#ليس_ذنبي ❤️‍🔥

حلقة 30

الحلقة 30
#قمر_تحكي

من اخر مرة حكيت فيها مع ليث حسيت روحي ارتحت شوي ,, وجودو هو وخالتي في حياتي خلاني نحاول ناقف على ساقيا من جديد ,, رغم انو صعيب نتعدي الي صارلي اخر فترة .. اما لازمني نقاوم .. لأول مرة بعد خالتي نجمت ناثق في انسان اخر .. وعد ليث وكلامو معايا خلاني نصدقو .. صحيح مانراهوش ياسر من وقت خروجو للخدمة يروح كان في الليل بش نبقى على راحتى في دارو اما نسمعو كيف يطلب خالتي و يسال علينا و بعد الليلة هاذيكا وليت نفيق بيه ساعات يطل يطمان عليا من بعيد .. هذا الكل خلاني نحس براحة.. وجودو حتى من بعيد خلاني مطمانة .. يكفي انو خلاني انجم نهد السور الي بنيتو ونجمت ناثق فيه ..
اليوم نهار جديد حليت عينيا شوي شوي مع ضو الشمس الي ضرب في وجهي و ريحة القهوة الي تحضرها خالتي كل صباح .. وجودها معايا حسيتو عوض من عند ربي بعد الي عشتو الكل .. هزيت روحي قمت عملت دوش خفيف لبست روبة طويلة في الازرق و خليت شعري محلول شوي .. اليوم وين غزرت لروحي في المرايا وثبتت فيها ملييح .. توحشت تصويرتي القديمة .. بش نعمل المستحيل و نخلاها ترجع بش نعفس على ضعفي ونتقوى و نرجع كيف قبل .. كان مش على خاطري على خاطر امي بش نخلاها مطمانة في قبرها و على خاطر خالتي وليث الي وعدتهم .. هزيت روحي وخرجت من البيت هبطت في الدروج ريتهم قاعدين يفطرو قربت منهم تبسمت نحكي
" صبااح الخير "
تلفتلولي الاثنين وتبسمولي غزرت لخالتي الي حلت يداها ناحيتي تحكي
" صباح النور قميرة .. ايجا حذايا ..  لباس ياروحي؟؟ "
قربت بخطواتي ناحيتها .. قعدت جنبها حطيت يدي فوق يداها و كبست علاها نحكي " الحمدالله ..نحس في روحي خير اليوم "
" الحمدالله يا ربي انشالله ديما هكاا"
هزيت عينيا مع صوت ليث يحكي " فرحتني .. خليك ديما هكا  "
هزيتلو براسي باهي و تبسمتلو تلفت لخالتي تحكي
" قمر .. انا ليوم ماشية للفيرمة .. ماو تعرف حاطيتها للبيع والبارح كلمني شكون يحب يشوفها .. لازمني انظفها.. تمشي معايا؟؟ "
" لااا خالتي .. مانجمش نعفسها البلاصة هاذيكا مرة اخرى .. خليني هناا انا "
تلفتت لليث كيف قام من بلاصتو يحكي " ماتتقلقش كيف تبقى وحدك ؟؟ كان تحب تنجم تمشي معايا للبيرو مايقلقنيش "
" لااا امان مانحبش نخرج .. خليوني في الدار ما يصيرلي شي ماتخافوش عليا "
قربت مني خالتي شوي تحكي " لوقتاه بش تبقى حابسة روحك في الدار ؟؟ لازمك تخرج شوي "
