رواية : و إن جابة الطاري بقول كان يهمني و مازال .

١١٠ +

اللهم صلِ و سلم على نبينا محمد
—
ليَـان - بعد شهرين - بيت الجَـد مِتعـب
مر شهرين و عدة ايام من زفاف طَـلال ، الاوضاع على المعتاد رغم المنغصات

رِحـاب في اوساط الترم الثاني في دراستها الجامعية ، الهَنـوف لوحدها في بيتها مع ابنتها مِيـرال ، جُمـانة و اريَـاف مع اهاليهم و كذلك في بيوتهم

انفَـال الوحيدة المتواجدة رغم اختفاء سَـعد الغريب ... اخر مرة شافه احد فيها كانت ليلة زواج طَـلال من كلم فيها مَنـاف على حرج في انه ياخذ انفَـال زوجته معهم في الرجعة و بقي يحرص عليها لأخر لحظة و كأنه يوادع الجميع للأبد من غير ذكر وجهته او سبب تخلفه و تركه لها

هذي المرة الاولى اللي يترك فيها انفَـال على تعجب الجميع ... ولا احد تجرأ يسأل منعاً للإحراج و التدخل في الخصوصيات

و انفَـال ذاتها ما تستقر في بيت جدهم لأنها خايفة تثقل على ليَـان و رِحـاب لذلك بين الفترة و الثانية تروح تنام عند امها صَـالحة حتى لو كانت ما تبيها ولا ترجع عند البنات الا لو ضاقت فيها الدنيا كلها و وصلت حدها و على هذا الموال طول الشهر تتنقل في البيوت طالما سَعـد مقفل شقتهم و مغير الاقفال حتى يجبر انفَـال انها ما ترجع ... بالنسبة له عادي تثقل على الناس بتواجدها ولا انها تنعزل و تبقى لوحدها بشقتها ما عندها احد

كله كوم و مَنـاف كوم ثاني ، ليَـان من اخر ليلة معاه بذكرى زواجهم و هو متغير عليها ... عطته اللي يبيه بعد لهفته طول هالسنين
و الحين طفى شوقه و اهتمامه كله من غير سبب ... تعبت

تعبت لأن ما عاد لها حيل معاه ... مو هو اللي كان كاره عيشتهم مثل الاخوان ؟ مو هو اللي كان يبيها زوجة بكل ما تعنيها الكلمة من معنى ؟

وش غيره الحين ؟ ولا هو ما يحب الشيء الا اذا كان بالغصب ؟ هو حتى ما لمسها الا ذيك المرة فقط

لو تدري ان ذا اللي بيصير ما كان طاوعته ولا سمحت له ... هي ليش ضعفت له ؟ الان هم في سنتهم الخامسة و من غير مبالغة هي ما تحس بأي تغيير

لهالدرجة طلبها صعب ؟ مشاعره مستحيل تكون لها ؟ و ولا عمره راح يهتم فيها ؟

حست نفسها غبية بالحييل ... حست ان كم كلمة حلوة قالها لها خلتها تذوب باوهام حب وردية كانت بتموت عشانها

توها تستوعب ... ان حتى بذيك الليلة ما قال لها انه يحبها ... هو حتى قالها بالصريح هي تعجبه لكن ما يحبها

غلطتها كملت حتى و هو كان واضح ، هي توقعت شيء هو بنفسه مو قادر عليه

اللي صار بينهم كأنه مجرد تأديه واجب ... مو تصرف و علاقة نابعة من حب

لأن ما بينهم حب ... و هي كذلك ما تحبه فـ ليش الزعل ؟

الظاهر ان رواياتها و قصص الحب الوردية في الافلام و غيره طغت عليها حتى اعمتها عن الحقيقة