ဂန္တဝင်ဂိုဏ်းချုပ် အတွဲ(၅) End (Unicode)

၁၂၉၁ မှ ၁၂၉၅

စာစဥ် ၆၇ : အပိုင်း ၁

အပိုင်း ၁၂၉၁ : ဖုံးကွယ်ထားသော စွမ်းအားများ

ဇူဟုန်ဝူ၏ ခန္ဓာကိုယ်သည် တော်ဝင်နန်းတော် အတွင်းမှ ရွှေရောင် စိတ်ဝိညာဥ် ရေအိုင်အတွင်းတွင် ရှိနေသည်။ သူ၏ ခန္ဓာကိုယ် တစ်ခုလုံးအား စိတ်ဝိညာဥ် ရေအိုင်အတွင်းတွင် စိမ်ထားပြီး သူသည် နှစ်ခြိုက်စွာ အိပ်မောကျနေသည့် အလား သူ၏ မျက်လုံးများကို ပိတ်ထားသည်။ လျှမ်ပန်း၏ လေးလံလှသော သက်ပြင်းကို ကြားခဲ့ရသော အချိန်တွင် သူ၏ မျက်လုံးများက ပွင့်လာ၏။

ဇူဟုန်ဝူ၏ အမူအရာသည် တည်ငြိမ်နေကာ ဇူရီ၏ အနိုင်ယူမှုကို ခံခဲ့ရသော အချိန်မှ ခံပြင်း နာကျည်းမှုများနှင့် အမျက်ဒေါသတို့ မရှိနေတော့ပဲ သူ၏ မျက်လုံးများ အတွင်းတွင် ထူးဆန်းသော အရောင်များဖြင့် တောက်ပလာသည်။

အနီရောင် အလင်းတန်းများက သူ့ခန္ဓာကိုယ် အတွင်းတွင် တုန်ခါနေပြီး သူ၏ စွမ်းအားနှင့် အသွေးအသား အဆီအနှစ်များသည် ဖရိုဖရဲ ဖြစ်နေသည်။ သူသည် သူတို့အား သေချာစွာ ထိန်းချုပ်နိုင်စွမ်း မရှိသေးသော်လည်း သူ၏ စိတ်အခြေအနေမှာ ယခင်ကထက် များစွာပို၍ တည်ငြိမ်လာခဲ့ပြီ ဖြစ်သည်။

သူ၏ ဘဝအတွင်းတွင် အကြီးမားဆုံးသော ကပ်ဆိုးကို ဤရက်ပိုင်း အတွင်းတွင် ကြုံတွေ့ခဲ့ရသည်။ အံ့ဖွယ် ကောင်းကင်ဘုံဂိုဏ်းက ပို၍ သန်မာလာသည်နှင့် အမျှ သူ့အပေါ်မှ ဖိအားသည် ပိုမို ကြီးမားလာသော်လည်း ဇူရီသည် ယခုကဲ့သို့ သူ၏ ကိုယ်ပိုင်စွမ်းအားများဖြင့် သူ့အား ချောင်ပိတ်မိအောင် ဖိအားပေးနိုင်လိမ့်မည်ဟု တစ်ခါမှ မတွေးဖူးခဲ့ပေ။

မဟာကျိုး အင်ပါယာကလည်း အံ့ဖွယ် ကောင်းကင်ဘုံဂိုဏ်းမှ တပ်များကြောင့် ကြီးမားသော ဖိအားများနှင့် ရင်ဆိုင်နေရသည်။

ဇူဟုန်ဝူ၏ တစ်သက်တာ ဂုဏ်သိက္ခာသည် တစ်ခဏ အတွင်းတွင် ပျက်စီးသွား၍ လျှမ်ပန်း၏ ထီးနန်းကလည်း ဆုံးရှုံးသွားသည်။ သူ့အား သစ္စာရှိသော မှူးမတ်နှင့် လက်အောက်ခံများသည် သူနှင့်အတူ ကမ္ဘာအဆုံးသို့ ထွက်ပြေး၍ ယင်ပင်လယ် အတွင်းသို့ ရောက်လာခဲ့ကြသည်။