" حاسة روحي مازالت مش حاضرة لحتى شي .. اعطوني شوي وقت "
هزيت راسي مع ليث كيف لبس الفازت متاعو خارج يحكي " بااهي خليك على راحتك .. اما من غير لا نوصيك كان صارت اي حاجة كلمني نصف ساعة ونكون حذاك "
" باهي تهنى  "
اول ماخرج هزيت كاس قهوتي وخرجت لتراس خرجت ورايا خالتي قعدت بجنبي تحكي
" احكيلي كيفاه تحس في روحك ؟؟ ماتحاولش تخبي عليا وتمثل الي انت لباس ,, كان فما حاجة مقلقتك احكيلي "
عديت بلساني على شفايفي و خذيت نفس مليت بيه رواريا نحكي " صدقني يا خالتي لباس .. ماعنديش حل اخر غير اني نكون لباس وناقف من جديد .. وجودك معايا عاطيني قوة والله .. حتى ليث وجودو معايا ووعدو ليا خلاني نحس الي غدوة بش يكون في صالحي .. بش نتعدا هذا الكل .. نعرف ثنيتي طويلة و مانعرفش شنوة مازال مخبيلي اخر اما انا نلغي الضعف متاعي حتى بالكذب لازمني نكون قوية وحاضرة لأي شي اخر  "
قربتلي ودورت يداها عليا حطيت راسي على صدرها " اكيد هذا الكل بش يتعدااا .. الدنيا بش تضحكلك مرة اخرى كون متاكدة .. رد بالك تنسى كلامي كيف قتلك انو هذا الكل امتحان من عند ربي و هو عارف قوتك و صبرك و بش يخليك تتجاوز هذا الكل.. والي صار الكل رغم صعبو ووجيعتو مع الايامات بش يبقى كلام و الوقت كافي انو يداوي الجروح قميرة ..  "
غرست راسي في صدرها وخذيت نفس من ريحتها الي نحسها كيف ريحت امي تبسمت نحكي "نعرف ..  ربي يخليك ليا خالتي .. نحبك برشة .. عمري ماننسى الي عملتو معايا واليوم من جرتي انا بش تبيع دارك .. سامحني و انشالله نقدر نعوضلك هذا الكل"
بعدتني علاها حاوطتلي وجهي بيداها الزوز تحكي
" معادش تقول هكا .. انت بنتي وهذا مش مزية .. على خاطرك نعمل كل شي .. انت في مقام "رفيف" بنتي ماتنساش هذا "
بستها بالقوي من جبينها تبسمتلها نحكي " هيا ما تتعطلش اكثر مني .. امشي بش تحاول ترجع بكري "
" متاكدة تنجم تبقى وحدك .. ماتخلينيش متحيرة قمر "
قمت و قومتها معايا حطيت يديا فوق يداها نحكي
" ماتتحيرش .. والله مايصيرلي شي ..  اي حاجة انا نكلمك غير تهنى .."
" باهي يا روحي "
اول ما بقيت وحدي وفرغت الدار حسيت بالخوف سيطر علياا ماعرفتش السبب اما لحظتها تاكدت انو احساس الوحدة مانجمش نعيشو مرة اخرى و مستحيل كان انجم نكمل في الثنية هاذي من غيرهم واني ناخذ في قوتي و طاقتي من عندهم ..
عديت بيديا على وجهي حاولت نهرب الافكار الي هدت عليا فجاة ودخلت للكوجينة حبيت نلهي روحي شوي حتى خالتي تجي ..
