Chapter 1142: ဖက်တီးကောင်လေး
ကန်နားရှိ မြက်ထူပြီး မတ်စောက်သော ကုန်းစောင်းတစ်ခုပေါ်၌ ဖြူဖတ်ဖြူလျော် လုံးလုံးတုံးတုံး ပုံရိပ်တစ်ခု ၀ပ်တွားနေသည်။ သူ့မျက်လုံးများက ကန်ထဲရှိ ပုံရိပ်များပေါ်တွင် ရောက်နေသည်။
ထိုသူသည် အလွန်ဝသည့် လူငယ်တစ်ယောက်ဖြစ်ပြီး သူ့ခန္ဓာကိုယ်အပေါ်ပိုင်းကို လှစ်ပြထား၍ မြွေအရေခွံဖြင့် ပြုလုပ်ထားသည့် ဘောင်းဘီတိုကို ဝတ်ဆင်ထားသည်။ သူ့မျက်လုံးသေးသေးလေးများသည် ပြူးထွက်နေပြီး ပါးစပ်ဟောင်းလောင်းနဲ့ သူ့သွားရည်များပင် ကျနေသည်။
ဤရှုထောင့်မှနေ၍ ကန်ထဲက စီစီလျာ နှင့် ရှန်းယင်းယွီတို၏ ကြော့ရှင်းတင့်တယ်သော ခန္ဓာကိုယ်သည် မြင်နိုင်ရုံမျှသာဖြစ်သည်။ သူ သေသေချာချာ မမြင်နိုင်ပါ။ ထို့အပြင် သေသေချာချာ မမြင်ရခြင်းမှာ မိန်းကလေးနှစ်ယောက်က သူတို့၏ ဝတ်ရုံများကို အကုန်လုံး မချွတ်ကြသေးသောကြောင့်ဖြစ်သည်။ သို့သော် ဒီဖြူဆွတ်ဆွတ်ဖက်တီးကောင်လေးသည် အလွန်စိတ်လှုပ်ရှားနေ၏။
ကြယ်အလင်းတန်းတစ်ခု တိုးတိတ်စွာ ရောက်လာပြီး ဖက်တီးလေး နောက် သစ်ပင်ကြီးတစ်ခုနောက်၌ ရပ်တန့်သွားသည်။ ရှီယန် အံ့သြသွားသည်။
ပထမတစ်ခါ ကြည့်ရုံမျှဖြင့် အော်ဒရေးတို့အဖွဲ့ထဲ၌ ထိုဖက်တီးကောင်လေးကို သူ မမြင်ဖူးကြောင်း သေချာနေသည်။ သူ မျက်မှောင်မကြုတ်ဘဲ မနေနိုင်တော့ချေ။
အော်ဒရေး၏ စကားအရ သူမသည် တောနက်ပိုင်နက်ထဲက နတ်ဘုရားကလန်ဝင် သိုင်းသမားများအားလုံးကို သတ်ပြီးပြီဖြစ်သည်။ အသက်ရှင်ကျန်ရစ်သူများသည် သူမနဲ့အတူ ရှိကြပြီး သူမ အမိန့်ကို နာခံလိုက်နာကြသည်။ ထို့ကြောင့် ဒီဖက်တီးလေးက ဘယ်နေရာကနေ ရောက်လာတာလဲ။
တစ်ခါလှမ်းကြည့်ရုံဖြင့် ခန္ဓာကိုယ်အပေါ်ပိုင်း ဗလာဖြစ်နေသည့် ဒီဖက်တီးကောင်လေးသည် လူသားတစ်ယောက်ဖြစ်ကြောင်း သိသာသည်။ သူ့သွင်ပြင်များသည် လူသားတစ်ယောက်၏ ထူးကဲသော သွင်ပြင်ဗီဇနှင့် လိုက်ဖက်ညီသည်။ သို့သော် တစ်ခုခု မူမမှန်သလို ရှီယန် ခံစားရသည်။ ထိုဖက်တီးလေးက သူ့ကို ထူးဆန်းသည့် ခံစားချက်မျိုး ရစေသည်။ လွယ်လွယ်ကိုင်တွယ်ဖြေရှင်းလို့ရမှာမဟုတ်သည့် ဘေးအန္တရာယ်တစ်ခုကို ကြောက်လန့်နေရသည့် ခံစားချက်မျိုးပင်။
