن جابة الطاري بقول كان يهمني و مازال .

١٠٩+

اللهم صلِ و سلم على نبينا محمد
—
جُمـانة - اليوم التالي بعد زفاف طَـلال - الصباح
تحضر الفطور على السفرة بالأرض ... كان خفايف و شويه فلافل جايبها يَـزيـد من اقرب مطعم لهم

محد له خلق يطبخ بعد التعب امس من ليلة العرس ، سفرة الفطور كانت برعاية الحش في الضيوف و اهل عَـواطف و كل شيء حصل بالزواج بالتفصيل من غير ما ينسون احد و على راس السفرة اريَـاف اللي كانت تسمع و الحماس ماكلها دامها ما حضرت امس و تبي سوالف المعازيم و الهَنـوف بجمبها تأكل مِيـرال بنتها و ما هي حول احد مشاكلها مع سُعـود تكفيها

و انفَـال و ليَـان بغرفتهم للحين نايمين و رِحـاب عند اعمامها بقسم الرجال تسلم عليهم و تعطي ابوها ادويته مع فطوره الخاص دامه ما يقدر على اكل المطاعم

جُمـانة الكل كان مستغرب على هدوئها طول امس و ملامحها الجامدة ... توقعوا تعابير الغيرة او الحسرة تبان على وجهها بكل مرة تسمع فيها مباركة لزواج طَـلال او حتى لما تشوف عَـواطف تنزف

محد فاهم انها كانت بطور الصدمة ما هي مستوعبة ، امس حتى و هي ما وقفت معهم بالاستقبال كانت ترحب بالضيوف بكل حفاوة و سعادة و كأنه زفافها نفسه ، تسلم على عَـواطف بالاحضان و تسولف مع اهلها بكل عفوية و حتى انها قامت بالعرس على قد ما تقدر

ضيفت ، بخرت و عطرت ، رحبت و رقصت و حتى انها قلطت الضيوف على الاكل مع عمتها سَـماح ام طَـلال من كثر ما هي كانت مجهزة كل شيء و متكفله باغلب الحجوزات بجهة النساء طالما يَـزيـد كان مجهز كل شيء عند الرجال

بالبداية يحسبونها تبي تبين للناس انه ما همها ثم بعدها اشفقوا عليها و اخذتهم المقارنات بينها و بين عَـواطف و في النهاية قالوا انها تسوي كل ذا بس عشان اي احد ياخذها لولده و تنخطب

كله كان كلام اقاربها و المعازيم ، حطوا الف سبب و سبب من غير لا يفكرون بشيء بسيط و هو انه تسويه من حسن نية

تبي تجمل طَـلال و اهله قدام ضيوفهم دام ماله خوات و امه ما عندها بنات يساعدونها و عماتها كبار سن ما فيهم شده و طَـلال مب ولدهم عشان يتعبون انفسهم لجل عيونه

كانت تشتغل من طيب نية و كمان عشان تشغل بالها تخاف تفضحها عيونها بأنها ضايعة

ضايعة بين مليون احساس ، ضايعة ولا هي عارفه وش تبي !
هي ما تبي طَـلال من نصيبها ... مع ذلك ليش مو قادرة تفرح له ؟

عَـواطف تجنن ، لطيفة و جميلة و تستاهل كل خير ... بس جُمـانة امس ما قدرت حتى تبارك لها من طيب خاطر و بدون غصة

من غير وعي صارت حتى هي تقارن نفسها فيها و تستغرب كيف طَـلال تغير ذوقه بهالسرعة ؟ هذا حسن المنقلب اللي الناس تقول عنه ؟