مانعرفش قداه تعدا وقت والدنيا بدات تظلام حضرت طاولة العشا ودخلت لصالة نستنى فيهم هكاكا وسمعت الباب دق تنطرت من بلاصتي حليتو من غير لا نسال شكون .. هزيت راسي معاها نغزرلها اول ماريتها قدامي حسيت بالدم جمد في عروقي اخرانسانة تمنيت اني نعاود نشوفها بعد الي صاار .. بلعت ريقي بسيف تقويت على روحي نحكي " ش.. شتعمل انت هنا ؟؟"
تبسمتلي من غير ماتجاوبني دزتني ودخلت من غير حتى استئذان .. وقفت في وسط الدار تعدي في عيناها على كل تركينة .. سكرت الباب و خذيت نفس قربتلها بسيف وقفت قدامها غزرتلي و ضيقت عيناها تحكي
" شنوة ؟ فيسع مانقلت حذااه .. ماصبرتش ؟
؟"
" شتعمل هناا ؟ علاه جاية شنوة مازالت تحب مني ؟؟"
تبسمتلي ودورت بعيناها على وجهي تحكي " انا مجيتش ليك انت .. جيت لليث كيف ماتعرف احنا عايلة و لازم نزورو بعضنا "
عقدت حواجبي مستغربة من كلامها نحكي " عايلة ؟؟ فاش تحكي انت ؟؟"
" شنوة فاش نحكي ؟؟ ياخي مافيبالكش الي ليث من العايلة .. يا للا ليث يكون ولد عمة ايهم "
اول ماسمعت كلامها حسيت بدني ترهوج و الدنيا دارت بيا شديت بيديا عالفوتاي بش مانطيحش هزيت راسي معاها بقيت نغزرلها نحاول نستوعب الي سمعتو .. حطت يداها على فمها ورمشت عيناها تحكي " ياااا .. صار مافيبالكش الي ليث من العيلة ؟؟ كيفاه مايقولش لمرتو معلومة كيف هاذي .. عييب علييه  "
حسيت بغصة وحلت في حلقي خنقتني .. تقويت على روحي نحكي " ت.. تكذب .. ليث المحامي متاعكم و هو بعد عليكم ب..بعد على ثنيتكم .. الي تقول فيه كذب مستحيل يكون حقيقة "
ضحكت بالقوي تحكي "هه بعد علينا !! كيفاه بعد وهو البارح حذانا ؟؟ كيف ماقتلك احنا عايلة ونزورو بعضنا .. يعني بش تراني ديما هنا "
قربتلي و حطت عيناها فعينيا تحكي" ياخي صدقت الي ليث خلانا على خاطرك و انو رضا ياخذ واحدة كيفك .. وحدة مسوها زوز غيرو .. تكونش متخيلة انكم بش تعملو عيلة و ضعااار هه"
هبطو دموعي على كلماتها الأخرى لحظتها تمنيت كان مت و لاسمعتها من عندها حسيت روحي بكشت لكلام هرب علياا مانجمتش نجاوبهاا غزرتلها كيف كملت تحكي " مسكينة انت قمووور .. عمرك ما سألت روحك علاه ليث تحمل المسؤولية هاذي ؟؟ في بالك الي انت اخترت ليث و بعدت على ريان بكيفك و كسرت كلامي .. هه مازال ماتولدش الي يكسرلي كلامي .. انت هنا بفضلي انا.. انا الي اخترت وجودك هناااا "
حسيت قلبي خظ بالقوي غمضت عينيا و حليتهم فيسع جمعت الحروف الي حسيتهم هربو من شفايفي نحكي
" ش.. شتقصد ؟؟"
بعدت عليا و ربعت يداها تحكي " معناها .. انا الي حبيتك تعرس بليث .. هكاكا وجودك قريبتلنا اضمن من وجودك مع رياان.. يعني تكون تحت عينينا او بالأحرى تكون تحت عينين ليث وهو يوصللنا كل شي .. هههه مشى في بالك الي ليث بلحق بش يحميك .. قداكش تسخف "
