ငါက သူရဲကောင်းဖြစ်ချင်ရုံပါ
V4 Chapter 1 - မနက်ခင်း
မနက်မိုးလင်းလို့ မျက်လုံးဖွင့်ကြည့်လိုက်တော့ ဘေးနားမှာ အားရပါးရအိပ်ရင်း ပါးစပ်ကြီးဟပြီး ဟောက်နေတဲ့ အသုံးမကျတဲ့ အိမ်စေမလေးအေမီကို မက်ဒါနာတွေ့လိုက်ရတယ်။ ဒါပေါ့၊ ဖရာလီတာ မရှိတော့တဲ့နောက် အခန်းခအလကားရှင်းပေးမယ့်သူမရှိတော့တာနဲ့ ခြွေတာရေးအကြောင်းပြပြီး အေမီကိုသူနဲ့တစ်ခန်းတည်း အိပ်ခိုင်းထားတာ။ တစ်ယောက်တည်းဆို အထီးကျန်လို့လည်းပါတာပေါ့။
ဒီရက်ပိုင်း စိတ်ဖိစီးစရာတွေများလို့လားမသိပေမဲ့ သူ့တစ်ကိုယ်လုံး နုံးချိနေသလိုပဲ။ ဘာကြောင့်မှန်းမသိပေမဲ့ ခုရက်ပိုင်း သိပ်လည်းပြုံးပြုံးရွှင်ရွှင်မနေနိုင်ဘူး။
ဖရာလီတာတစ်ယောက် ဘယ်တုန်းကမှမရှိခဲ့ဖူးသလိုမျိုးပျောက်သွားတာ အခုဆိုရင် တစ်ပတ်ပြည့်တော့မယ်။ သူ့ကိုလိုက်ရှာဖို့အတွက် မက်ဒါနာက တိုကျိုအစည်းအရုံးကို အကူအညီတောင်းခဲ့ပေမဲ့ ဟီးရိုးအစည်းအရုံးတောင်မှ ဒီကောင်မလေးကို ခြေရာခံဖို့ မတတ်နိုင်ခဲ့ပုံပဲ။ ဖရာလီတာပျောက်သွားပြီးနောက် မက်ဒါနာဖက်မှာ ကိစ္စတော်တော်များများဖြစ်ခဲ့သေးတယ်။
ဥပမာအားဖြင့် တိုကျိုက မြူတန့်သိပ္ပံသုတေသနစခန်းတစ်ခုထဲ ဝင်စီးခဲ့တာမျိုးပေါ့။ ဘာမှထူးခြားတာရှာမတွေ့ခဲ့ပေမဲ့ မြူတန့်သိပ္ပံတွေ အကြီးကြီးကြံနေမှန်း သူတို့သိလာတယ်။ နောက်သူတို့သိလိုက်ရတာက ရုရှားမှာလိုမျိုး နိုင်ငံနဲ့ဟီးရိုးအစည်းအရုံးရဲ့စစ်ပွဲက ကမ္ဘာအရပ်ရပ်ဆီပြန့်နှံသွားတော့မယ့်ပုံပဲ။ အမေရိကန်စီအိုင်အေလက်အောက်က မြူတန့်ဌာနစိတ်ဟာ တိုကျိုအစည်းအရုံးနဲ့ မြူတန့်သိပ္ပံလက်ကျန်ဖော်မြူလာတစ်ခုအတွက် တိုက်ပွဲဖြစ်ခဲ့ပါတယ်။
နောက်ထူးခြားချက်တစ်ခုကတော့ အဲဲဒီစွန့်ပစ်ခံစခန်းထဲမှာ အချိန်အကြာကြီးပျောက်နေခဲ့တဲ့ လီဆာလေးကို ပြန်ရှာတွေ့ခဲ့တယ်။ လီတာလေးကို ဆုဗာနာမှာ ကြေးစားစစ်သည်တစ်ယောက်ဖြစ်တဲ့ ဓားနတ်ဆိုးပြန်ပေးဆွဲသွားပြီးကတည်းက သူတို့မတွေ့ရတော့တာ။ ခုပြန်တွေ့တော့လည်း မွန်းစတားလုံးလုံးဖြစ်နေပြီ။ ဒါတွေအားလုံးက မြူတန့်သိပ္ပံက လီဆာရဲ့DNAကို အလွန်အကျွံထုတ်ယူဖို့လုပ်ရာကနေ ဖြစ်လာခဲ့တာ။
YOU ARE READING
I just Wanna be Hero not Heroine
Teen Fiction"ဘုရားသခင် ငါ့ရှေ့ကိုလာခဲ့စမ်းပါ။ ငါမင်းကို နုပ်နုပ်စင်းပစ်ချင်လို့ပါ။ ငါက သိပ်လှတဲ့ ချစ်သူလိုချင်တာဟ။ သိပ်လှတဲ့ ကောင်မလေးဖြစ်ချင်တာမဟုတ်ဘူး။" မင်းလွင်ဟာ အမြဲတမ်း စူပါဟီးရိုးဇာတ်ကားတွေထဲကလို အစွမ်းရှိဟီးရိုးတစ်ယောက် ဖြစ်ချင်သူပေါ့။ ဒါပေမဲ့ စိတ်ကူးက...
