I just Wanna be Hero not Heroine

Chapter 40

ငါက သူရဲကောင်းဖြစ်ချင်ရုံပါ
Chapter 40- နောက်ဆက်တွဲပြဿနာများ

မက်ဒါနာမှာတော့ ရုတ်တရက်စစ်ကူရောက်လာသည့် ဟီးရိုးနှစ်ယောက်နှင့် အတော်လေးစကားကောင်းနေသည်။ တပ်ကူများမှာ ရောက်လာပြီဖြစ်သော်လည်း များများစားစား မကူညီလိုက်ရပါ။ အုပ်စုတစ်ခုက Mad doctor ထွက်သွားသည့်ဖက်သို့ လိုက်သွားပြီး တစ်စုကတော့ ကျန်နေခဲ့ကာ တွင်းနက်ကြီးကို စူးစမ်းလေ့လာနေကြ၏။ ကယ်ဆယ်ရေးဟီးရိုးများ သယ်ထုတ်လာသည့် လူအရေအတွက်မှာ ငါးဆယ်ထက်မနည်းပေ။

"ကိုယ့်လူတော့ အကြီးကြီးစွမ်းဆောင်လိုက်တာပဲ။ ဒီအတိုင်းဆိုရင် တစ်ကမ္ဘာလုံးကတောင် မင်းနာမည်ကို သိသွားနိုင်တယ်။ ကမ္ဘာ့ရာဇဝတ်ဂိုဏ်းကြီးရဲ့စမ်းသပ်ခန်းတစ်ခုကို ဖော်ထုတ်နိုင်ခဲ့လို့လေ။"

ဖရန့်က မက်ဒါနာ၏ပခုံးကို အားပြင်းပြင်းဖြင့် ပုတ်လိုက်ရင်း အားပေးနေသည်။ အထဲတွင်ရှိနေသည့် မက်ဒါနာကတော့ လည်ချောင်းထဲပျို့တက်လာသည့် သွေးတချို့ကို ပြန်မျိုချလိုက်ရင်း ခပ်လှမ်းလှမ်းတွင် သွားရပ်နေလိုက်၏။

"ဟေး... ငါက မင်းကိုအားပေးတဲ့အနေနဲ့ ပခုံးပုတ်ပေးနေတာလေ။ မင်းက ဘယ်ကိုသွားနေတာလဲ။"

"ဆောရီး၊ ငါခုဏက ဒဏ်ရာရထားတယ်လေ။ မင်းပုတ်တာ မခံနိုင်ဘူး။" မက်ဒါနာက ပွင့်ပွင့်လင်းလင်းပင် ပြန်ဖြေလိုက်သည်။

'ချီးထဲမှ၊ ဒီငနှဲက သူ့ခန္ဓာကိုယ်ကြီးမှအားမနာ ငါ့ရဲ့နုနုရွရွခန္ဓာကိုယ်လေးကို လာရိုက်နေတာပဲ။ မုန်းဖို့ကောင်းလိုက်တာ။' အစောပိုင်းက အိုက်ဇာဝါနှင့် တိုက်ခိုက်ခဲ့သဖြင့် မက်ဒါနာမှာ အတော်လေးဒဏ်ရာရထားပြီး ဖရန့်လက်ချက်ကြောင့် ဒဏ်ရာများ ပြန်ထလာခြင်းဖြစ်၏။ သူ့ခန္ဓာကိုယ်အသစ်က ယခင်ကထက် ပိုအကြမ်းခံပြီး သူကိုယ်တိုင်ကလည်း ယခုထက်ဆိုးသည့် သေလုမတတ်ဒဏ်ရာများကို ခံစားခဲ့ဖူးသောကြောင့် အခုထိတောင့်ခံနိုင်နေသေးခြင်းဖြစ်သည်။

"ဖရန့်၊ သူ့ကိုထားလိုက်စမ်းပါ။ ငါတို့တွေမှာ လုပ်စရာရှိနေသေးတယ်လေကွာ။" လူကန်က ဝင်ပြောလိုက်သည်။ လောလောဆယ် သူကနယ်ခံဟီးရိုးတချို့ကို အခြေအနေအကြောင်း ရှင်းပြနေ၏။ ဖြစ်ခဲ့သည့်တိုက်ပွဲက သေးသေးလေးမဟုတ်သဖြင့် သတင်းထောက်တချို့လည်း ရောက်လာကြသည်။