وخرت بخطواتي و ترميت عالفوتاي حطيت يديا على صدري نرد في النفس الي حستو تقطع عليا غمضت عينيا على صوتها كيف تحكي  " انت صحيح لعبت اما بالقواعد متااعي .. اقبل خسارتك قمر و ابعد من هنااا خاطر حتى ليث بش يجي نهار ويرميك.. باشارة وحدة مني انا هو بش يطلقك و يخليك يعني كون حاضرة "
حطيت يديا فوق وذنيا نحكي " اسسسسكت .. اسكت مانحبش نسمع منك شي "
" هذيكا الحقيقة الي لازمك تسمعها و تكون حاضرتلهااا"
قمت من بلاصتي وقفت قدامها نصييح " اخررررج .. قتلك اخرررج مانحبش نراااك .. ابعدونيييي"
ضحكت على جنب تحكي " ههه باهي هاني خارجة .. و سلم على ليث قولو مرت خالك جات تزور فيك"
غمزتني و عطاتني بظهرها بش تمشي اما رجعت وقفت دارتلي تحكي "حقها نسيت .. البركة فيك سمعت الي صار مع امك ليث حكالنا كيف جاء حذانااا "
لحظتها حسيت الدنيا ظلامت قدامي قربت منها و شديتها من كتافها نخض فيها " قتلك اسكت .. رد بالك تجبد سيرة امي في فمك .. اخرررج " جبدتها من يداها ناحية الباب حليتو و دزيتها .. اول ماخرجت سكرت الباب بالقوي وتكيت عليه حسيت ساقيا خانوني طحت في القاعة نصييح و نبكي .. حسيت دموعي كانو كيف الجمرة على خدي .. الي بنيتو نهار كامل حسيتو في لحظة تهد قدام عينيا.. حسيت روحي عاودت غرقت من جديد واليد الي صدقتها بش تشدني هي كانت السبب في هذاا .. فقت على كذبة كنت واهمة روحي بيها .. واجهت حقيقة اخرى زادت في وجيعت قلبي .. الي عملو ليث خلاني نندم على لحظة صدقتو فيها
مسحت دموعي هزيت روحي و كسرت كل حاجة كانت قدامي كيف ما كسرولي هوماا قلبي .. حسيت روحي تهديت رجعت لصالة ترميت عالفوتاي وغمضت عينيا بالك كيف نحلها مرة اخرى نلقا الي صاار مجرد كابوس وفقت منو بالك هذا الكل مصارش .. مانجمت نعمل شي حتى الهروب تو معادش ينفع لازمني نواجهه و بعدها بش نمشي على روحي .. بش نبعد عليه و نخلي كل شي ورايا .. فقت من سرحتي عالباب الي تحل تلفت نلقاه هو .. هزيت روحي ووقفت بقيت نغزر لخطوة ساقيه و هي تقرب ناحيتي .. حسيت قلبي بش ياقف .. خوف جديد حسيتو تمكن مني المرة هاذي .. خوف من الإنسان الي خلاني نعطي الثقة من جديد .. انسان اعتبرتو هو الامان هو الي بش يحميني .. للحظة حسيتو غريب عليا ماعرفتش هو شكون .. اول ماقرب مني وخرت بخطواتي حبيت نبعد عليه دور بعينيه عالدار الي كانت مكسرة وقرب مني اكثر يحكي
" قمر .. شبيك ؟؟ شنوة صاار هنااا "
طلعت عينيا فيه من غير حتى كلمة.. دموعي كانو اجابة الكافية عالصراع الي قاعدة نعيش فيه .. عقد حواجبو غزرلي مستغرب هز يدو بش يمسني .. بعدت عليه أكثر.. وقفتو بيدي بش مايقربليش .. قاومت شفايفي الي كانو يرعشو نحكي
" ر..رد بالك تمسني و لا تقربلي .. خ.. خليك بعيد "
حل عينيه فياا يحكي " ياخي خايفة مني ؟؟"
هبطو دموعي اكثر مع سؤالو .. تهزيت و تحطيت مع صوتو الي علاا صاح يحكي " قمررر .. احكي شصااار هناااا !!"
