I just Wanna be Hero not Heroine

သတင်းကျွတ် အပိုင်းပို

ငါက သူရဲကောင်းဖြစ်ချင်ရုံပါ
သတင်းကျွတ် Bonus Chapter -

ညနေစောင်းလာခဲ့ပြီ။

ရွာငယ်လေးအတွင်းရှိ လူကြီးလူငယ်များက စက္ကူများဖြင့်ပြုလုပ်ထားသော မီးပုံးလှလှကလေးများကို သူတို့အိမ်ရှေ့တွင် ချိတ်လျက် အလှဆင်နေကြသည်။

ဆံရစ်ဝိုင်းလေးနှင့် ကောင်မလေးတစ်ယောက်ကတော့ ထိုမီးပုံးလှလှလေးများကိုကြည့်ရင်း ပျော်ရွှင်စွာ အော်ဟစ်လိုက်၏။

"သတင်းကျွတ်ရောက်ပြီ၊ ရေး....။"

ထိုကောင်မလေးနှင့် ဘေးချင်းကပ်လျက်လျှောက်နေသော လူငယ်လေးက ကောင်မလေးကို ရှေ့တအားပြေးမထွက်အောင် သတိပေးလိုက်သည်။

"သစ်ရွက်လေး၊ အရမ်းမပြေးနဲ့။ ခလုတ်တိုက်လဲလိမ့်မယ်။"

ထိုသို့ပြောလိုက်သော လူငယ်လေး၏ဆံပင်များက သာမန်လူများနှင့် ကွဲထွက်နေသည်။ သွေးလိုရဲရဲနီပြီး အဝေးမှကြည့်ပါက မီးတောက်လိုထင်ရသော ဆံပင်များရှိ၏။

ရှေ့မှလွတ်လပ်စွာ ပြေးနေသော ကောင်မလေးကတော့ အသက်ဆယ့်နှစ်နှစ်အရွယ်မျှသာရှိသေးပုံပေါ်ပြီး ဆံရစ်ဝိုင်းပုံစံဆံပင်လေးနှင့်ဖြစ်ကာ သူလှုပ်ရှားလိုက်တိုင်း ဆံမြိတ်တို့က အသက်ဝင်စွာ လှုပ်ရှားသွားသည်။

သူတို့နှစ်ယောက်လုံး၏ကျောပေါ်တွင်တော့ ကြိမ်ပလိုင်းလေးများကို ကိုယ်စီလွယ်ထားကြ၏။ သူတို့နှစ်ယောက်ကိုတွေ့သော ရွာသားများက လေးစားစွာဖြင့် နှုတ်ဆက်ကြသည်။

"မင်္ဂလာညနေခင်းပါ နတ်ဆေးသမားတော်လေး။"

"ပျော်ရွှင်စရာ သတင်းကျွတ်အခိုက်အတန့်လေးဖြစ်ပါစေ။" ရွာသားများ၏မျက်နှာများပေါ်တွင်တော့ စစ်မှန်သောအပြုံးများက ကိုယ်စီ။

"သတင်းကျွတ်ရောက်ရင် လူကြီးသူမတွေကို ကန်တော့ရတယ်တဲ့။ သမီးက မိဘတွေမရှိတော့ ဆရာ့ကိုကန်တော့ရမှာပေါ့။ ဒါပေမဲ့ ဘာလို့ဒီလိုပွဲမျိုးကို ကျင်းပကြတာလဲဆိုတာကျ ရွာကလူတွေက သေချာမသိကြဘူးရယ်။ ရွာက အသက်အကြီးဆုံးဖြစ်တဲ့ ဖိုးဖိုးသုတတောင်မှ လိမ့်ပတ်လည်အောင် မပြောဘူးရယ်။ ဘုရားက ကောင်းကင်ပေါ်ကနေ လူ့ပြည်ကို ပြန်ဆင်းလာတဲ့နေ့လို့ပြောတာပဲ။"