#ليس_ذنبي ❤️‍🔥

دخلنل نجريو و الي يعرضني نسالو لين سمعت صوت ورايا عيطلي " انت يحيى "
تلفت مستغرب نلقاها مرا مش كبيرة تغزرلي كانها تعرفني " أي انا يحيى .. انت الي كلمتني مش هكا "
" أي انا " دورت عيناها علينا الكل و كملا تحكي " لازم تقابل الطبيبة و تحكي معاها قبل ما تقابل قمر "
" علاه ؟؟؟ شفما تكلم " هبطت دمعة من عيناها دخلتني بعضي نسمع ي امي تتكلم " يا وخيتي ويني قمر شصارلها شفما "
" ما تخافش قمر راقدة زرقتلها الطبيبة "
قصيت علاها " ويني الطبيبة خليني نفهم شصار " شدتني من يدي و غزرتلي غزرة مافهمتهاش تتكلم "برد عصابك و حاول تهدي و حط في مخك انو قمر ماعندها حتى دخل "
كلمتها لخرا دخلتني بعضي و حسيت روحي فهمتها اما كذبت روحي و دخلت لطبيبة نجري
" ويني قمر ؟ شصارلها ؟؟ "
" هدي روحك مسيو خلينا نحكيو .. مدموازال قمر جاتنا في الفجر جابتها مدام رفيقة ..
قصيت علاها " منين جابتها وين لقاتها .. عملت اكسيدون مش هكا ضربتها كرهبة ؟
" لا مسيو مش اكسيدون .. مدموازال قمر تعرضت لعملية اغتصاب
حسيت الدنيا الكل وقفت لحظتها على كلمتها نسمع في خالتي حسنة صاحت صيحة قسمتلي ظهري مانجمتش لا نتلفت لا نقوم نحس في الدنيا ظلامت و سكتت و انا قاعد ندور في دوامة كبيرة .. تمنيت كان مت و ما نسمعش الي صار في قمر
هبطت دمعة من عيني حرقتاي قلبي و تكلمت " نحب نرا قمر نحب نراها"
" أي تنجم تراها اما لازم تكون سيس معاها حالتها النفسية تاعبة .. تعرضت لصدمة قوية علاها لازم تكون هادي معاها ..هي ملي فاقت و هي تنادي باسمك ..لازم انت تاقف معاها ."
حسيت بالعجز بعد كلامها .. قمر كانت مستحقتلي و تنادي عليا و انا ماكنتش معاها و انا بعيد على صغرونتي .. زعمة شعملو فيها .. فقت من سرحتي على صوت الباب الي تحل .. ما صدقتش الي ريتو هاذي قمر ؟ هاذي قمرتي الضاوية ؟؟ كيفاه طفات هكا شبي وجها هكا تاعب شعرها مفرفش .. قربت منها نثبت فيها حسيت بالدم فور كيف ريت الضربات الي في وجهها و التراس الي موجودين في شفايفها و رقبتها .. كيفاه هانت عليهم كيفاه وجعو صغرونتي ؟ كيفاه مسو حاجة مش متاعهم ؟ كيفاه قهروها و قهروني .. من دمعة ولاو دموع نبكي علي نرا فيه و علي تخيلتو كيفاه قمر عدات الليلة من غيري .. مديت يدي نمسح على شعرها كان لقيت نخباها بين ظلوعي و نهرب بيها .. قربت منها خالتي حسنة تبكي و تحكي " شعملو فيك يا بنيتي .. يهلكهم ربي .. حرموك من فرحتك حرموك من شرفك .. ياربي كيفاه بنتي بش تتحمل الشي هذا يا ربي بنتي مازالت صغيرة "
أمي و مدام رفيقة كانو قدام الباب يبكيو .. بكاهم و كلام خالتي حسنة زاد خنقني حبيت نهرب و مانجمتنش لوين بش نهرب و  خلاها ؟
ريتها بدات تتلملم و تحاول تحيل في عيناها .. عيناها كانو منفوخين من البكا و شوافرها مبلولين .. شفايفها حمر مجروحين و شايحين .. كانت عندها ضربة في خدها و جبينها .. بقيت نثبت فيها و فلبي ينزف دم .. فصت عليا سرحتي فيها كيف سمعت صوتها كانت تهمس بصوت مبحوح " ي يحيى .. يحيى جيت ؟
" أي جيت ياروحي هاني معاك متخافش "
طرشقت بالبكا " يحيى سامحني سامحني " تلفتت لامها تحكي " امي سامحني مش ذنبي والله "
" نعرف وراس بنتي نعرف و مسامحتك مسامحتك يا روحي"
تلفتتلي تحكي " يحيى يحيى قول أي حاجة "
حسيت لحظتها اني بكشت ماعرفتش شنية نقول حبيت نعنقها و نطمنها و نقولها سامحتك اما مانجمتش ماعرفتس علاه ما لقيت روحي كان نلوم فيها بيني و بين روحي قلتلها ما تخرجش قلتلها راي الدنيا فارغة اما هي راسها صحيح
" يحيى ما تخلينيش امان "
كلمتها كانت كيف سطل الماء الي طاح عليا حسيت روحي بردت تلفتلها نحكي " شكونو ؟ شكون الي عمل هكا ؟ تعرفو تكلم قمر تعرفو ؟؟ وين صارت لحكاية " كنت نتكلم و نصيح في لحظة حسيت روحي تقلبت و ماعادش شايف قدامي كان الطحان مولا لعملة .. " فـ في السانية الي بعد الكوشة "
" شمهزك غادي انا شنية وصيتك قمر "
قصت عليا امي تحكي " مش وقتو لكلام هذا عيش ولدي خلاها ترتاح تو "
" لا لا لازمها تتكلم تو .. تكلم قمر شكونو ؟
" ما نعرفهمش و الله لا نعرفهم "
بقيت نغزرلها نحاول نستوعب في كلامها " ما تعرفهمش ؟ علاه قداه هوما تكلم قمر تكلم تكلم "
" زوز .. كانو زوز زوز شدوني في السانية شدوني سيف علياا زوز الي قتلوني "
سكرت وذنيا و صحت " سكت اسكت قمر اسكت .. دمرتنا راك كان سمعت الكلام مرة في حياتك راو هذا الكل ماصارش اسكت امان اسكت "
خرجت نجري و خليتها تبكي بالشهقة خرجت وانا ما نرى في شي كان في حالتها هي و شنية صار فيها .. خرجت و ما عرفتش وين نمشي كيفاه بش نقابل لعباد؟ شنية بش نقولهم ؟ نقولهم راي خطيبتي عدات الليلة بين يدين زوز رجال استفعلو فيها .. نقولهم راو قتلوني و قتلوها .. بقيت نمشي نمشي لين نلقى روحي وصلت لدار الي قاعدين نبنيو فيها الي بش ندخلولها عرايس .. الدار الي تهدمت قبل ما تتبنى .. كل شي وفا .
#سمرعياري🍓