" ي.. ياخي انت شكون؟؟"
" شنوة انا شكون؟؟ قمر فاش تخرف ؟؟"
قربت منو غزرتلو في عينيه حطيت يديا على صدرو ودزيتو نحكي " قتلك انت شكووووون ؟؟ اه جاوبني شكونك انت ؟؟ علاه عملت فيا هكا ؟؟شعمتلك ؟؟"
شدني بيديه الزوز من زنودي بالقوي يحكي " قمر اركح.. شعمتلك انا فهمني ؟؟ "
فلت روحي منو و ضحكت بالقوي دموعي ملاو عينيا لدرجة انهم حجبو عليا الرؤية بش نراه مسحتهم فيسع بش نغزرلو نحكي
" ههه تحب تعرف انت شعمتلي؟؟ .. انت قتلتني .. انت خليتي نتمنى الموت دقايق لتالي .. علاه كذبت علياا ؟؟.. علاه خليتني نصدقك ليث؟؟ .. انت كنت اخر امل عندي .. كنت اخر محطة في حياتي .. ههه صدقت الي انت بش تحميني.. مديتلك يدي قلت بالك انت تشدني و توصلني لبر الاماان .. اما لاااا انت عملت هذا الكل على خاطر ولد خالك .. حبيت تخليني تحت عينيك بش مانعمل شي يضرو مش هكاا ؟؟ بش تحميه مني ؟؟ اغزرلي ليث انت عملت هكا على خاطرو ؟؟ كلامك الكل كذب ؟؟ مفما شي حقيقة من الي صااار ؟؟"
غمض عينيه و حلهم عض على شفايفو بالقوي قرب مني شوي يحكي " لااا لااا.. قمر لازمك تسمعني قبل .. انا ماعملتش هكاا على خاطرو .. صدقني ماكذبتش عليك في حتى شي .. الي قلتو ووعدتك بيه كان حقيقة و الله"
هزيتلو براسي لااا برشة مرات نحكي " مانيش مستعدة نسمعك .. و معادش نحب نرا وجهك .. انت واحد ساااااقط و كذاااب .. باهي يا سيدي انا مانيش بش نعمل شي لا ليك و لا ليه .. انا وحدة ضعيفة لدرجة اني بش نسلم في حقي ونسكر فمي ونرمي هذا الكل وراياا.. المهم انت ابعد عليااا وجهك معادش نحب نراااه "
عليت في صوتي اكثر نحكي "اخرررج من حيااتي.. نكررررهك و نعيفك.. كيفك كيفو ..الزوز دمرتوووننني "
"قمر اهدى و اسمعني .. عندك حق تحكي هكاا.. انا كذاااب و ساقط خاطر ماحكيتلكش و خبيت علييك.. اما ميسالش اسمعني والله الي في مخك الكل غالط.. اعطيني فرصة نفسرلك الي سمعتوو"
" انت متستحقش حتى فرصة فرصتك وفااات .. و شنوة هو الغالط بالضبط ؟؟ .. تحب تعرف شنوة الغالط ؟؟ الغالط اني صدقت وعدك لياا صدقت انك بش تاخذلي حقي و تعاوني اما انا شكون بش تعمل معايا هذا الكل؟ انا حتى شي .. انت رضيت روحك انك تتحمل المسؤولية وتاخذ واحدة اغتصبوها زوز .. وحدة مسوهاا زوز وحدة مسخة كيفي ماتسوى شي .. المهم تحمي عايلتك و انا الي مشى في بالي عملت هكا بش تحميني .. انا الي مشى في بالي انك منعتني من الموت على خاطري .. ههه قداشني طلعت بوهالية.. ياريتك خليتني نموت وقتهاا و لا عملت فيا هكاااا  "
هز صبعو قدامي حل عينيه الي كانو شاعلين فيااا و صاح يحكي " رد بااالك تعاود كلامك هذااا .. رد بالك تحكي هكااا على روحك اخر مرة نسمعك تقول هكاكااا.. انا عملت هذاا على خاطرك .. صدقني عرست بيك بش نحميك منهم و مانخليهمش يضروك .. صحيح هوما عايلتي اما انا بعيد علاهم ثنيتي غير ثنيتهم .. انا تحملت المسؤولية هاذي على خاطرك انت وكهوو صدقني قمر أ.."
قصيت عليه نحكي " تعرف يا ريتني عرست بريااان .. ياريتني قبلت بيه هو.. كنت راضية نتحرق في جهنم متاعو و لا اني نفيق على كذبة كيف هاذي .. على اقل هو مامثلش انو برئ كيفك و ماكذبش كان مستعد يتحمل مسؤولية غلطتو و ياخذني .. يمكن كان عطيتو فرصة راو صلح الي عملو و كان في المستوى "
قدم ناحيتي اكثر حتى خلاني نضرب في الحيط حسرني بيديه الزوز غزرلي بنظرة تخوف يحكي
" اخررر مرة نسمعك تحكي علييه .. اخر مرة نسمع منك الكلام هذاا فهمممت ؟؟ و تو بش تسكت و تسمعني للأخر "
هزيت راسي معاه مسحت دموعي غزرت في عينيه  تبسمت على جنب نحكي " صدقني قد مانسمعك مفماش عذر فالدنيا يخليني نصدقك و نامنلك مرة اخرى .. مفماش حاجة تغفرلك كذبتك .. عمري لانسامحك على عملتو فياا و الي خليتني نعيشو ونسمعو دقايق لتالي .. من اللحظة هاذي طريقك بش يخالف طريقي .. و رد بالك تظهر قدامي مرة اخرى سي ليث "
اول ماكملت كلامي دزيتو تعديت قدامو و تفاديتو خلط ورايا فيسع شدني من مرفقي و دورني ليه بالقوى حتى تضربت في صدرو يحكي " قمر ماتهبلنيش .. ماعندك وين ماشية .. رد بالك تخمم انك تعفس برا الدار هاذي بش تبقى هنا و تسمعني "
نطرتلو يدو نحكي " سيبني رد بالك تمسني .. ماعندكش فكرة قداه نتقزز منك و من روحي الي سمحتلها انها تقرب منك و تسمعك و تعيش معاك تحت سقف واحد .. من اللحظة هاذي ماعنديش بلاصة هنااا "
" قمرر اسكت .. انت بش تسمعني و بش تبقى هناا بسيف علييك  "
لميت قوتي بسيف و صحت في وجهه نحكي
" شكونننك انت بش تحكمم فياا اه ؟؟ مااانسكتش .. و مااانحبش نسمعك افهممم .. و اختااار مالاا يا تخرج انت يا نخرج اناااا .. مستحيل نبقى معااك فهمت .. واحد حاط يديه في يد الي هدوني ودمرولي حياتي واحد غدااار كيفك مستحيل نامنلو مرة اخرى و نأمن لوجودي معاه فنفس البلاصة .. خايفة منك لدرجة نرضى نبات في الشاارع على اني نبقى معااااك فهمتت ؟؟"
لحظتها نزل يديه من عليا بقى يغزرلي من غير حتى كلمة هبطت دمعة من عينو مسحها فيسع هزلي براسو باهي يحكي " عندك حق .. اما انت ماتعرف شي .. انا عمري لا كنت كيفهم و يدي مش في يدهم .. رد بالك تخاااف مني انا قلتهالك مستحيل كان نضرك و لا نغدرك .. و بش نخليك تصدق الكلام هذا مهما يصير  "
دورت راسي للنااحية لاخرى ماحبيتش نغزرلو حاسة روحي عايفتو و عايفة النفس الي ناخذ فيه من نفس البلاصة الي هو موجود فيها .. تهزيت و تحطيت عالباب الي تسكر بالقوي .. اول ماخرج طرشقت بالبكا حسيت الدنيا الكل وقفت و رجعتني لنقطة البداية.. رجعت لنفس البلاصة الي كنت طايحة فيها رجعت للقاع مرة اخرى .. قداه غاضتني روحي اني كنت لعبة في يديهم ..